ວັນທີ 21 ພຶດສະພາ 2024 ນີ້, ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ວະລາດີມີ້ ບາຣ່າວິກໂກບ (UladzimirBaravikou) ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທານະລັດ ເບລາຣຸດຊີ ປະຈຳ ສປປ ລາວ ເຊິ່ງມີສໍານັກງານຕັ້ງຢູ່ ຮ່າໂນ້ຍ, ສສ ຫວຽດນາມ.
ໃນໂອກາດນີ້, ທ່ານ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ສະແດງຄວາມຕ້ອນຮັບ ແລະ ຕີລາຄາສູງ ຕໍ່ກັບສາຍພົວພັນຮ່ວມມືສອງຝ່າຍ ລາວ-ເບລາຣຸດຊີ ເຫັນວ່າມີຜົນສໍາເລັດຫລາຍດ້ານໃນໄລຍະຜ່ານມາ ເປັນຕົ້ນ ການຮ່ວມມືໃນຂົງເຂດຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ເຊິ່ງພົ້ນເດັ່ນແມ່ນ ສອງຝ່າຍໄດ້ຮ່ວມກັນຈັດງານສັບປະວັດທະນະທໍາລາວ ຢູ່ເບລາຣຸດຊີ ປີ 2015 ແລະ ງານສັບປະດາ ວັດທະນະທໍາເບລາຣຸດຊີ ຢູ່ ສປປ ລາວ ປີ 2016. ພ້ອມດຽວກັນ, ທ່ານທູດກໍໄດ້ແຈ້ງຈຸດປະສົງ ເພື່ອແລກປ່ຽນກັບທ່ານລັດຖະມົນຕີໃນຄັ້ງນີ້ ເປັນຕົ້ນ ການສ້າງບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານວັດທະນະທໍາ, ການຈັດງານສັບປະດາວັດທະນະທໍາເບລາຣຸດຊີ ຢູ່ ສປປ ລາວ ແລະ ງານສັບປະດາວັດທະນະທໍາລາວ ຢູ່ ເບລາຣຸດຊີ ໃນປີ 2025, ລວມທັງແຜນການຮ່ວມມືໃນຂົງເຂດຖະແຫລງຂ່າວ ແລະ ທ່ອງທ່ຽວ ຂອງສອງປະເທດ.
ພ້ອມກັນນີ້, ທັງສອງຝ່າຍແມ່ນເຫັນດີເປັນເອກະພາບ ຕໍ່ກັບການປຶກສາຫາລືການພົບປະແລກປ່ຽນໃນຄັ້ງນີ້ ເພື່ອຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ລາວ-ເບລາຣຸດຊີ ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ.
ຂໍ້ມູນຈາກ: ຂປລ.
