ວັນທີ 25 ກັນຍາ 2024 ນີ້, ທີ່ສະໂມສອນໃຫຍ່ຂອງຫ້ອງວ່າການແຂວງຫຼວງພະບາງ, ທ່ານ ຄໍາເຈນ ວົງໂພສີ ລັດຖະມົນຕີ ປະຈໍາສໍານັກງານ ນາຍົກລັດຖະມົນຕີ ໄດ້ເຮັດວຽກຮ່ວມກັບການນຳແຂວງຫຼວງພະບາງ, ມີ ທ່ານ ບຸນເຫຼືອ ສິນໄຊວໍຣະວົງ ຮອງເຈົ້າແຂວງຫຼວງພະບາງ, ພ້ອມດ້ວຍ ການນໍາຂັ້ນແຂວງ-ເມືອງ ເຂົ້າຮ່ວມ.
ທ່ານ ບຸນເຫຼືອ ສິນໄຊວໍຣະວົງ ໄດ້ລາຍງານ ວ່າ: ການຈັດຕັ້ງຜັນຂະຫຍາຍມະຕິວ່າດ້ວຍການສ້າງເສດຖະກິດ ເອກະລາດເປັນເຈົ້າຕົນເອງໃນໄລຍະໃໝ່, ໄດ້ແຕ່ງຕັ້ງຄະນະສະເພາະກິດ ຮັບຜິດຊອບແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ ບັນຫາເງິນເຟີ້, ອັດຕາແລກປ່ຽນເງິນຕາດລາຄາສິນຄ້າ ແລະໜີ້ສິນຕ່າງປະເທດ, ການແບ່ງຄວາມຮັບຜິດຊອບໃນການຈັດຕັ້ງປະຕິບັດວຽກງານຕາມແຕ່ລະຂົງເຂດ, ຜ່ານການຈັດຕັ້ງປະຕິບັດໃນໄລຍະ 9 ເດືອນປີ 2024 ແຂວງຫຼວງພະບາງ ສ້າງລາຍຮັບທັງໝົດ ສູນກາງ ແລະ ທ້ອງຖິ່ນໄດ້ຫຼາຍກວ່າ 711 ຕື້ກີບ, ເທົ່າກັບ 104.37% ຂອງແຜນການປີ.
ສ່ວນລາຍຈ່າຍ ປະຕິບັດໄດ້ຫຼາຍກວ່າ 557 ຕື້ກີບ, ເທົ່າກັບ 71.92% ຂອງແຜນ ການປີ. ຄາດຄະເນການຈັດຕັ້ງປະຕິບັດລາຍຮັບພູດ ທ້ອງຖິ່ນ ທ້າຍປີ ຈະສູ້ຊົນເກັບລາຍຮັບທ້ອງຖິ່ນ ໃຫ້ໄດ້ຫຼາຍກວ່າ 816 ຕື້ກີບ ຫຼື ເທົ່າກັບ 125.59% ຂອງແຜນປີ (ລື່ນແຜນຫຼາຍກວ່າ 166 ຕື້ກີບ).
ໃນໂອກາດນີ້ ທ່ານ ຄໍາເຈນ ວົງໂພສີ ໄດ້ມີຄໍາເຫັນເຈາະຈີ້ມ ກ່ຽວກັບການຜະລິດ-ປຸງແຕ່ງ ເພື່ອຊົມໃຊ້ພາຍໃນ ແລະສົ່ງອອກ; ການນຳເຂົ້າ-ສົ່ງອອກ; ການບໍລິການການຂົນສົ່ງ-ໂດຍສານ ແລະການບໍລິການທ່ອງທ່ຽວ; ການພັດທະນາ ແລະຄຸ້ມຄອງແຮ່ທາດປະເພດຕ່າງໆ; ການສົ່ງເສີມ ແລະຄຸ້ມຄອງການລົງທຶນໃນທຸກຂົງເຂດ ລວມທັງຢູ່ເຂດເສດຖະກິດພິເສດ; ການສ້າງຖານລາຍຮັບ; ການຂຸດຄົ້ນລາຍຮັບ ຕິດພັນກັບການຄຸ້ມຄອງລາຍຈ່າຍ ລວມທັງການຕ້ານການຟູມເຟືອຍ; ການຄຸ້ມຄອງເງິນ ຕາ, ອັດຕາແລກປ່ຽນເງິນຕາ, ການດັດສົມຫົວໜ່ວຍແລກປ່ຽນເງິນຕາທີ່ມີຢູ່ປັດຈຸ ບັນ; ການຄຸ້ມຄອງຮ້ານຊື້-ຂາຍ ຄຳ; ສະພາບການລັກລອບຊື້-ຂາຍ ສິນຄ້າ ລວມທັງການລັກລອບນຳເຂົ້າ-ສົ່ງອອກທຸກປະເພດ; ການສະຫຼຸບຕີລາຄາເບື້ອງຕົ້ນວຽກງານແຕ່ລະດ້ານ ທັງທຽບໃສ່ຄາດໝາຍສູ້ຊົນ ທີ່ລັດຖະບານກໍຄືທ້ອງຖິ່ນວາງອອກ ໃນປີ 2024 ກໍຄືແຜນ 05 ປີ ຄັ້ງທີ IX, ທັງກຳນົດທິດທາງ, ແຜນການ ແລະມາດຕະການທີ່ຈະປະຕິບັດໃນຕໍ່ໜ້າ ໂດຍໃຫ້ສອດຄ່ອງກັບສະພາບຂໍ້ມູນໃນທີ່ຜ່ານມາລວມທັງຜົນກະທົບຈາກໄພພິບັດທາງທຳມະຊາດ ປີ 2024 ນີ້.
ສິ່ງສໍາຄັນແມ່ນຂໍ້ມູນຕ້ອງໃກ້ກັບສະພາບຕົວຈິງຂອງແຕ່ລະທ້ອງຖິ່ນ ໂດຍມີການເຂົ້າຮ່ວມຂອງອົງການປົກຄອງຂັ້ນເມືອງ-ນະຄອນ, ຫົວໜ່ວຍວິຊາການຂັ້ນທ້ອງຖິ່ນ ແລະພາກສ່ວນເສດຖະກິດ.
ໂອກາດທີ່ມາເຄື່ອນໄຫວເຮັດວຽກໃນຄັ້ງນີ້ ທ່ານ ຄໍາເຈນ ວົງໂພສີ ໄດ້ມອບເງິນສົດ ຈໍານວນ 50 ລ້ານກີບ ໃຫ້ກັບອົງການປົກ ຄອງແຂວງຫຼວງພະບາງ ເພື່ອປະ ກອບສ່ວນຮັບໃຊ້ວຽກງານຂອງແຂວງ ຕື່ມອີກ.
ຂ່າວ-ພາບ: ທະນູສີນ ອິດທິພົນ
