ຕອນເຊົ້າວັນທີ 29 ພຶດສະພາ 2024, ທີ່ຫ້ອງຮັບແຂກກະຊວງຍຸຕິທໍາ ທ່ານ ໄພວີ ສີບົວລິພາ ລັດຖະມົນຕີ ກະຊວງຍຸຕິທໍາ ໄດ້ຕ້ອນຮັບທ່ານ Bakhodir BURKHANOV ໃນໂອກາດທີ່ມາດໍາລົງຕໍາແໜ່ງ ເປັນຜູ້ປະສານງານອົງການສະຫະປະຊາຊາດ ປະຈໍາ ສປປ ລາວ.
ໃນໂອກາດນີ້, ທ່ານ ລັດຖະມົນຕີ ກະຊວງຍຸຕິທໍາ ກໍໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ທ່ານ Bakhodir BURKHANOV ທີ່ໄດ້ມາຮັບໜ້າທີ່ໃໝ່ ເປັນຜູ້ປະສານງານອົງ ການສະຫະປະຊາຊາດ ປະຈໍາ ສປປ ລາວ, ພ້ອມນັ້ນ ກໍສະແດງຄວາມຂອບອົກຂອບໃຈ ຢ່າງຈິງໃຈ ຕໍ່ອົງການສະຫະປະຊາຊາດ ທີ່ໄດ້ໃຫ້ການສະໜັບສະໜູນ, ຊ່ວຍເຫຼືອ ສປປ ລາວ ເວົ້າລວມ, ເວົ້າສະເພາະຂະແໜງການຍຸຕິທໍາໃນດ້ານຕ່າງໆໄລຍະຜ່ານມາ ພ້ອມນີ້ໄດ້ແຈ້ງສະພາບການເຄື່ອນໄຫວວຽກງານຂອງຂະແໜງ ການຍຸຕິທໍາ, ການສ້າງລັດທີ່ປົກຄອງດ້ວຍກົດໝາຍ, ການບໍລິ ການວຽກງານຍຸຕິທໍາ ແລະ ການເຂົ້າເຖິງຄວາມຍຸຕິທໍາ, ການສ້າງຄວາມເຂັ້ມແຂງໃຫ້ທະນາຍຄວາມ ຊຶ່ງເປັນວຽກງານໜຶ່ງທີ່ນອນຢູ່ໃນການສະໜັບສະໜູນຂອງອົງການສະຫະປະຊາຊາດ.
ທ່ານ Bakhodir BURKHANOV ໄດ້ສະແດງຄວາມຂອບໃຈ ຕໍ່ທ່ານ ລັດຖະມົນຕີ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະ ໄດ້ຢັ້ງຢືນເຖິງບັນດາເປົ້າໝາຍວຽກງານ ທີ່ຈະສືບຕໍ່ຈັດຕັ້ງປະຕິບັດ, ພ້ອມນັ້ນ ທ່ານ ລັດຖະມົນຕີ ແລະ ທ່ານ Bakhodir BURKHANOV ຍັງໄດ້ແລກປ່ຽນຄໍາເຫັນກ່ຽວກັບການຮ່ວມມືໃນຕໍ່ໜ້າ.
ທ່ານ ລັດຖະມົນຕີ ຍັງໄດ້ສະແດງຄວາມເຊື່ອໝັ້ນວ່າ ທ່ານ Bakhodir BURKHANOV ຈະສືບຕໍ່ເສີມຂະຫຍາຍການຈັດຕັ້ງປະຕິບັດແຜນງານ, ໂຄງການຕ່າງໆ ທີ່ຈັດຕັ້ງປະຕິບັດໃນປັດຈຸບັນ ແລະ ແຜນການໃນຕໍ່ໜ້າ ຊຶ່ງເປັນການເພີ່ມທະວີການ ຮ່ວມມື ແລະ ສືບຕໍ່ໃຫ້ການສະໜັບສະໜູນ ສປປ ລາວ ໄດ້ຮັບການພັດທະນາຢ່າງມີປະສິດຕິຜົນ, ເວົ້າສະເພາະຂະແໜງການຍຸຕິທໍາ ໃນການຈັດຕັ້ງປະຕິບັດບັນດາວຽກງານຕາມແຜນການຮ່ວມມື.
ທີ່ມາ: ນັກຂ່າວກະຊວງ ຍຸຕິທຳ
