ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ລາຍງານສະຖານະການລ້າສຸດການແຜ່ລະບາດຂອງເຊື້ອພະຍາດໂຄວິດ-19 ຢູ່ສປປ ລາວ ມາຮອດມື້ນີ້ 27 ມີນາ 2020 ຈຳນວນຜູ້ຕິດເຊື້ອບໍ່ເພີ່ມ ຍັງຄົງທີຢູ່ 6 ກໍລະນີຕາມເດີມ:

ໃນຕອນບ່າຍມື້ນີ້ ວັນທີ 27 ມີນາ 2020 ໃນເວລາ 14:40 ໂມງດ ທີ່ກະຊວງສາທາລະນະສຸກ, ນະຄອນຫຼວງວຽງຈັນ,ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ ຫຼື ໂຄວິດ-19 ໄດ້ຖະແຫຼງຂ່າວວ່າ: ຈຳນວນຜູ້ຕິດເຊື້ອໄວຣັດໂຄວິດ-19 ຢູ່ລາວ ມາຮອດມື້ນີ້ວັນທີ 27 ມີນາ 2020 ແມ່ນບໍ່ໄດ້ເພີ່ມຂຶ້ນ (ຍັງມີພຽງແຕ່ 6 ກໍລະນີ), ພາຍຫລັງຜົນການກວດວິເຄາະຫາເຊື້ອຈາກຈຳນວນອີກ 37 ຕົວຢ່າງໃນມື້ວານນີ້ ອອກມາເປັນຜົນລົບທັງໝົດ.

ທ່ານຮອງສາສະດາຈານ ປອ ພູທອນ ເມືອງປາກ, ຮອງລັດຖະມົນຕີກະຊວງສາມາລະນະສຸກ ແຈ້ງໃຫ້ຮູ້ວ່າ: ນັບຕັ້ງແຕ່ມື້ເລີ່ມຕົ້ນມາຈົນຮອດປັດຈຸບັນນີ້ ສປປ ລາວ ໄດ້ນຳຕົວຢ່າງຂອງກໍລະນີຜູ້ຕ້ອງສົງໄສຕິດເຊື້ອພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ຫລື ໂຄວິດ-19 ໄປກວດແລ້ວທັງໝົດ 218 ກໍລະນີ (ເປັນຕົວເລກສະສົມ), ໃນນັ້ນມີພຽງແຕ່ 6 ກໍລະນີ ທີ່ກວດພົບເຊື້ອພະຍາດໂຄວິດ-19.

6 ກໍລະນີທີ່ຕິດເຊື້ອຄື: 1. ເພດຍິງ ອາຍຸ 36 ປີ ຢູ່ບ້ານຄຳຮຸ່ງ ເມືອງໄຊທານີ ເປັນພະນັກງານນຳທ່ຽວ, 2. ເພດຊາຍ ອາຍຸ 28 ປີ ຢູ່ບ້ານຈັນສະຫວ່າງ ເມືອງສີໂຄດຕະບອງ ນະຄອນຫລວງວຽງຈັນ, 3. ເພດຊາຍ ອາຍຸ 26 ປີ ຢູ່ບ້ານຫ້ວຍຫ້ອມ ເມືອງສີໂຄດຕະບອງ, 4. ເພດຊາຍ ອາຍຸ 42 ປີ ຢູ່ບ້ານປ່ອງຄຳ ນະຄອນຫລວງພະບາງ ແຂວງຫລວງພະບາງ, 5. ເພດຊາຍ ອາຍຸ 52 ປີ ຢູ່ບ້ານວິຊຸນ ນະຄອນຫລວງພະບາງ ແຂວງຫລວງພະບາງ ແລະ 6. ເພດຊາຍ ອາຍຸ 41 ປີ ຢູ່ບ້ານຫ້ວຍຫ້ອມ (ຂໍ້ມູນອັບເດດໃໝ່) ເມືອງສີໂຄດຕະບອງ ນະຄອນຫລວງວຽງຈັນ.

ທ່ານຮອງສາສະດາຈານ ປອ ພູທອນ ເມືອງປາກ ຍັງໄດ້ຮຽກຮ້ອງມາຍັງຜູ້ທີ່ໄດ້ໃກ້ຊິດກັບຜູ້ຕິດເຊື້ອ ໃຫ້ກັກຕົນເອງໃຫ້ຄົບ 14 ວັນ, ແລະ ຊ່ວຍແຈ້ງຜູ້ທີ່ຕົນເອງໄດ້ສຳຜັດ ຫຼື ໃກ້ຊິດ ຫຼື ສະຖານທີ່ຕ່າງໆທີ່ຕົນເອງໄດ້ໄປຫຼັງຈາກທີ່ສຳຜັດກັບຜູ້ຕິດເຊື້ອແລ້ວ; ຖ້າມີອາການເປັນໄຂ້, ໄອ, ເຈັບຄໍ, ຫາຍໃຈຝືດ ແມ່ນໃຫ້ລາຍງານດ່ວນ ຕໍ່ແພດໝໍ ຫຼື ໂຮງໝໍທີ່ຢູ່ໃກ້ບ້ານ ເພື່ອຂໍຄຳແນະນຳ ຫຼື ໂທສອບຖາມສາຍດ່ວນໝາຍເລກ 166 ກໍ່ໄດ້.