ທ່ານ ໂພໄຊ ໄຊຍະສອນ ກຳມະການສູນກາງພັກ ລັດຖະມົນຕີກະຊວງ ພະລັງງານ ແລະ ບໍ່ແຮ່ ໄດ້ເຄື່ອນໄຫວຊຸກຍູ້ຊີ້ນຳວຽກງານ ຢູ່ແຂວງຈຳປາສັກ ໃນວັນທີ 20/6/2024.
ໃນໂອການີ້ໄດ້ພົບປະໂອ້ລົມພະນັກການນຳຫຼັກແຫຼ່ງພາຍໃນຂົງເຂດພະລັງງານ ແລະ ບໍ່ແຮ່ ແຂວງຈຳປາສັກ ທີ່ສຳນັກງານລັດວິສາຫະກິດໄຟຟ້າລາວ ສາຂາ ແຂວງຈຳປາສັກ (ບ້ານໂນນສະຫວ່າງ ນະຄອນປາກເຊ ) ເຊິ່ງກ່ອນອື່ນ ໄດ້ຮັບຟັງລາຍງານສະພາບການປະຕິບັດວຽກງານພະລັງງານ ແລະ ບໍ່ພາຍໃນແຂວງຈຳປາສັກ ໂດຍຫຍໍ້ໃນໄລຍະ 6 ເດືອນທີ່ຜ່ານມາ ຈາກທ່ານ ແກ້ວ ສີລິສະຫັວດ ກໍາມະການພັກແຂວງ ຫົວໜ້າພະແນກພະລັງງານ ແລະ ບໍ່ແຮ່ ແຂວງ ຈໍາປາສັກ ເຊິ່ງໃຫ້ຮູ້ວ່າ: ພະແນກ ພະລັງງານ ແລະ ບໍ່ແຮ່ ແຂວງ ໄດ້ຖືສຳຄັນວຽກງານສາມສ້າງ, ວຽກງານວິຊາສະເພາະຢ່າງຕັ້ງໜ້າ ຊຶ່ງວຽກງານພະລັງງານນໍ້າຕົກ ລວມຍອດຜະລິດຕະພັນພະລັງງານ – ບໍ່ແຮ່ປະຕິບັດໄດ້ 698,11 ຕື້ກີບ. ທຽບໃສ່ແຜນການປີປະຕິບັດໄດ້ 47,07%, ລວມຍອດມູນຄ່າການຈໍາໜ່າຍປະຕິບັດໄດ້: 1,169.04 ຕື້ກີບ. ທຽບໃສ່ແຜນການປີ ເທົ່າ 50,81% ທົ່ວແຂວງມີແຫຼ່ງພະລັງງານນໍ້າຕົກ ທີ່ໄດ້ສຶກສາ, ສໍາຫຼວດ ຕາມຂັ້ນຕອນ MOU,FS,PDA,CA ລວມທັງໝົດ: 32ໂຄງການ, ມີກຳລັງຕິດຕັ້ງ: 3.733 Mw. ລວມພະລັງງານທົດແທນ. ໃນນັ້ນສາມາດດຳເນີນການຜະລິດແລ້ວ ມີ 07 ໂຄງການ ກໍາລັງຕິດຕັ້ງ 742 Mw. ສາມາດຜະລິດພະລັງງານໄດ້ 4.258 Gwh/y. ກໍາລັງລົງມືມີ 03 ໂຄງການ: ເຂື່ອນໄຟຟ້າດອນສະໂຮງພາກຂະຫຍາຍ 65Mw (ປະຕິບັດໄດ້92%) ແລະ ເຂື່ອນໄຟຟ້າຫ້ວຍຄົດ-ຕາດຢອຍ 15 MW (ຢູ່ໃນຊ່ວງທົດລອງເຄື່ອງ), ເຂື່ອນໄຟຟ້ານໍາພາກ 168 Mw (ປະຕິບັດໄດ້ 37.72%)ມີສະຖານີໄຟຟ້າແຮງດັນສູງ 115 kv ມີ 05 ແຫ່ງ. ສະຖານີໄຟຟ້າແຮງດັນສູງ 500 Kv 02ແຫ່ງ. ຈາກນັ້ນສາຍສົ່ງຈາກ ໂຄງການພະລັງງານຄວາມຮ້ອນ ຖ່ານຫີນ ຈາກ ເມືອງກະລຶມ ຜ່ານເຊກອງເມືອງ ທ່າແຕງ-ປາກຊ່ອງ-ປະທຸມພອນ-ເມືອງ ໂຂງ. ທີ່ພວມກໍາລັງສຶກສາ.
