ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ລັດວິສາຫະກິດໄຟຟ້າລາວ ມອບເງິນ ແລະ ເຄື່ອງຊ່ວຍເຫຼືອ ໃຫ້ແກ່ຜູ້ປະສົບໄພນ້ຳຖ້ວມຢູ່ 3 ເມືອງຂອງແຂວງອຸດົມໄຊ

ລັດວິສາຫະກິດໄຟຟ້າລາວໄດ້ນຳເອົາເງິນສົດ ພ້ອມດ້ວຍເຄື່ອງອຸປະໂພກ ແລະ ບໍລິໂພກຈຳນວນໜຶ່ງ ມາມອບໃຫ້ແກ່ຜູ້ປະສົບໄພນ້ຳຖ້ວມຢູ່ 3 ເມືອງຂອງແຂວງອຸດົມໄຊຄື: ເມືອງປາກແບງ, ເມືອງ ແບງ ແລະ ເມືອງຫຼາ. ພິທີມອບ-ຮັບເງິນ ແລະ ວັດຖຸປັດໃຈຊ່ວຍເຫຼືອດັ່ງກ່າວໄດ້ຈັດຂຶ້ນໃນວັນທີ 12 ຕຸລານີ້ທີ່ຫ້ອງວ່າການປົກຄອງແຂວງອຸດົມໄຊ.

ທ່ານ ບຸນມາ ມະນີວົງ ຮອງຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ກ່າວໃນໂອກາດມອບເຄື່ອງຊ່ວຍເຫຼືອຄັ້ງນີ້ວ່າ ເງິນ ແລະ ເຄື່ອງທີ່ນຳມາມອບໃນຄັ້ງນີ້ ແມ່ນໄດ້ມາຈາກການລະດົມນຳພາກສ່ວນບໍລິສັດກໍ່ສ້າງໄຟຟ້າຕ່າງໆ ພາຍໃນປະເທດ ສົມທົບກັບການປະກອບສ່ວນຂອງອ້າຍນ້ອງພະນັກງານ-ກຳມະກອນ ພາຍໃນລັດວິສາຫະກິດໄຟຟ້າລາວ. ໃນນີ້ ໄດ້ມອບເງິນສົດໃຫ້ເມືອງລະ 10 ລ້ານກີບ ພ້ອມດ້ວຍເຄື່ອງອຸປະໂພກ ແລະ ບໍລິໂພກອີກຈຳນວນໜຶ່ງ. ເຊິ່ງເຄື່ອງຈຳນວນດັ່ງກ່າວ ທາງເມືອງຈະໄດ້ນຳເອົາໄປແຈກຢາຍໃຫ້ປະຊາຊົນຜູ້ທີ່ໄດ້ຮັບຜົນກະທົບຕາມຄວາມເໝາະສົມຂອງແຕ່ລະຄອບຄົວ.

ເປັນກຽດມອບເຄື່ອງດັ່ງກ່າວໂດຍແມ່ນທ່ານ ບຸນມາ ມະນີວົງ ຮອງຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ແລະ ຮັບໂດຍແມ່ນທ່ານ ເຈົ້າເມືອງ, ຮອງເຈົ້າເມືອງທັງສາມເມືອງ ໂດຍມີທ່ານ ຄຳພັນ ເຜີຍຍະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງອຸດົມໄຊ, ທ່ານ ບຸນມາ ມະນີວົງ ຮອງຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ພ້ອມດ້ວຍເຈົ້າເມືອງ ຮອງເຈົ້າເມືອງ, ຄະນະອຳນວຍການລັດວິສາຫະກິດໄຟຟ້າລາວສາຂາແຂວງອຸດົມໄຊເຂົ້າຮ່ວມ.

ຂ່າວຈາກ: ໄມພອນ