ໃນວັນທີ 24 ພຶດສະພາ 2024, ທ່ານ ໄພວີ ສີບົວລິພາ ກໍາມະການສູນກາງພັກ, ລັດຖະມົນຕີ ກະຊວງຍຸຕິທໍາ ພ້ອມດ້ວຍຄະນະ ໄດ້ລົງເຄື່ອນໄຫວວຽກງານ ຢູ່ ແຂວງ ອຸດົມໄຊ ໂດຍໄດ້ເຂົ້າພົບ ທ່ານ ບຸນຄົງ ຫຼ້າຈຽມພອນ ກໍາມະການສໍາຮອງສູນກາງພັກ, ເຈົ້າແຂວງ ອຸດົມໄຊ ແລະ ໄດ້ແຈ້ງສະພາບລວມການປະຕິບັດໜ້າທີ່ຂອງຂະແໜງການຍຸຕິທໍາ ພ້ອມນັ້ນ ໄດ້ປຶກສາຫາລື ແລກປ່ຽນຄໍາຄິດເຫັນກ່ຽວກັບການຈັດຕັ້ງປະຕິບັດວຽກງານ ຂະແໜງຍຸຕິທໍາພາຍໃນແຂວງ ໂດຍສະເພາະແມ່ນວຽກງານຍຸຕິທໍາຮາກຖານ, ປະຕິບັດຄໍາຕັດສີນຂອງສານ, ທະນາຍຄວາມ ແລະ ການບໍລິການວຽກງານຍຸຕິທໍາ.
ຈາກນັ້ນ, ທ່ານລັດຖະມົນຕີ ໄດ້ລົງພົບປະ ແລະ ຊີ້ນໍາວຽກງານ ຢູ່ພະແນກຍຸຕິທໍາ ແຂວງ ອຸດົມໄຊ ໂດຍການຕ້ອນຮັບຂອງ
ທ່ານ ສອນສຸວັນ ປັນຍາວົງ, ກໍາມະການພັກແຂວງ, ຫົວໜ້າພະແນກຍຸຕິທໍາແຂວງ ແລະ ຄະນະ.
ໃນກອງປະຊຸມ ທ່ານຫົວໜ້າພະແນກຍຸຕິທໍາ ແຂວງ ອຸດົມໄຊ ໄດ້ລາຍງານສະພາບການເຄື່ອນໄຫວວຽກງານຍຸຕິທໍາ ໄລຍະ 5 ເດືອນຜ່ານມາ, ການປະກອບຄໍາເຫັນຂອງບັນດາຫົວໜ້າຂະແໜງ, ຫ້ອງການຍຸຕິທໍາເມືອງ ແລະ ທະນາຍຄວາມ.
ໂອກາດນີ້, ທ່ານ ລັດຖະມົນຕີ ກະຊວງຍຸຕິທໍາ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສໍາເລັດ ທີ່ພະແນກຍຸຕິທໍາ ກໍຄືຫ້ອງການຍຸຕິທໍາບັນດາເມືອງ ຍາດມາໄດ້ ພ້ອມທັງຊີ້ນໍາໃຫ້ເອົາໃຈໃສ່ຄົ້ນຄ້ວາເຊື່ອມຊຶມ, ກໍາແໜ້ນແນວທາງນະໂຍບາຍຂອງພັກ, ກົດໝາຍຂອງລັດ, ເອົາໃຈໃສ່ສຶກສາອົບຮົມການເມືອງນໍາພາແນວຄິດ ເພື່ອເຮັດໃຫ້ພະນັກງານ ມີຄວາມອຸ່ນອ່ຽງທຸ່ນທ່ຽງ, ເຊື່ອໝັ້ນຕໍ່ການນໍາພາຂອງພັກ ກໍຄືຕໍ່ອົງຄະນະພັກກະຊວງ, ແຂວງ ແລະ ເມືອງ, ເອົາໃຈໃສ່ປັບປຸງແບບແຜນວິທີເຮັດວຽກ ໃຫ້ຖືກຕ້ອງສອດຄ່ອງ, ພ້ອມກັນປະຕິບັດພາລະບົດບາດ ໜ້າທີ່ການເມືອງຂອງຕົນ ໃຫ້ບັນລຸຕາມລະດັບຄາດໝາຍ ໂດຍສະເພາະແມ່ນວຽກງານປະຕິບັດຄໍາຕັດສິນຂອງສານ ຕ້ອງປະຕິບັດຕາມຄໍາແນະນໍາຂອງລັດຖະມົນຕີ ທີ່ກໍານົດອອກແຕ່ລະສະບັບໃຫ້ມີປະສິດຕິຜົນ, ຮີບຮ້ອນກວດກາຄືນຄໍາຕັດສີນອາຍາ, ການປະຕິ ບັດໂທດປັບໃໝ, ອາກອນຂອງລັດ, ຊັບສິ່ງຂອງທີ່ສານຕັດສິນຮິບເປັນຂອງລັດ ເພື່ອມອບໃຫ້ຂະແໜງຄຸ້ມຄອງຊັບສິນໃຫ້ທັນເວລາ, ເພີ່ມທະວີໃນການຄຸ້ມຄອງ ກວດກາການເຄື່ອນໄຫວຂອງທະນາຍຄວາມພາຍໃນແຂວງ ໃຫ້ຖືກຕ້ອງຕາມກົດໝາຍ, ມີຄວາມໂປ່ງໃສ, ພ້ອມທັງກໍ່ສ້າງໃຫ້ເປັນມືອາຊີບ, ມີຈັນຍາບັນ, ຈັນຍາທໍາ, ເປັນທະນາຍຄວາມຂອງພັກ-ລັດ, ຮັບໃຊ້ປະຊາຊົນດ້ວຍຄວາມບໍລິສຸດສັດຊື່, ໄປຄຽງຄູ່ກັບເດັດຂາດແກ້ໄຂບັນຫາການ ເຄື່ອນໄຫວ ທີ່ບໍ່ຖືກຕ້ອງຂອງທະນາຍຄວາມ.
