ວັນທີ 13 ສິງຫາ 2024 ທ່ານ ມະໄລທອງ ກົມມະສິດ ລັດ ຖະມົນຕີກະຊວງອຸດສາຫະກຳ ແລະ ການຄ້າ (ອຄ), ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ພ້ອມດ້ວຍຄະນະ ໄດ້ເຄື່ອນ ໄຫວຢ້ຽມຢາມໂຄງກການພັດທະນາ ແລະ ປັບປຸງ ແກ້ໄຂຄວາມ ທຸກຍາກ ຂອງປະຊາຊົນບ້ານກະບູດ-ຊຽງແຫວນ ເມືອງທ່າແຂກ ແຂວງຄຳມ່ວນ ທີ່ໄດ້ຮັບການຊ່ວຍເຫຼືອຈາກ ບໍລິສັດ ຊີໂນ-ອາກຣີ ໂປຕາສ ຈໍາກັດ. ໂດຍມີ ທ່ານ ເຈິ້ງ ໂຢເຢ້ ຮອງຜູ້ອຳນວຍ ການບໍລິສັດ ຊີໂນ-ອາກຣີ ໂປຕາສ ຈໍາກັດ ພ້ອມດ້ວຍຄະນະຮັບ ຜິດຊອບໂຄງການ ແລະ ອຳນາດການປົກຄອງບ້ານດັ່ງກ່າວໃຫ້ ການຕ້ອນຮັບ.
ໂອກາດເຄື່ອນໄຫວຢ້ຽມຊົມກິດຈະກໍາພັດທະນາຊຸມຊົນ ບ້ານກະບູດ-ຊຽງແຫວນຄັ້ງນີ້ ແມ່ນໄດ້ຢ້ຽມຊົມພາຍໃນສູນກິດຈະກໍາວັດທະນະທໍາຊຸມຊົນ ທີ່ມີການວາງສະແດງແຜນຫວາດຈໍາລອງໃນການພັດທະນາຂອງບ້ານ ກະບູດ-ຊຽງແຫວນ, ບັນດາຮູບພາບຜົນງານການເຄື່ອນໄຫວພັດທະນາທີ່ບໍລິສັດໄດ້ໃຫ້ການຊ່ວຍເຫຼືອໃນຜ່ານມາ ເປັນຕົ້ນແມ່ນຜົນສໍາເລັດຂອງໂຄງການພັດທະນາພື້ນຖານໂຄງລ່າງດ້ານຕ່າງໆ, ຊົມເຄື່ອງຫັດຖະກໍາຈັກສານ ແລະ ຮູບພາບ ທີ່ຕິດພັນກັບການດໍາລົງຊີວິດຂອງຊົນເຜົ່າ, ຊົມໂຄງການປູກຜັກໃນເຮືອນຮົ່ມ, ການກໍ່ສ້າງບ່ອນລ້ຽງປາ ທີ່ໂຄງການໄດ້ຈັດຕັ້ງປະຕິບັດເພື່ອຊຸກຍູ້ສົ່ງເສີມອາຊີບໃຫ້ພໍ່ແມ່ປະຊາຊົນຜູ້ທີ່ວ່າງງານ, ຄອບຄົວທີ່ທຸກຍາກ ໄດ້ມີວຽກເຮັດງານທໍາ ເພື່ອສ້າງລາຍຮັບໃຫ້ແກ່ການພັດທະນາຊີວິດການເປັນຢູ່ ຕາມແນວທາງນະໂຍບາຍຂອງລັດຖະບານ ພ້ອມທັງຢ້ຽມຊົມບັນດາກິດຈະກຳຕ່າງໆ ທີ່ບໍລິສັດໄດ້ຈັດຕັ້ງປະຕິບັດຢູ່ໃນເຂດດັ່ງກ່າວ ລວມເຖິງຜົນສໍາເລັດຂອງໂຄງການກໍ່ສ້າງຂົວຂ້າມຫ້ວຍ ນໍ້າຊຽງລົງ, ໂຄງການກໍ່ສ້າງຄອງຕ້ານໄພນໍ້າຖ້ວມ ແລະ ບ່ອນວາງຂາຍສິນຄ້າເຄື່ອງບໍລິໂພກທີ່ປະຊາຊົນທ້ອງຖິ່ນໄດ້ນໍາມາວາງຂາຍໃນຕະຫລາດກະສິກໍາຊຸມຊົນຂອງບ້ານ.
ໂອກາດນີ້ ຄະນະດັ່ງກ່າວໄດ້ແນະນໍາໃຫ້ການຈັດຕັ້ງບ້ານ ເອົາໃຈໃສ່ໃຫ້ການສະໜັບສະໜູນ ແລະ ມີສ່ວນຮ່ວມ ກັບບໍລິສັດ ເຂົ້າໃນການພັດທະນາ ຊີວິດການເປັນຢູ່ ກໍຄືການພັດທະນາບ້ານ ຊ່ອງຂອງຕົນເອງ. ນອກນັ້ນ ກໍ່ໄດ້ເຄື່ອນໄຫວ ຢ້ຽມຢາມພະແນກອຸດສາຫະກຳ ແລະ ການຄ້າແຂວງຄຳມ່ວນ ແລະ ໂຄງການກໍ່ສ້າງຫ້ອງປະຊຸມ ຂອງພະແນກອຸດສາຫະກຳ ແລະ ການຄ້າແຂວງ ທີ່ກຳລັງດຳເນີນການກໍ່ສ້າງ.
ທີ່ມາ: ຂ່າວແຂວງຄໍາມ່ວນ
