ໃນຕອນບ່າຍ ວັນທີ 06 ສິງຫາ 2024 ທີ່ຫ້ອງວ່າການແຂວງຫຼວງນ້ຳທາ, ທ່ານ ບົວຄົງ ນາມມະວົງ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນ ຕີ, ຫົວໜ້າກອງເລຂາຄະນະສະເພາະກິດ 19/ກມສພ ພ້ອມດ້ວຍຄະນະ ໄດ້ເຂົ້າພົບ ປະເຮັດວຽກກັບທ່ານ ວຽງສະຫວັດ ສີພັນດອນ, ເຈົ້າແຂວງໆຫຼວງນໍ້າທາ ພ້ອມດ້ວຍຄະນະນໍາ ແລະ ພາກສ່ວນກ່ຽວຂ້ອງຂອງແຂວງ.
ໃນໂອກາດດັ່ງກ່າວ, ທ່ານ ລັດຖະມົນຕີ, ຫົວໜ້າ ຫສນຍ ກໍ່ໄດ້ແຈ້ງຈຸດປະສົງ ໃນການມາເຄື່ອນໄຫວເຮັດວຽກຢູ່ແຂວງຫຼວງນໍ້າທາ ໃນຄັ້ງນີ້ ເພື່ອຕິດຕາມຊຸກຍູ້ການຜັນຂະຫຍາຍ ແລະ ຈັດຕັ້ງປະຕິບັດວຽກງານຂອງຄະນະສະເພາະກິດ 19/ກມສພ ກໍ່ຄື ບັນດານິຕິກຳ ກ່ຽວກັບການແກ້ໄຂບັນຫາເຄັ່ງຮ້ອນທາງດ້ານເສດຖະ ກິດ-ການເງິນ ເປັນຕົ້ນ ບັນຫາເງິນເຟີ້, ອັດຕາແລກປ່ຽນເງິນຕາ, ການຄຸ້ມຄອງລາຄາສິນຄ້າ ແລະ ການແກ້ໄຂບັນໜີ້ສິນ ຕິດພັນກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ. ນອກນີ້, ຍັງຈະໄດ້ເຄື່ອນໄຫວຕິດຕາມ ແລະ ຊຸກຍູ້ ບັນດາຫົວໜ່ວຍການຜະລິດ, ການບໍລິການ, ການທ່ອງທ່ຽວ ແລະ ໂຄງການບູລິມະສິດຂອງລັດຖະບານ ທີ່ຈັດຕັ້ງປະຕິບັດຢູ່ພາຍໃນແຂວງ ຈໍານວນໜຶ່ງ ເພື່ອຊອກຫາດ້ານດີ, ດ້ານອ່ອນ, ຂໍ້ຄົງຄ້າງ ລວມທັງ ບັນດາຂໍ້ສະເໜີ ເພື່ອຈະໄດ້ພ້ອມກັນປຶກສາຫາລື ຊອກຫາຊ່ອງທາງວິທີການແກ້ໄຂບັນຫາຕົວຈິງ.
ໃນໂອກາດດຽວກັນ, ທ່ານ ເຈົ້າແຂວງໆຫຼວງນໍ້າທາ ກໍ່ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ທ່ານ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ທີ່ນຳພາຄະນະ ມາເຄື່ອນໄຫວເຮັດວຽກ ແລະ ຕິດຕາມຊຸກຍູ້ວຽກງານ ຢູ່ແຂວງຫຼວງນໍ້າທາໃນຄັ້ງນີ້ ເພື່ອເຮັດໃຫ້ການຈັດຕັ້ງປະຕິບັດ ການແກ້ໄຂບັນຫາເຄັ່ງຮ້ອນ ທາງດ້ານເສດຖະກິດ-ການເງິນ ໃຫ້ໄດ້ຮັບຜົນສຳເລັດຕາມຄາດ ໝາຍທີ່ກຳນົດໄວ້; ພ້ອມກັນນັ້ນ ຍັງໄດ້ແຈ້ງໃຫ້ຊາບ ກ່ຽວກັບ ສະພາບການພັດທະ ນາເສດຖະກິດ-ສັງຄົມທີ່ພົ້ນເດັ່ນຂອງແຂວງ.
ພາບ ແລະ ຂ່າວ: ກົມປະຊາສຳພັນ, ຫສນຍ
