ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ລັດຖະມົນຕີປະຈຳ ສນຍ ຕ້ອນຮັບເອກອັກຄະລັດຖະທູດ ອົດສະຕຣາລີ ຢ້ຽມອຳລາ.

ໃນຕອນເຊົ້າ ຂອງວັນທີ 24 ກັນຍາ 2020 ທີ່ ຫ້ອງວ່າການສຳນັກງານນາຍົກລັດຖະມົນຕີ, ທ່ານ ນາງ ສຸວັນເພັງ ບຸບຜານຸວົງ, ລັດຖະມົນຕີປະຈຳສຳນັກງານນາຍົກ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບອຳລາ ຂອງທ່ານ Jean-Bernard Carrasco, ເອກອັກຄະລັດຖະທູດ ອົດສະຕຣາລີ ປະຈຳ ສປປ ລາວ ຍໂອກາດສຳເລັດການປະຕິບັດໜ້າທີ່ການທູດ ຢູ່ ສປປ ລາວ ໃນໄລຍະປີ 2018-2020.
ໃນໂອກາດດັ່ງກ່າວ, ທ່ານ ນາງ ສຸວັນເພັງ ບຸບຜານຸວົງ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ຜົນສຳເລັດ ໃນການປະຕິບັດໜ້າທີ່ການທູດ ຢູ່ ສປປ ລາວ ຂອງທ່ານ Jean-Bernard Carasco, ຊຶ່ງໄດ້ປະກອບສ່ວນເພີ່ມພູນຄູນສ້າງ ສາຍພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ອົດສະຕຣາລີ ນັບມື້ແໜ້ນແຟ້ນ ແລະ ເຕີບໃຫຍ່ຂະຫຍາຍຕົວ ເປັນກ້າວໆ ເວົ້າລວມ, ເວົ້າສະເພາະ ແມ່ນສະແດງຄວາມຂອບໃຈ ຕໍ່ການອຳນວຍຄວາມສະດວກ, ສະໜັບສະໜູນ ແລະ ໃຫ້ຊ່ວຍເຫຼືອ ແກ່ ສປປ ລາວ ໃນຫຼາຍດ້ານ ຂອງທ່ານເອກອັກຄະລັດຖະທູດ ກໍ່ຄືລັດຖະບານ ແຫ່ງ ອົດສະຕຣາລີ ໃນໄລຍະຜ່ານມາ ໂດຍສະເພາະ ການສ້າງນິຕິກຳ ໃນຂົງເຂດພະລັງງານ ແລະ ບໍ່ແຮ່, ການສະໜອງຂໍ້ມູນຂ່າວສານ, ການຊ່ວຍເຫຼືອທາງ​ດ້ານ​ການ​ສຶກ​ສາ ແລະ ສາ​ທາ​ລະ​ນະ​ສຸກ, ການ​ແກ້​ໄຂ​ບັນ​ຫາຜົນ​ກະ​ທົບ​ຈາກ​ໄພ​ພິ​ບັດ, ການປະ​ກ​າດ​ໃຫ້​ການ​ຊ່ວຍ​ເຫຼືອ​ແກ້​ໄຂບ​ັນ​ຫາ​ການ​ແຜ່​ລະ​ບາດ​ຂອງພະຍາດ ໂຄວິດ-19 ແລະ ອື່ນໆ. ນອກຈາກນັ້ນ ຍັງໄດ້ສະເໜີ ​ລັດຖະບານອົດສະຕຣາລີ ໃນການສືບ​ຕໍ່​ໃຫ້​ທຶນ​ການ​ສຶກ​ສາ ແລະ ແລກປ່ຽນຊາວ​ໜຸ່ມ, ນັກສຶກສາ ລາວ-ອົດສະຕຣາລີ ໃຫ້ຫຼາຍຂຶ້ນ. ໃນຕອນທ້າຍ ກໍ່ໄດ້ອວຍພອນ ໃຫ້ທ່ານເອກອັກຄະລັດຖະທູດ ເດີນທາງກັບປະເທດດ້ວຍຄວາມສະຫວັດດີພາບ ແລະ ສືບຕໍ່ປະຕິບັດສຳເລັດໜ້າທີ່ໃໝ່ ທີ່ຈະໄດ້ຮັບການມອບໝາຍ ໃນຕໍ່ໜ້າ ໃຫ້​ໄດ້​ຮັບ​ຜົນ​ສຳ​ເລັດ​ເປັນ​ຢ່າງ​ດີ.
ໃນໂອກາດດຽວກັນ, ທ່ານເອກຄະລັດຖະທູດ ໄດ້ສະແດງຄວາມຂອບໃຈ ຕໍ່ທ່ານລັດຖະມົນຕີປະຈຳສຳນັກງານນາຍົກ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນ ໃນຄັ້ງນີ້, ລວມທັງ ການພົວພັນ, ການອຳນວຍຄວາມສະດວກ ແລະ ຊ່ວຍເຫຼືອ ຕະຫຼອດໄລຍະທີ່ປະຕິບັດໜ້າທີ່ການທູດ ຢູ່ ສປປ ລາວ ຂອງທ່ານເອກຄະລັດຖະທູດ ເຮັດໃຫ້ມີຜົນສຳເລັດຕາມຄາດໝາຍທີ່ວາງໄວ້.