ຫວ່າງວັນທີ 23-25 ກຸມພາ 2024 ນີ້ ທ່ານ ອາລຸນໄຊ ສູນນະລາດ ລັດຖະມົນຕີ, ຫົວຫນ້າຫ້ອງວ່າການສໍານັກງານນາຍົກລັດລັດຖະມົນຕີ ພ້ອມດ້ວຍຄະນະ ລົງເຄື່ອນໄຫວຢ້ຽມຢາມ ແລະຊຸກຍູ້ການຜະລິດຢູ່ແຂວງອຸດົມໄຊ ໂດຍ ໄດ້ລົງ ຢ້ຽມຢາມຂົງເຂດການຜະລິດ ຕິດຕາມຊຸກຍູ້ ການເກັບກູ້ພືດລະດູແລ້ງຢູ່ ເມືອງຫຼາ .
ໃຫ້ການຕ້ອນຮັບໂດຍ ທ່ານ ຫຸມພັນ ບຸບຜາຄຳ ເຈົ້າເມືອງໆຫຼາ ພ້ອມດ້ວຍຄະນະ ທີ່ບໍລິສັດຊີຕ້າ, ພ້ອມທັງໄດ້ຮັບຟັງການລາຍງານ ສະພາບການຈັດຕັ້ງປະຕິບັດວຽກງານເກັບກູ້ຜົນຜະລິດພືດລະດູແລ້ງຢູ່ເມືອງຫຼາ , ເຊີ່ງມາຮອດປະຈຸບັນ ການເກັບກູ້ຜົນຜະລິດຢູ່ພາຍໃນເມືອງແມ່ນສຳເລັດເປັນສ່ວນຫຼາຍ ໂດຍສະເພາະການເກັບກ່ຽວເຂົ້ານາແຊງ, ຜັກບົ່ວ, ຜັກທຽມ, ຖົ່ວເບີ, ສາລີຫວານ,ໝາກອຶ ແລະ ຜືດສະນິດອື່ນໆ ລວມທັງໝົດ 16 ບ້ານ ເນື້ອທີ່ປູກທັງໝົດ 200 ເຮັກຕາ, ຈຳນວນ 810 ຄອບຄົວ, ມີ 3 ບໍລິສັດທີ່ເຂົ້າມາສົ່ງເສີມການປູກເຮັດໃຫ້ປະຊາຊົນພາຍໃນເມືອງມີລາຍຮັບຈາກການປູກພືດລະດູແລ້ງຫຼາຍຂຶ້ນ ພ້ອມນີ້ ຄະນະຍັງໄດ້ລົງຢ້ຽມຢາມການປະຕິບັດໜ້າທີ່ວຽກງານຂອງພະນັກງານບໍລິສັດໃນການຄັດແຍກຖົ່ວເບີ ພ້ອມທັງກ່າວຊົມເຊີຍຕໍ່ກັບການນຳເມືອງ ແລະ ບໍລິສັດທີ່ໄດ້ເອົາໃຈໃສ່ເຂົ້າໃນການສົ່ງເສີມປະຊາຊົນປູກພືດລະດູແລ້ງ ເພື່ອສ້າງລາຍຮັບ ເພື່ອຊົດເຊີຍຜົນເສຍຫາຍຈາກໄພພິບັດໃນໄລຍະຜ່ານມາ, ພ້ອມທັງສ້າງວຽກເຮັດງານທຳໃຫ້ແກ່ໄວໜຸ່ມພາຍໃນເມືອງ ຕື່ມອີກ.
ໂດຍ: ແສງອາທິດ
