ໃນວັນທີ 28 ມີຖຸນາ 2021, ພົນໂທ ວິໄລ ຫຼ້າຄໍາຟອງ ລັດຖະມົນຕີ ກະຊວງປ້ອງ ກັນຄວາມສະຫງົບ ສປປ ລາວ ພ້ອມດ້ວຍ ຄະນະ ໄດ້ເຂົ້າຮ່ວມກອງປະຊຸມທາງ ໄກປຶກສາຫາລືສໍາລັບເຈົ້າໜ້າທີ່ລະດັບສູງ ດ້ານວຽກງານຮັກສາຄວາມໝັ້ນຄົງລະຫວ່າງ ອາຊຽນ ແລະ ຣັດເຊຍ, ໂດຍການເປັນປະທານຂອງ ທ່ານ ນິໂກລາຍ ປາທູເຊບ ເລຂາທິການສະພາຄວາມໝັ້ນຄົງແຫ່ງສະຫະພັນຣັດເຊຍ, ມີຮັກສາການຮອງລັດຖະມົນຕີປະສານງານດ້ານນະໂຍບາຍການຕ່າງປະເທດ, ກະຊວງປະສານງານດ້ານການເມືອງ, ກົດໝາຍ ແລະ ຄວາມໝັ້ນຄົງ, ມີຮອງເລຂາທິການໃຫຍ່ອາຊຽນ ດ້ານປະຊາຄົມການເມືອງ ແລະ ຄວາມໝັ້ນຄົງ ອາຊຽນ ແລະ ເຈົ້າ ໜ້າທີ່ຂັ້ນສູງຮັບຜິດຊອບວຽກງານຮັກສາຄວາມໝັ້ນຄົງຂອງປະເທດສະມາຊິກ 10 ປະເທດອາຊຽນ ເຂົ້າຮ່ວມ.
ໃນກອງປະຊຸມດັ່ງກ່າວ, ທ່ານ ນິໂກລາຍ ປາຕຣູເຊບ ເລຂາທິການສະພາຄວາມໝັ້ນຄົງແຫ່ງສະຫະພັນຣັດເຊຍ ໄດ້ກ່າວເປີດກອງປະຊຸມຢ່າງເປັນທາງການ ພ້ອມທັງໄດ້ພັດປ່ຽນກັນລາຍງານໂດຍຫຍໍ້ກ່ຽວກັບ ການຮ່ວມມືດ້ານຄວາມຫໝັ້ນຄົງ ອາຊຽນ- ຣັດເຊຍ, ການແລກປ່ຽນທັດສະນະກ່ຽວກັບ ວຽກງານການເມືອງ ແລະ ຄວາມໝັ້ນຄົງໃນຂົງເຂດພາກພື້ນອາຊີ-ປາຊີຟິກ ແລະ ບັນດາສິ່ງທ້າທາຍຕ່າງໆ.
ໂອກາດດັ່ງກ່າວ, ພົນໂທ ວິໄລ ຫຼ້າຄຳຟອງ ລັດຖະມົນຕີ ກະຊວງປ້ອງກັນຄວາມສະຫງົບ ສປປ ລາວ ໄດ້ປະກອບຄຳຄິດຄຳເຫັນ ຕໍ່ກອງປະຊຸມ ໂດຍທ່ານໄດ້ຍົກໃຫ້ເຫັນເຖິງສະພາບການທີ່ມີການເຊື່ອມໂຍງກັນຫຼາຍຂຶ້ນໃນລະດັບພາກພື້ນ ແລະ ສາກົນ, ໄດ້ມີຫຼາຍເຫດການເກີດຂຶ້ນ ແລະ ຜັນແປໄປຢ່າງສະຫຼັບສັບຊ້ອນ, ຄາດເດົາໄດ້ຍາກ, ຍັງມີຫຼາຍບັນຫາ ເປັນຕົ້ນແມ່ນ ຂໍ້ຄັດແຍ່ງ, ການກໍ່ການຮ້າຍ, ອາຊະຍາກໍາຂ້າມຊາດ, ຄວາມທຸກຍາກ, ພະຍາດລະບາດ, ໄພທຳມະຊາດ ແລະ ອື່ນໆ ທີ່ເປັນໄພຂົ່ມຂູ່ຕໍ່ສະຖຽນລະພາບ, ຄວາມໝັ້ນຄົງ ແລະ ການພັດທະນາເສດຖະກິດສັງຄົມໃນພາກພື້ນ.
