ໃນລະຫວ່າງວັນທີ່ 06-10 ມິຖຸນາ 2022 ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ ພ້ອມດ້ວຍຄະນະ ໄດ້ເດີນທາງໄປເຄື່ອນໄຫວ ແລະ ຊຸກຍູ້ວຽກງານຂະແໜງພາຍໃນ ຢູ່ແຂວງຫຼວງພະບາງ ໃນໂອກາດນີ້ ໄດ້ເຂົ້າຢ້ຽມຂໍ່ານັບ ທ່ານ ສຸກັນ ບຸນຍົງ ຮອງເຈົ້າແຂວງໆຫຼວງພະບາງ ເພື່ອແຈ້ງຈຸດປະສົງໃນການມາເຄື່ອນໄຫວວຽກງານ ແລະ ລາຍ ງານກ່ຽວກັບການຈັດຕັ້ງປະຕິບັດວຽກງານຂະແໜງພາຍ ໃນໃນໄລບະຜ່ານມາ ກໍ່ຄື ປັດຈຸບັນ ໃຫ້ທ່ານຮອງເຈົ້າແຂວງ ກໍ່ຄື ການນໍາແຂວງຫຼວງພະບາງ ໄດ້ຮັບຊາບ ໂດຍສະເພາະຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ກໍ່ຄື ການມອບໝາຍຂອງລັດຖະບານ ຂະແໜງພາຍໃນ ພວມສຸມໃສ່ການຈັດຕັ້ງປະຕິບັດວຽກງານບຸລິມະສິດຈຸດສຸມສໍາຄັນຈໍານວນໜຶ່ງ ໃນໄລຍະ 05 ປີ(2021-2025) ຂະແໜງພາຍໃນ ຈະໄດ້ສຸມໃສ່ການຄົ້ນຄວ້າ, ປັບປຸງ ແລະ ສ້າງນິຕິກໍາ ທີ່ຕິດພັນກັບພາລະບົດບາດຂອງຂະແໜງພາຍໃນ; ພັດທະນາການບໍລິຫານລັດຕາມທິດກະທັກຮັດ, ບໍ່ຊໍ້າຊ້ອນກ້າວກ່າຍວຽກງານກັນ, ມີຄວາມເຂັ້ມແຂງ ແລະ ມີປະສິດທິພາບ; ຫັນວຽກງານຄຸ້ມຄອງພະນັກງານ-ລັດຖະກອນ ເປັນທັນສະໄໝ, ສຸມໃສ່ປະເມີນການຈັດຕັ້ງປະຕິບັດວຽກງານຂອງພະນັກງານ -ລັດຖະກອນ ພ້ອມທັງຄົ້ນຄວ້າແນວທາງ-ກົນໄກໃນການຫຼຸດຜ່ອນຈໍານວນພະນັກງານ-ລັດຖະກອນລົງ ເພື່ອຫຼຸດລາຍຈ່າຍງົບປະມານຂອງລັດຖະບານ; ຫັນວຽກງານຄຸ້ມ ຄອງພົນລະເມືອງໃຫ້ເປັນລະບົບທັນສະໄໝ ໃນຂອບເຂດທົ່ວປະເທດ ໂດຍເລັ່ງໃສ່ການຈົດທະບຽນຕ່າງໆ ທີ່ພົວພັນເຖິງຄວາມຮັບຜິດຊອບຂອງຂະແໜງພາຍໃນ; ແກ້ໄຂເຂດແດນເຊື່ອມຕໍ່ລະຫວ່າງແຂວງ ໃຫ້ສໍາເລັດພາຍໃນປີ 2022 ນີ້ ແລະ ປະຕິບັດວຽກງານສາມສ້າງໃຫ້ເຂົ້າສູ່ລວງເລິກ; ຜັນຂະຫຍາຍກົດໝາຍວ່າດ້ວຍເອກະສານເຂົ້າໃນວຽກງານຕົວຈິງ ແລະ ເອົາໃຈໃສ່ທ້ອນໂຮມເກັບກໍາເອກະສານສໍາຄັນທາງປະຫວັດສາດ ແລະ ວັດທະນະທໍາ-ສັງຄົມ; ຮ່ວມກັບພາກສ່ວນທີ່ກ່ຽວຂ້ອງຈັດຕັ້ງປະຕິບັດໂຄງການສໍາຫຼວດ, ວັດແທກປັກຫຼັກໝາຍ ແລະ ສ້າງແຜນທີ່ເສັ້ນຊາຍແດນລະຫວ່າງຊາດ ກັບບັນດາປະເທດທີ່ຍັງບໍ່ສໍາເລັດ; ຄົ້ນຄວ້າຫັນຫົວໜ່ວຍວິຊາການທີ່ມີລາຍຮັບໄປກຸ້ມຕົນເອງທາງດ້ານງົບປະມານເທື່ອລະກ້າວ ພ້ອມທັງຫັນພະນັກງານ-ວິຊາການ ທີ່ຢູ່ຫົວໜ່ວຍວິຊາການດັ່ງກ່າວເປັນພາລະກອນ ເພື່ອຫຼຸດຜ່ອນຈໍານວນພະນັກງານ-ລັດຖະກອນ; ເຜີຍແຜ່ນິຕິກໍາວຽກງານຊົນເຜົ່າ ແລະ ສາສະໜາ ພ້ອມທັງຄຸ້ມຄອງການເຄື່ອນໄຫວຂອງບັນດາການຈັດຕັ້ງສາສະໜາ ໃຫ້ຖືກຕ້ອງຕາມລະບຽບ-ກົດໝາຍ ທີ່ກໍານົດໄວ້; ຄົ້ນຄວ້າຮູບການ ແລະ ວິທີການມາດຕະຖານ, ຕົວຊີ້ວັດ ເພື່ອເປັນບ່ອນອີງໃຫ້ແກ່ການຄັດເລືອກຜົນງານໃນການຍ້ອງຍໍບຸກຄົນ ແລະ ກົມກອງລວມໝູ່; ເອົາໃຈໃສ່ຍົກລະດັບຄວາມຮູ້ຄວາມສາມາດດ້ານວິຊາສະເພາະ, ທິດສະ ດີການເມືອງການປົກຄອງ, ພາສາຕ່າງປະເທດ ແລະ ດ້ານອື່ນໆ ໃຫ້ພະນັກງານ-ລັດຖະກອນ ຂະແໜງພາຍໃນ ທັງສູນກາງ ແລະ ທ້ອງຖິ່ນ. ທ່ານລັດະມົນຕີກະຊວງພາຍໃນ ຍັງໄດ້ຖືເອົາໂອກາດນີ້ປືກສາຫາລື ແລະ ແລກປ່ຽນຄໍາຄິດເຫັນໃນການປັບປຸງ ແລະ ພັດທະນາຮອບດ້ານວຽກງານຂະແໜງພາຍໃນ ຮ່ວມກັບການນໍາແຂວງຫຼວງພະບາງ ຕື່ມອີກ.
ໃນໂອກາດມາເຄື່ອນໄຫວ ແລະ ຊຸກຍູ້ວຽກງານ ຢູ່ແຂວງຫຼວງພະບາງ, ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ ຍັງໄດ້ເຂົ້າຮ່ວມເປັນປະທານ ກອງປະຊຸມເຜີຍແຜ່ກົດໝາຍວ່າດ້ວຍການສໍາຫຼວດວັດແທກ ແລະ ສ້າງແຜນທີ່ ໃຫ້ 08 ແຂວງພາກເໜືອ ໂດຍແມ່ນກົມແຜນ ທີ່ ກະຊວງພາຍໃນ ແລະ ພະແນກພາຍໃນແຂວງຫຼວງພະບາງ ຮ່ວມກັນຈັດຂຶ້ນ ທີ່ນະຄອນຫຼວງພະບາງ ກອງປະຊຸມຄັ້ງນີ້ມີບັນດາທ່ານຫົວໜ້າ-ຮອງຫົວໜ້າພະແນກ, ຫົວໜ້າຂະແໜງ ຂົງເຂດວຽກງານພາຍໃນ ຈາກ 08 ແຂວງພາກເໜືອ ແລະ ມີຕາງໜ້າຈາກ ພະແນກການອ້ອມຂ້າງແຂວງຫຼວງພະບາງ ເຂົ້າຮ່ວມ.
