ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ຊີ້ແຈ້ງຄຳຊັກຖາມຂອງສະພາແຫ່ງຊາດ ຢູ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ໃນວັນທີ 13 ມິຖຸນາ 2024 ວ່າ: ການສົ່ງເສີມການສົ່ງອອກ ຈະເຮັດໄດ້ກໍຕໍ່ເມື່ອມີສິນຄ້າ, ມີປະລິມານພຽງພໍ, ມີຄຸນນະພາບ, ມີລາຄາທີ່ເໝາະສົມ ແລະ ມີຄວາມຕ້ອງຂອງຕະຫລາດ.
ເພື່ອທົດແທນການນຳເຂົ້າ ກະຊວງອຸດສາຫະກຳ ແລະ ການຄ້າ ໄດ້ກຳນົດຈຸດສຸມ ແລະ ສົ່ງເສີມການຜະລິດສິນຄ້າຕາມທ່າແຮງຂອງເຂດແຄວ້ນ ແລະ ທ້ອງຖິ່ນ ໃຫ້ສາມາດແຂ່ງຂັນກັບສິນຄ້ານຳເຂົ້າ, ສິນຄ້າຂອງປະເທດເພື່ອນບ້ານ ແລະ ຂອງຕະຫລາດເປົ້າໝາຍ; ປະສານສົມທົບກັບຂະແໜງການ ແລະ ອົງການປົກຄອງທ້ອງຖິ່ນ ສ້າງຖານຂໍ້ມູນສິນຄ້າ ທີ່ຜະລິດໄດ້ທັງແຫລ່ງຜະລິດ, ປະລິມານ, ຄຸນນະພາບ ແລະ ລາຄາ; ເຈລະຈາເປີດຕະຫລາດສິນຄ້າທີ່ປະເທດເຮົາມີທ່າແຮງ ໂດຍສະເພາະເຈລະຈາເປີດຕະຫລາດ ໃນສອງດ້ານ ຄື: ດ້ານພາສີ ແລະ ດ້ານເຕັກນິກ (ສຸຂານາໄມພືດ-ສັດ/SPS); ປັບປຸງຂັ້ນຕອນ ແລະ ນິຕິກໍາທີ່ກ່ຽວຂ້ອງໃຫ້ທັນສະພາບການ ແລະ ສາມາດອຳນວຍຄວາມສະດວກໃຫ້ການຄ້າຂາຍ, ການສົ່ງອອກສິນຄ້າ, ຫລຸດຜ່ອນຂອດຂັ້ນທີ່ບໍ່ຈໍາເປັນ; ສົ່ງເສີມການພົບປະ ແລະ ເຮັດວຽກຮ່ວມ ລະ ຫວ່າງ ສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ສະພາການຄ້າ ຂອງປະເທດຄູ່ຄ້າ ເພື່ອສຶກສາທ່າແຮງ, ຈັບຄູ່ທຸລະກິດ ແລະ ສົ່ງເສີມການຄ້າ ແລະ ການລົງທຶນຮ່ວມກັນ.
ທ່ານ ມະໄລທອງ ກົມມະສິດ ກ່າວຕື່ມວ່າ: ພ້ອມນີ້ ຕ້ອງສົ່ງເສີມການເຂົ້າຮ່ວມງານວາງສະແດງສິນຄ້າ ທັງພາຍໃນ ແລະ ຕ່າງປະເທດເພື່ອໂຄສະນາສິນຄ້າ ແລະ ສ້າງໂອກາດໃຫ້ສິນຄ້າລາວ ເປັນທີ່ຮູ້ຈັກຂອງຕ່າງປະເທດ; ຄົ້ນຄວ້າ ແລະ ນໍາໃຊ້ໂອກາດ ຈາກການເຂົ້າຮ່ວມພາຄີການຄ້າ ຂອງພາກພື້ນ ເປັນຕົ້ນ ໃນຂອບອາຊຽນ, ອາຊຽນບວກ ແລະ ອາເຊັບ ເພື່ອເປີດຕະຫລາດສິນຄ້າລາວໃຫ້ກວ້າງອອກ; ເປີດສູນວາງສະແດງສິນຄ້າລາວ ຢູ່ຕ່າງປະເທດ ຕາມເງື່ອນໄຂທີ່ເປັນໄປໄດ້ ແລະ ອື່ນໆ.
