ລັດຖະມົນຕີກະຊວງອຸດສາຫະກໍາ ແລະການຄ້າ ຕ້ອນຮັບທູດ ສປ ຈີນ ຄົນໃໝ່
ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະ ກໍາ ແລະ ການຄ້າ(ອຄ) ໄດ້ຕ້ອນຮັບ ທ່ານນາງ ຟາງ ຫົງ ເອກອັກ ຄະລັດຖະທູດ ສປ ຈີນ ປະຈຳລາວເມື່ອທ້າຍອາທິດຜ່ານມາ, ໃນໂອກາດມາດຳລົງຕຳແໜ່ງ ເປັນທູດຄົນໃໝ່ ປະຈໍາ ສປປ ລາວ.
ທ່ານ ມະໄລທອງ ກົມມະສິດ ໄດ້ສະແດງຄວາມຊົມເຊີຍ ແລະ ຍິນດີຕ້ອນຮັບ ທ່ານນາງ ຟາງຫົງ ທີ່ໄດ້ຮັບແຕ່ງຕັ້ງເປັນເອກອັກ ຄະລັດຖະທູດ ສປ ຈີນ ຄົນໃໝ່ ປະຈໍາ ສປປ ລາວ ພ້ອມທັງສະ ແດງຄວາມເຊື່ອໝັ້ນວ່າ ດ້ວຍປະສົບການທາງດ້ານການທູດ ແລະ ບົດຮຽນ, ຄວາມຮູ້ຄວາມສາມາດ ທີ່ອຸດົມສົມບູນຂອງທ່ານທູດ ຈະເປັນຂົວຕໍ່ເຮັດໃຫ້ສາຍພົວພັນມິດຕະພາບ ແລະ ການຮ່ວມມືລະຫວ່າງ ລາວ-ຈີນ, ພ້ອມທັງສະແດງຄວາມຂອບໃຈ ຕໍ່ລັດຖະ ບານ ສປ ຈີນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອທາງດ້ານເຕັກນິກວິຊາການ ແລະທຶນຮອນ ໃຫ້ແກ່ ສປປ ລາວ ໂດຍສະເພາະ ຂະແໜງອຸດສາຫະກຳ ແລະ ການຄ້າ ໃນໄລຍະທີ່ຜ່ານມາ. ເປັນຕົ້ນຜົນສຳເລັດໃນການສ້າງບົດບັນທຶກຄວາມ ເຂົ້າໃຈ ວ່າດ້ວຍການຮ່ວມມືທາງດ້ານການຄ້າເອເລັກໂຕຣນິກ ທີ່ໄດ້ຮັບການລົງນາມໂດຍ ສອງກະຊວງການຄ້າ ລາວ-ຈີນ;ການຊຸກຍູ້ການສົ່ງອອກສັດໃຫຍ່ໄປ ສປ ຈີນ ແລະສົ່ງເສີມການສົ່ງ ອອກສິນຄ້າກະສິກຳ ແລະ ພືດຜັກ ໄປ ສປ ຈີນ ແລະ ອື່ນໆ.
ໂອກາດນີ້, ທ່ານນາງ ຟາງ ຫົງ ກໍໄດ້ສະແດງຄວາມຂອບໃຈຕໍ່ ທ່ານ ມະໄລທອງ ກົມມະສິດ ທີ່ໄດ້ໃຫ້ການຕ້ອນຮັບ, ພ້ອມທັງ ສະແດງຄວາມຢືນຢັນວ່າ ຈະສຸມທຸກເຫື່ອແຮງ, ສະຕິປັນຍາ ເຂົ້າການປະຕິບັດໜ້າທີ່ການທູດຢູ່ ສປປ ລາວ ກໍຄື ຊຸກຍູ້ສົ່ງເສີມການພົວພັນຮ່ວມມື ລະຫວ່າງ ຈີນ-ລາວ ໃຫ້ນັບມື້ໄດ້ຮັບການເສີມຂະຫຍາຍຂຶ້ນສູ່ບາດກ້າວໃໝ່ ໃນອະນາຄົດ. ທັງນີ້, ກໍເພື່ອນໍາເອົາຜົນປະໂຫຍດສູງສຸດມາສູ່ປະຊາຊົນຂອງທັງ ສອງປະເທດ.
ຂ່າວ: ຂປລ.