ກົດໝາຍວ່າດ້ວຍການສໍາຫຼວດວັດແທກ ແລະ ສ້າງແຜນ ທີ່ ເປັນນິຕິກໍາສໍາຄັນ ແລະ ສູງສຸດ ໃຫ້ແກ່ການຄຸ້ມຄອງລັດ ທັງຂັ້ນສູນກາງ ແລະ ທ້ອງຖິ່ນ ກ່ຽວກັບວຽກງານສໍາຫຼວດວັດແທກ, ຖ່າຍພາບທາງອາກາດ ແລະ ສ້າງແຜນທີ່ ໃຫ້ຖືກຕາມແນວທາງນະໂຍບາຍ, ລັດຖະທໍາມະນນູນ, ລະ ບຽບ- ກົດໝາຍ ແລະ ນິຕິກໍາຕ່າງໆ ທີ່ພັກ-ລັດ ວາງອອກ.
ຈາກນັ້ນ, ທ່ານລັດຖະມົນຕີກະຊວງພາຍໃນ ພ້ອມຄະນະ ຍັງຈະໄດ້ລົງຕິດຕາມ ແລະ ຊຸກຍູ່ວຽກງານບໍລິການຜ່ານປະຕູດຽວຢູ່ສໍານັກງານປົກຄອງນະຄອນຫຼວງພະບາງ, ເຂົ້າຮ່ວມເປັນປະທານ ກອງປະຊຸມວິຊາການແກ້ໄຂເຂດ ແດນເຊື່ອມຕໍ່ ສອງຝ່າຍ ລະຫວ່າງ ກະຊວງພາຍໃນ ແລະ ພະແນກພາຍໃນແຂວງຫຼວງພະບາງ, ຈະລົງຊຸກຍູ້ວຽກງານຢູ່ຫ້ອງການພາຍໃນເມືອງງອຍ ແຂວງຫຼວງພະບາງ ແລະ ຈະໄດ້ເຮັດວຽກຮ່ວມກັບ ພະແນກພາຍໃນແຂວງຫຼວງພະບາງ ເພື່ອຊຸກຍູ້ ແລະ ຮັບຟັງການລາຍງານສະພາບການເຄື່ອນໄຫວຈັດຕັ້ງປະຕິບັດວຽກງານຂະແໜງພາຍໃນ ຮອບດ້ານ ຕື່ມອີກ.
ໃນໂອກາດດຽວກັນນີ້ ທ່ານລັດຖະມົນຕີກະຊວງພາຍໃນ ຍັງໄດ້ມອບອຸປະກອນໄອທີ ສໍາລັບນໍາໃຊ້ເຂົ້າໃນການດໍາເນີນກອງປະຊຸມທາງໄກແບບອອນລາຍ ໃຫ້ ພະແນກພາຍໃນ 08 ແຂວງພາກເໜືອ ພາກສ່ວນລະ 1 ຊຸດ ເພື່ອຫັນເປັນທັນສະໄໝເທື່ອລະກ້າວ ແລະ ສ້າງສິ່ງອໍານວຍຄວາມສະດວກໃຫ້ແກ່ການສ່ອງແສງລາຍງານ ແລະ ການປຶກສາຫາລືວຽກງານຮ່ວມກັນຂອງຂະແໜງພາຍໃນ ໃຫ້ມີປະສິດທິພາບສູງຂຶ້ນ ສະດວກ ວ່ອງໄວ ແລະ ທັນສະພາບ ການ.
