ວັນທີ 8 ກຸມພາ 2024 ນີ້, ສະຫາຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດພ້ອມດ້ວຍຄະນະ, ໄດ້ຢ້ຽມຢາມ ແລະເຮັດວຽກຢູ່ແຂວງຜົ້ງສາລີ. ໂດຍມີການນໍາຂອງແຂວງ, ການນໍາກອງບັນຊາການທະຫານແຂວງ ແລະ ປກສ ແຂວງ ໃຫ້ການຕ້ອນຮັບ.
ການຢ້ຽມຢາມ ແລະ ເຮັດວຽກຢູ່ແຂວງຜົ້ງສາລີ ໃນຄັ້ງນີ້, ສະຫາຍ ລັດຖະມົນຕີກະຊວງປ້ອງກັນປະເທດ ພ້ອມດ້ວຍຄະນະ ໄດ້ຢ້ຽມຢາມ ແລະ ພົບປະໂອ້ລົມປະຊາຊົນບ້ານແສນຄໍາ ເມືອງສໍາພັນ ແຂວງຜົ້ງສາລີ ເຊິ່ງເປັນບ້ານເກີດຂອງເພີ່ນເອງ, ໂດຍມີອໍານາດການປົກຄອງເມືອງສໍາພັນ, ອໍານາດການປົກຄອງບ້ານ ຕະຫຼອດຮອດ ປະຊາຊົນບ້ານ ແສນຄໍາ ໃຫ້ການຕ້ອນຮັບ. ໃນການພົບປະໂອ້ລົມສະຫາຍ ໄດ້ຢື້ຢາມຖາມຂ່າວເຖິງການດໍາລົງຊີວິດການເປັນຢູ່ຂອງປະຊາຊົນ ພ້ອມທັງໄດ້ເນັ້ນໃຫ້ປະຊາຊົນ ປັບປຸງທາງດ້ານການເມືອງແນວຄິດໃຫ້ມີຄວາມອຸ່ນອຽນທຸ່ນທ່ຽງ, ຍົກສູງຄວາມຮູ້ຄວາມສາມາດໃຫ້ສູງຂຶ້ນ, ບຸກບືນສູ້ຊົນພັດທະນາບ້ານ, ໂດຍເລີ່ມຈາກການພັດທະນາຄອບຄົວເປັນພື້ນຖານ, ປະຕິບັດແນວທາງການພັດທະນາເສດຖະກິດ-ສັງຄົມໃຫ້ສອດຄ່ອງ, ເອົາໃຈໃສ່ປູກຝັງ-ລ້ຽງສັດໂດຍອີງໃສ່ສະພາບຈຸດພິເສດຂອງບ້ານເປັນຫລັກ, ເອົາໃຈໃສ່ທາງດ້ານການຮັກສາສຸຂະພາບ, ສຸຂະອະນາໄມ ຂອງປະຊາຊົນພາຍໃນບ້ານ, ປັບປຸງລະບົບການສຶກສາໃຫ້ດີຂຶ້ນ, ການພັດທະນາຕ້ອງມີການປະສານສົມທົບລະຫວ່າງບ້ານ, ກຸ່ມບ້ານ ແລະ ເມືອງ ແລກປ່ຽນບົດຮຽນເຊິ່ງກັນ ແລະ ກັນ ພ້ອມກັນນັ້ນ, ກໍຕ້ອງເພີີ່ມທະວີຄວາມສາມັກຄີຮັກແພງພາຍໃນຄອບຄົວ, ສາມັກຄີພາຍໃນບ້ານໃຫ້ເປັນປຶກແຜ່ນແໜ້ນໜາ, ອໍານາດການປົກຄອງບ້ານຕ້ອງມີຄວາມເປັນເອກະພາບກັນໃນທຸກວຽກງານ, ເຊື່ອໝັ້ນວ່າ ອໍານາດການປົກຄອງບ້ານຈະຊອກທຸກວິທີທາງເພື່ອເຮັດໃຫ້ບ້ານໄດ້ຮັບການພັດທະນາເທື່ອລະກ້າວ.ໂອກາດນີ້, ກະຊວງປ້ອງກັນປະເທດຍັງໄດ້ມອບເງິນ ຈໍານວນ 200 ລ້ານກີບໃຫ້ບ້ານແສນຄໍາ ແລະ ມອບເງິນ 300 ລ້ານກີບໃຫ້ ເມືອງສໍາພັນ ເພື່ອປະກອບສ່ວນເຂົ້າໃນການພັດທະນາບ້ານແສນຄໍາ ແລະ ເມືອງສໍາພັນ ໃຫ້ດີຂຶ້ນກວ່າເກົ່າ.
ໃນວັນດຽວກັນ, ສະຫາຍ ລັດຖະມົນຕີກະຊວງປ້ອງກັນປະເທດ ພ້ອມດ້ວຍຄະນະ ຍັງໄດ້ ຢ້ຽມຊົມໂຄງການກໍ່ສ້າງສໍານັກງານກອງບັນຊາການທະຫານແຂວງຜົ້ງສາລີ ເຊິ່ງໂຄງການດັ່ງກ່າວ ມາຮອດປັດຈຸບັນ ການກໍ່ສ້າງສໍາເລັດແລ້ວ 70%, ຄາດວ່າຈະໃຫ້ສໍາເລັດໃນໄວໆນີ້. ຈາກນັ້ນ, ຍັງໄດ້ໄປຢ້ຽມຢາມ ແລະ ພົບປະໂອ້ລົມພະນັກງານ-ນັກຮົບ ໂຮງຮຽນການທະຫານທ້ອງຖິ່ນແຂວງຜົ້ງສາລີ ໂດຍມີຄະນະພັກ-ຄະນະບັນຊາ ຕະຫຼອດຮອດພະນັກງານຫຼັກແຫຼ່ງໃຫ້ການຕ້ອນຮັບ ແລະ ໄດ້ຢ້ຽມຊົມໂຄງການກໍ່ສ້າງ ອະນຸສາວະລີນັກຮົບນິລະນາມ, ປາໂນຮູບນູນ ແລະ ສວນສາທາລະນະ ເທສະບານເມືອງບຸນເໜືອ ແຂວງຜົ້ງສາລີ ເຊິ່ງເປັນໂຄງການປະກອບສ່ວນຂອງກະຊວງປ້ອງກັນປະເທດ ຮ່ວມກັບ ແຂວງຜົ້ງສາລີ ທີ່ຫາກໍສໍາເລັດການກໍ່ສ້າງ ແລະ ມອບຮັບໃນທ້າຍເດືອນທັນວາປີ 2023 ຜ່ານມາ.
ໂດຍ: ນາງຍອມເພັດ
