ທ່ານ ງາມປະສົງ ເມືອງມະນີ ລັດຖະມົນຕີ ກະຊວງໂຍທາທິ ການ ແລະ ຂົນສົ່ງ (ຍທຂ) ໄດ້ຕ້ອນຮັບການເຂົ້າຢ້ຽມພົບປະ ຂອງ ທ່ານ ທິມໂມຕີ ອາມສະຕຣອງ ຜູ້ຕາງໜ້າ ອົງການອະນາໄມໂລກ ປະຈຳ ສປປ ລາວ ຄົນໃໝ່ ເມື່ອບໍ່ດົນມານີ້.
ໃນໂອກາດດັ່ງກ່າວ, ທ່ານ ງາມປະສົງ ເມືອງມະນີ ໄດ້ສະແດງຄວາມຍິນດີຕ້ອນຮັບ ແລະ ສະ ແດງຄວາມຊົມເຊີຍຕໍ່ ທ່ານ ທິມໂມຕີ ອາມສະຕຣອງ ທີ່ໄດ້ຖືກແຕ່ງຕັ້ງໃຫ້ມາດໍາລົງຕຳແໜ່ງເປັນຜູ້ຕາງ ໜ້າອົງການອະນາໄມໂລກ ປະຈຳ ລາວ ຄົນໃໝ່ ແລະ ອວຍ ພອນໃຫ້ປະສົບຜົນສໍາເລັດໃນການຈັດຕັ້ງປະຕິບັດໜ້າທີ່ ຢູ່ ສປປ ລາວ ພ້ອມທັງສະແດງຄວາມຂອບໃຈ ແລະ ຕີລາຄາສູງຕໍ່ການຮ່ວມມື ລະ ຫວ່າງ ສປປ ລາວ ແລະ ອົງການອະນາໄມໂລກ ໃນໄລຍະຜ່ານມາ. ພ້ອມດຽວກັນນັ້ນ, ທ່ານ ງາມປະ ສົງ ເມືອງມະນີ ໄດ້ສະແດງຄວາມຂອບໃຈຕໍ່ອົງການອະນາໄມໂລກ ທີ່ໃຫ້ ການຊ່ວຍເຫຼືອ ສປປ ລາວ ກໍຄືກະຊວງ ຍທຂ ໂດຍສະເພາະວຽກງານທາງດ້ານໂຄສະນາຄວາມປອດໄພທາງຖະໜົນ, ການສ້າງແຜນນໍ້າປະປາປອດໄພ ທີ່ມີຄວາມທົນທານຕໍ່ການປ່ຽນແປງດິນຟ້າອາກາດ ໃຫ້ແກ່ຂະແໜງການນໍ້າປະປາ ໃນບັນດາຕົວເມືອງໃນຂອບເຂດທົ່ວປະເທດ.
ທ່ານ ທິມໂມຕີ ອາມສະຕຣອງ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງ ທ່ານລັດຖະມົນຕີ ກະຊວງ ຍທຂ ແລະ ມີຄວາມປິຕິຍິນດີ ທີ່ໄດ້ຮັບມອບໝາຍເປັນຜູ້ຕາງໜ້າໃຫ້ອົງການອະນາໄມໂລກ ປະຈຳ ລາວ. ພ້ອມດຽວກັນນີ້, ທ່ານ ທິມໂມຕີ ອາມສະຕຣອງ ຈະໄດ້ສືບຕໍ່ຊຸກຍູ້ໃນການສະໜັບສະໜູນ- ຮ່ວມມື ກັບ ກະຊວງ ຍທຂ ກ່ຽວກັບການພັດທະນານະໂຍບາຍດ້ານຄວາມປອດໄພທາງຖະໜົນ ແລະ ຂະຫຍາຍວຽກງານແຜນນໍ້າປະປາປອດໄພ ແລະ ການສ້າງຄວາມເຂັ້ມແຂງໃຫ້ແກ່ຂະ
ແໜງໂຍທາທິການ ແລະ ຂົນສົ່ງ ໃຫ້ນັບມື້ນັບມີການພັດທະນາຂຶ້ນເລື້ອຍໆ.
(ຂ່າວ-ພາບ: ຍທຂ)
