ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ລັດຖະມົນຕີ ກະຊວງ ຖວທ ພົບປະໂອ້ລົມພະນັງານອາວຸໂສບໍານານ

ລັດຖະມົນຕີ ກະຊວງ ຖວທ ພົບປະໂອ້ລົມພະນັກງານອາວຸໂສບໍານານ ອ້ອມຂ້າງກະຊວງ ຖະແຫລງຂ່າວ ວັດທະນະທໍາແລະທ່ອງທ່ຽວ ໃນຕອນເຊົ້າວັນທີ 29 ພະຈິກ 2019 ທີ່ຫໍວັດທະນະທໍາແຫ່ງຊາດ ນະຄອນຫລວງວຽງຈັນ, ໂດຍໃຫ້ກຽດໂອ້ລົມຂອງທ່ານ ກິແກ້ວ ໄຂຄໍາພິທູນ ລັດຖະມົນຕີກະຊວງ ຖວທ , ມີຮອງລັດຖະມົນຕີ , ພະນັກງານສະມາຊິກພັກ, ຫົວໜ້າກົມ, ຮອງກົມ, ຄະນະນໍາຂະແໜງການທີ່ກ່ຽວຂ້ອງ ພ້ອມດ້ວຍພະນັກງານບໍານານອາວຸໂສ ອ້ອມຂ້າງກະຊວງ ຖວທ ເຂົ້າຮ່ວມຮັບຟັງ.

ທ່ານ ກິແກ້ວ ໄຂຄໍາພິທູນ ລັດຖະມົນຕີກະຊວງ ຖວທ ມີຄໍາເຫັນວ່າ: ຈຸດປະສົງຂອງການພົບປະໂອ້ລົມພະນັກງານບໍານານອາວຸໂສ ຂອງກະຊວງ ຖວທ ຄັ້ງນີ້ ເພື່ອພົບປະແລກປ່ຽນຄວາມຄິດຄວາມເຫັນຂອງຄະນະພັກ, ຄະນະນໍາກະຊວງ, ອາດີດການນໍາ, ພະນັກງານອາວຸໂສບໍານານ, ພະນັກງານຫລັກແຫລ່ງຂອງກະຊວງ ເພື່ອຈະໄດ້ນໍາເອົາຄວາມຄິດເຫັນຕ່າງໆໄປພັດທະນາ, ປັບປຸງ, ຍົກລະດັບວຽກງານກໍຄືເຮັດໃຫ້ວຽກງານຂອງກະຊວງ ຖວທ ເຕີບໃຫ່ຍເຂັ້ມແຂງຂຶ້ນໄປເລື້ອຍໆ.

ທ່ານ ກິແກ້ວ ໄຂຄໍາພິທູນ ລັດຖະມົນຕີກະຊວງ ຖວທ ຍັງໄດ້ຮຽກຮ້ອງໃຫ້ຄະນະພັກ, ຄະນະນໍາກະຊວງ ແລະບັນດາອາດີດການນໍາ, ພະນັກງານອາວຸໂສບໍານານ, ພະນັກງານຫລັກແຫ່ລງຂອງກະຊວງ ຈົ່ງພ້ອມກັນມີຄໍາເຫັນຕໍ່ບັນຫາສໍາຄັນຂອງຊາດ ໂດຍສະເພາະແມ່ນສະພາບລວມ ການພັດທະນາເສດຖະກິດສັງຄົມຂອງປະເທດເຮົາ, ການຈັດຕັ້ງປະຕິບັດວຽກງານຂອງກະຊວງ ຖວທ ລວມທັງການຈັດຕັ້ງປະຕິບັດນະໂຍບາຍຕໍ່ພະນັກງານບໍານານແລະວຽກງານອື່ນໆ.

ຜ່ານການຮັບຟັງຄໍາຄິດຄໍາເຫັນຈາກຜູ້ເຂົ້າຮ່ວມ  ທ່ານກິແກ້ວ ໄຂຄໍພິທູນ  ມີຄໍາເຫັນວ່າ  ພະນັກງານອາວຸໂສບໍານານ ເຊິ່ງເປັນຜູ້ເສຍສະຫລະເລືອດເນື້ອເຫື່ອແຮງ, ອຸທິດຕົນໃຫ້ແກ່ພາລະກິດປະຕິວັດຊາດ ມີໂອກາດໄດ້ຮັບຟັງຄໍາຄິດຄໍາເຫັນ, ຄໍາແນະນໍາ, ຂໍ້ສະເໜີ ບັນຫາຕ່າງໆທີ່ສໍາຄັນຂອງຊາດ ໂອກາດນີ້ ທ່ານໄດ້ສະແດງຄວາມຂອບໃຈຕໍ່ຄໍາຄິດຄໍາເຫັນທີ່ຫລາກຫລາຍ ແລະເປັນປະໂຫຍດ ຕໍ່ການປັບປຸງວຽກງານຂອງກະຊວງ ຖວທ ທັງໝົດນັ້ນຍ້ອນຄວາມຮັບຜິດຊອບ, ຄວາມເປັນຫ່ວງເປັນໄຍຂອງບັນດາພະນັກງານອາວຸໂສບໍານານ ທີ່ມີຕໍ່ປະເທດຊາດບ້ານເມືອງ.