ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ພ້ອມດ້ວຍຄະນະ ລົງຢ້ຽມຢາມ ແລະ ຕິດຕາມຊຸກຍູ້ການຈັດຕັ້ງປະຕິບັດວຽກງານຂອງບໍລິສັດ ຢົງໄທ້ຢາງພາລາ ຈຳກັດ ຢູ່ເມືອງບຸນໃຕ້, ແຂວງຜົ້ງສາລີ ໃນວັນທີ 27 ມິຖຸນາ 2024 ໂດຍມີການນຳແຂວງ, ເມືອງ ໃຫ້ການຕ້ອນຮັບ ແລະ ເຂົ້າຮ່ວມຕິດຕາມ.
ທ່ານ ຕູເມົາເສີນ ອຳນວຍການ ບໍລິສັດ ຢົງໄທ້ ຢາງພາລາ ຈຳກັດ ໄດ້ລາຍງານວ່າ: ບໍລິສັດຢົງໄທ້ ຢາງພາລາ ຈຳກັດ ໄດ້ດໍາເນີນການເຄື່ອນໄຫວຢູ່ແຂວງຜົ້ງສາລີ ແຕ່ປີ 2006 ເປັນຕົ້ນມາ ແລະ ໄດ້ເລີ່ມສ້າງໂຮງງານປຸງແຕ່ງຢາງພາລາ ແຕ່ປີ 2016 ເຊິ່ງເປັນໂຄງການປູກພືດທົດແທນການປູກຝິ່ນ ໂດຍການລົງທຶນຂອງຕ່າງປະເທດ 100%, ມີທຶນຈົດທະບຽນ 1.912.500 ໂດລາສະຫະລັດ ໃນເບື້ອງຕົ້ນ ແລະ ໄດ້ມີການສົ່ງເສີມປູກໃນຮູບແບບ 2+3, ສໍາປະທານ ແລະ ເກັບຊື້ຢາງ ເພື່ອຜະລິດປຸງແຕ່ງເຄິ່ງສໍາເລັດຮູບ ສົ່ງອອກໄປຍັງ ສປ ຈີນ, ເຊິ່ງມີເນື້ອທີ່ຢາງພາລາທັງໝົດ 7.780 ກວ່າເຮັກຕາ ໃນນີ້, ເນີື້ອທີ່ສຳປະທານຂອງບໍລິສັດມີ 698,76 ເຮັກຕາ, ກວມເອົາ 2 ກຸ່ມບ້ານ ໂດຍສະເລ່ຍໄດ້ຮັບຜົນຜະລິດນໍ້າຢາງ 5.728 ໂຕນຕໍ່ປີ. ນອກຈາກນີ້, ຍັງໄດ້ສົ່ງເສີມປະຊາຊົນທີ່ປູກເອງ ແລະ ເກັບຊື້ຈໍານວນໜຶ່ງ ທັງພາຍໃນແຂວງ ແລະ ຈາກຕ່າງແຂວງ ເພື່ອສະໜອງເຂົ້າໂຮງງານ. ຕົ້ນປີ 2023 ໄດ້ສະເໜີປະກອບເອກະສານ ເພື່ອຂໍອະນຸຍາດດັດແກ້ທະບຽນ ເພື່ອເພີ່ມທຶນ ແລະ ສ້າງຕັ້ງໂຮງງານໃໝ່ຕື່ມ ໃນມູນຄ່າ 50 ກວ່າລ້ານຢວນ, ເພື່ອຮອງຮັບການຜະລິດການປຸງແຕ່ງ ແລະ ຍົກລະດັບໂຮງງານຂຶ້ນ ຕາມທິດຫັນເປັນໂຮງງານອຸດສາຫະກໍາທັນສະໄໝ, ເຊິ່ງປັດຈຸບັນບໍລິສັດກຳລັງສ້າງຕັ້ງໂຮງງານໃໝ່ຍັງບໍ່ທັນສໍາເລັດ 100% ເທື່ອ ຖ້າສ້າງຕັ້ງສໍາເລັດ ຈະມີກໍາລັງການຜະລິດ 2.132 ແຮງມ້າ ແລະ ຄວາມສາມາດໃນການຜະລິດ 30.000 ໂຕນຕໍ່ປີ.
ທ່ານ ຕູເມົາເສີນ ໃຫ້ຮູ້ຕື່ມວ່າ: ປັດຈຸບັນ, ບໍລິສັດ ຢົງໄທ້ ມີພະນັກງານທັງໝົດ 203 ຄົນ ໃນນີ້ແຮງງານພາຍໃນ 170 ຄົນ ຍິງ 10 ຄົນ, ແຮງງານຕ່າງປະເທດ 33 ຄົນ ຍິງ 10 ຄົນ, ມີອາຄານ 10 ຫລັງ, ເນື້ອທີ່ດິນໂຮງງານທັງໝົດ 60.800 ຕາແມັດ, ກໍາລັງແຮງຂອງເຄື່ອງຈັກ 2.354,98 ແຮງມ້າ, ຄາດວ່າໃນປີ 2024 ຈະເກັບຊື້ຜົນຜະລິດນໍ້າຢາງພາລາ ປ່ອນເຂົ້າໂຮງງານຢາງພາລາ ໃຫ້ໄດ້ 70.000 ໂຕນ ພ້ອມທັງເກັບຊື້ຢາງພາລາ ຕາມລາຄາຕະຫລາດ ເພື່ອສ້າງລາຍຮັບໃຫ້ປະຊາຊົນ ຄິດໄລ່ເປັນເງິນ 300 ກວ່າລ້ານຢວນ ແລະ ຈະເຮັດໃຫ້ລາຍຮັບຂອງປະຊາຊົນເພີ່ມຂຶ້ນໃນແຕ່ລະປີ ແລະ ຄາດວ່າໂຮງງານຈະໄດ້ຜົນຜະລິດຢາງເຄິ່ງສໍາເລັດຮູບ ສົ່ງອອກປະມານ 25.000 ໂຕນ ໃນນີ້, ບໍລິສັດໄດ້ຮັບໂກຕ້າ ຈາກ ສປ ຈີນ ໂດຍຍົກເວັ້ນພາສີນຳເຂົ້າ 11.392 ໂຕນ.
ໂຮງງານດັ່ງກ່າວໄດ້ປະກອບສ່ວນອັນສຳຄັນ ໃນການພັດທະນາ ເສດຖະກິດ-ສັງຄົມ ຂອງແຂວງ, ຂອງເມືອງ ແລະ ໄດ້ສ້າງອາຊີບທີ່ໜັ້ນຄົງຕາມທ່າແຮງ ໂດຍໄດ້ສ້າງວຽກເຮັດງານທໍາ ໃຫ້ປະຊາຊົນພາຍໃນຕົວ ແລະ ມີລາຍຮັບເຂົ້າຄອບຄົວ ສາມາດແກ້ໄຂຄວາມທຸກຍາກ ແລະ ຍົກລະດັບຊີວິດການເປັນຢູ່ຂອງປະຊາຊົນບັນດາເຜົ່າ ໃຫ້ດີຂຶ້ນເປັນກ້າວໆ.
ຂ່າວ-ພາບ: ແສງຄຳ ສາລີວັນ