ທັງນີ້, ອັນພົ້ນເດັ່ນແມ່ນ ການລະບາດຂອງພະຍາດໂຄວິດ-19, ຊຶ່ງພາກພື້ນອາຊີ-ປາຊີຟິກ ກໍເປັນພາກພື້ນໜຶ່ງທີ່ໄດ້ຮັບຜົນກະທົບ ຈາກການແຜ່ລະບາດຂອງເຊື້ອພະຍາດດັ່ງກ່າວ, ເຮັດໃຫ້ມີຜູ້ຕິດເຊື້ອ ແລະ ເສຍຊີວິດເປັນຈຳນວນຫຼວງ ຫຼາຍ, ສົ່ງຜົນສະທ້ອນຢ່າງໜັກໜ່ວງຕໍ່ເສດຖະກິດ ແລະ ຊີວິດການເປັນຢູ່ຂອງປະຊາຊົນໃນຫຼາຍປະເທດ.
ນອກຈາກນີ້, ຍັງມີບັນຫາອາຊະຍາກຳຂ້າມ ຊາດ ກໍເປັນບັນຫາໜຶ່ງທີ່ຍັງສືບຕໍ່ເປັນໄພຄຸກຄາມຕໍ່ສະຖຽນພາບ ແລະ ຄວາມໝັ້ນຄົງຂອງພາກພື້ນ ເປັນຕົ້ນແມ່ນ ອາຊະຍາກຳທາງຄອມພິວເຕີ, ການຄ້າຂາຍຢາເສບຕິດ, ການຄ້າມະນຸດ, ການໂຈລະກໍາ ແລະ ອື່ນໆ; ດ້ານບັນຫາອາຊະຍາກໍາ ໄດ້ມີການສວຍໂອກາດນຳໃຊ້ເຕັກໂນໂລຊີທີ່ກ້າວໜ້າເຂົ້າໃນການເຄື່ອນໄຫວກະທຳຜິດ ເປັນຕົ້ນແມ່ນ ການໂຈມຕີລະບົບເຄືອຂ່າຍຄອມພິວເຕີຂອງພາກລັດ ແລະ ເອກະຊົນຢູ່ຫຼາຍປະເທດ ໃນພາກພື້ນ ແລະ ໃນໂລກ. ພ້ອມກັນນັ້ນ, ກໍນຳໃຊ້ລະບົບເຄືອຂ່າຍອິນເຕີເນັດເພື່ອຫຼອກລວງ, ສໍ້ໂກງຊັບປະຊາຊົນ, ຄ້າຂາຍສິ່ງຜິດກົດໝາຍ ແລະ ຂົນຂວາຍປະຊາຊົນ ເຂົ້າຮ່ວມຂະບວນການກໍ່ການຮ້າຍ, ລັກລອບຜະລິດ, ຂົນສົ່ງ, ຄ້າຂາຍຢາເສບຕິດ ແລະ ສານເຄມີທີ່ນໍາໃຊ້ເຂົ້າໃນການຜະລິດຢາເສບຕິດ ກໍເປັນບັນຫາໜຶ່ງທີ່ມີຄວາມເປັນອັນຕະລາຍຕໍ່ຄວາມສະຫງົບ ແລະ ຄວາມໝັ້ນຄົງຂອງພາກພື້ນ ໂດຍການນໍາໃຊ້ອຸປະກອນ ແລະ ວິທີການອັນໃໝ່ຢູ່ເລື້ອຍໆເຂົ້າໃນການເຄື່ອນໄຫວຂອງພວກເຂົາ ເພື່ອຫຼົບຫຼີກການກວດຄົ້ນ ແລະ ຈັບກຸ່ມຂອງເຈົ້າໜ້າທີ່.
ປະຊາຊົນຈໍານວນບໍ່ໜ້ອຍໄດ້ຕົກເປັນທາດຂອງຢາເສບຕິດ ເຮັດໃຫ້ມີຜົນກະ ທົບຢ່າງໜັກໜ່ວງຕໍ່ຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ. ບັນຫາເຫຼົ່ານີ້ ເປັນບັນຫາຂ້າມຊາດ ແລະ ສະຫຼັບສັບຊ້ອນ ຍາກທີ່ປະເທດໃດປະ ເທດໜຶ່ງຈະແກ້ໄຂໄດ້ດ້ວຍຕົວເອງ; ຍ້ອນແນວນັ້ນ, ຈຶ່ງມີຄວາມສໍາຄັນ ແລະ ຈຳ ເປັນທີ່ສຸດທີ່ຈະຕ້ອງມີກົນໄກທີ່ມີປະສິດ ທິພາບໃນການປຶກສາຫາລື ແລະ ຮ່ວມມືກັນຢ່າງໃກ້ຊິດແກ້ໄຂໄພຂົ່ມຂູ່ຕ່າງໆຢ່າງທັນການ.
Loading...