ພ້ອມນີ້ ໄດ້ຍົກໃຫ້ເຫັນວຽກງານພະລັງງານທົດແທນ, ວຽກງານໄຟຟ້າ ຊຶ່ງຜ່ານການຈັດຕັ້ງປະຕິບັດເຫັນໄດ້ວ່າ ທົ່ວແຂວງ ມີໄຟຟ້າຊົມໃຊ້ 100%ໃນຈໍານວນ 642 ບ້ານ,
ພາຍຫຼັງຮັບຟັງການລາຍງານແລ້ວ ທ່ານ ໂພໄຊ ໄຊຍະສອນ ລັດຖະມົນຕີກະຊວງ ພະລັງງານ ແລະ ບໍ່ແຮ່ ກໍໄດ້ມີຄຳເຫັນໂອ້ລົມ ໂດຍຊຸກຍູ້ຊີ້ນຳໃຫ້ ພະແນກພະລັງງານ ແລະ ບໍ່ແຮ່ ເອົາໃຈໃສ່ຫຼາຍບັນຫາສຳຄັນ ເຊັ່ນ: ສືບຕໍ່ສຶກສາອົບຮົມການເມືອງແນວຄິດ ແລະ ປັບປຸງການຈັດຕັ້ງພາຍໃນໃຫ້ໜັກແໜ້ນ ເຂັ້ມແຂງ, ຕິດພັນກັບການເປີດກອງປະຊຸມສາມຂັ້ນຂອງພັກ ກໍຄືຂອງຂະແໜງຂອງຕົນ, ຫັນເອົາແຜນງານໂຄງການຂອງລັດຖະບານ, ຂອງກະຊວງ ກໍຄືຂອງແຂວງມາຈັດຕັ້ງຜັນຂະຫຍາຍໃຫ້ຖືກຕ້ອງ ສອດຄ່ອງກັບສະພາບຈຸດພິເສດ ແລະ ທ່າແຮງຂອງແຂວງ ເພື່ອໃຫ້ມີການຈັດຕັ້ງປະຕິບັດຢ່າງມີປະສິດທິຜົນ, ກວດກາຄືນບັນດາໂຄງການຕ່າງປະເທດລົງທຶນໃນຂົງເຂດພະລັງງານ ແລະ ບໍ່ແຮ່ ວ່າໂຄງການໃດທີ່ຊັກຊ້າແກ່ຍາວ, ບໍ່ມີຄວາມຄືບໝ້າ, ບໍ່ມີປະສິດທິຜົນ ໃຫ້ຮີບຮ້ອນລາຍງານ ແລະ ນຳສະເໜີເພື່ອຫາວິທີທາງແກ້ໄຂໂດຍໄວ. ໂຄງການໃດມີຜົນສຳເລັດມີໝາກຜົນສູງຕ້ອງຊຸກຍູ້ ແລະ ສົ່ງເສີມ ໃຫ້ເກີດປະໂຫຍດແກ່ລັດ ແລະ ປະຊາຊົນໃນທ້ອງຖິ່ນໃຫ້ນັບມື້ນັບຫຼາຍ.
Cr: ເກດສະໜາ ແກ້ວສຸວັນນະແສງ
