ໃນວັນທີ 11 ກໍລະກົດ 2024 ນີ້, ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບອຳລາ ຂອງ ທ່ານ ນາງ ອີນາ ມາຊີຄູ ລີໂອນິດ (Ina MARCIULIONYTE) ເອກອັກຄະລັດຖະທູດສະຫະພາບເອີ ຣົບ (ອີຢູ) ປະຈຳ ສປປ ລາວ ໃນໂອກາດສຳເລັດການປະຕິບັດໜ້າທີ່ການທູດ ຢູ່ ສປປ ລາວ.
ໃນໂອກາດນີ້, ທ່ານ ນາງ ສວນສະຫວັນ ວິຍະເກດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍມາຍັງ ທ່ານ ນາງ ອີນາ ມາຊີຄູ ລີໂອນິດທີ່ໄດ້ປະຕິບັດໜ້າທີ່ ຢູ່ ສປປ ລາວ ດ້ວຍຜົນສຳເລັດ, ປະກອບສ່ວນສຳຄັນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ ລະຫວ່າງ ສປປ ລາວ-ອີຢູ ໃນໄລຍະຜ່ານມາ, ຊ່ວຍຊຸກຍູ້ການພົວພັນຮ່ວມມືໃນຂົງເຂດຕ່າງໆຢ່າງຕັ້ງໜ້າ ໂດຍສະເພາະຂະແໜງບຸລິມະສິດຂອງແຜນພັດທະນາເສດຖະກິດ- ສັງຄົມແຫ່ງຊາດໃນໄລຍະຜ່ານມາຮອດປັດຈຸບັນ ເປັນຕົ້ນ ການພັດທະນາໃນວຽກງານການສຶກສາຂັ້ນພື້ນຖານ, ໂພຊະນາການ, ການຄໍ້າປະກັນດ້ານສະບຽງອາຫານ, ສື່ມວນຊົນ ແລະ ອື່ນໆ ເຊິ່ງໄດ້ປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ.
ທ່ານລັດຖະມົນຕີ ຍັງໄດ້ອວຍພອນໃຫ້ ທ່ານທູດອີຢູ ເດີນທາງກັບຄືນປະເທດດ້ວຍຄວາມສະຫວັດດີພາບ, ປະສົບຜົນສຳເລັດໃນໜ້າທີ່ວຽກງານໃໝ່ ແລະ ສະເໜີໃຫ້ທ່ານທູດ ສືບຕໍ່ເປັນຂົວເຊື່ອມຕໍ່ມິດຕະພາບທີ່ດີງາມ ລະຫວ່າງ ສປປ ລາວ ແລະ ອີຢູ ໃຫ້ນັບມື້ໄດ້ຮັບການຂະຫຍາຍຕົວຍິ່ງໆຂຶ້ນ.
ທ່ານທູດອີຢູ ໄດ້ສະແດງຄວາມຂອບໃຈ ທີ່ໄດ້ມີໂອກາດເຂົ້າຢ້ຽມອຳລາ ທ່ານລັດຖະມົນຕີ ກະຊວງ ຖວທ ແລະ ຕີລາຄາສູງຕໍ່ການພົວພັນຮ່ວມມືລະຫວ່າງ ອີຢູ ແລະ ສປປ ລາວ ໃນໄລຍະທີ່ຜ່ານມາ, ພ້ອມທັງສະແດງຄວາມຂອບໃຈຕໍ່ພັກ, ລັດຖະບານລາວ ທີ່ໄດ້ໃຫ້ການສະໜັບສະໜູນຊ່ວຍເຫລືອຕົນເອງ ຕະຫລອດໄລຍະປະຕິບັດໜ້າທີ່ການທູດຢູ່ ສປປ ລາວ ຈົນໄດ້ຮັບຜົນສຳເລັດຈົບງາມ.
ຂ່າວ-ພາບ: ກິດຕາ
