ລາຍນາກ ໃນຜ້າແພລາວ ເປັນເອກະລັກຂອງຄົນລາວ, ເປັນເອກະລັກທີ່ມີຄວາມໝາຍທາງສັງຄົມ ແລະ ວັດທະນະທຳລາວ ທີ່ມີການສືບທອດຈາກຮຸ່ນສູ່ຮຸ່ນ ເຊິ່ງການຕໍ່າ ກໍມີລວດລາຍທີ່ແຕກຕ່າງກັນອອກໄປ ແລ້ວແຕ່ຄວາມນິຍົມຊົມຊອບ ແລະ ການເຊື່ອຖື ເພາະການປັກລວດລາຍໄວ້ໃນຜືນຜ້າ ໝາຍຄວາມວ່າ ການສະແດງເອກະລັກ ເພື່ອສື່ຄວາມໝາຍຜ່ານລວດລາຍຕ່າງໆ ເຊັ່ນ: ລາຍນາກລາວ ກໍເປັນລາຍໜຶ່ງທີ່ມີຄວາມໝາຍຄວາມສໍາຄັນ ສໍາລັບຄົນລາວ ເພາະຕາມຄວາມເຊື່ອຖື ຂອງຄົນລາວ ທີ່ເຊື່ອກັນວ່າ ພະຍານາກ ແມ່ນສິ່ງສັກສິດທີ່ຄອຍປົກປັກຮັກສາ ໃຫ້ຄວາມຢູ່ເຢັນເປັນສຸກ ປາສະຈາກສິ່ງທີບໍ່ດີ. ສະນັ້ນ, ຄົນລາວຈຶ່ງ ນໍາເອົາລວດລາຍ ພະຍານາກ ມາເປັນສັນຍະລັກໃນສະຖານທີ່ຕ່າງໆ ລວມເຖິງລາຍນາກທີ່ປັກແສ່ວ ຫລື ຕໍ່າໃນເຄື່ອງນຸ່ງຫົ່ມຂອງແມ່ຍິງລາວ.
ທ່ານ ນາງ ນາລີ ມາຖາວອນ ເຈົ້າຂອງຮ້ານນາລີຜ້າໄໝມ້ອນຊໍາເໜືອ ໄດ້ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວ ໃນວັນທີ 5 ມິຖຸນາ 2024 ນີ້ວ່າ: ຫັດຖະກຳພື້ນເມືອງພູມປັນຍາການຕໍ່າລາຍນາກ ຂອງຊຸມຊົນເຊື້ອຊາດລາວ ທີ່ຖືກຮັບຮອງເຂົ້າບັນຊີລະດົກໂລກວັດທະນະທໍາທີ່ບໍ່ເປັນວັດຖຸ ແມ່ນມໍລະດົກວັດທະນະທຳອັນມີຄວາມໝາຍຂອງລາວ ທີ່ໄດ້ຮັບການຖ່າຍທອດ, ສືບທອດ, ຍົກສູງຄວາມຮັບຮູ້ຂອງເອກະລັກ ແລະ ຄວາມເປັນຊາດລາວ ຈາກບັນພະບຸລຸດ ແລະ ໄດ້ຮັບການສືບທອດຈາກຄົນຮຸ່ນໜຶ່ງໄປອີກຮຸ່ນໜຶ່ງຢ່າງຕໍ່ເນື່ອງ, ພ້ອມທັງໄດ້ຮັບການປະດິດສ້າງ ແລະ ປັບປຸງໃຫ້ແທດເໝາະກັບສະພາບແວດລ້ອມສັງຄົມໃໝ່, ຕິດພັນກັບທຳມະຊາດອ້ອມຂ້າງ ແລະ ບົນພື້ນຖານປະຫວັດສາດ ຂອງຊາດ ເຊິ່ງການຕໍ່າລາຍນາກ ກໍບໍ່ແມ່ນເລື່ອງງ່າຍ ຕ້ອງໄດ້ໃຊ້ຄວາມປານິດ ແລະ ຄວາມອົດທົນພະຍາມຍາມ ເພາະການຕໍ່າມີຫລາຍຂັ້ນຕອນ.
ສໍາລັບຮ້ານນາລີຜ້າໄໝມ້ອນຊໍາເໜືອ ຕັ້ງຢູ່ເມືອງຊໍາເໜືອ ແຂວງຫົວພັັນ, ສ້າງຕັ້ງຂຶ້ນໃນປີ 2009 ໂດຍເລີ່ມຈາກການຮັກມັກໃນການຕໍາຫູກຂອງຮຸ່ນແມ່ ແລະ ເຫັນການປູກມອນລ້ຽງມ້ອນມາແຕ່ນ້ອຍໆ ເວົ້າໄດ້ວ່າເປັນຮຸ່ນສືບທອດຈາກແມ່ ແລະ ຍຶດຖືມາເປັນອາຊີບ ເພື່ອສ້າງລາຍຮັບເຂົ້າຄອບຄົວ, ພ້ອມນີ້ ຍັງໄດ້ສົ່ງເສີມການຜະລິດ ໃຫ້ປະຊາຊົນໃນຊຸມຊົນ ແລະ ການສົ່ງອອກໄປຕ່າງປະເທດ ແລະ ເພື່ອສ້າງວຽກເຮັດງານທໍາໃຫ້ແມ່ຍິງ, ຜູ້ດ້ອຍໂອກາດ, ທັງເປັນບ່ອນສຶກສາ, ຖ່າຍທອດຄວາມຮູ້ ການຕ່ຳຫູກທໍໄໝ ໃຫ້ແກ່ຄົນຮຸ່ນຕໍ່ໄປ. ສໍາລັບ ຜະລິດຕະພັນຂອງຮ້ານມີ: ສິ້ນໄໝ, ສິ້ນໄໝມ້ອນຊໍາເໜືອ, ແຜ່ເສື້ອ, ຜ້າພັນຄໍ ແລະ ຜ້າບ່ຽງ ທີ່ມີລວດລາຍຫລາຍຊະນິດ ໃນນັ້ນລວມທັງລາຍນາກ, ນຳໃຊ້ລວດລາຍພື້ນເມືອງ ແລະ ລວດລາຍທັນສະໄໝຂອງລາວ ເຊິ່ງຜະລິດຕະພັນທັງໝົດ ແມ່ນຖືກຕ່ຳໂດຍຊ່າງຫັດຖະກຳ ທີ່ມີສີມື ແລະ ປະສົບການຍາວນານ.
ຂ່າວ-ພາບ: ສົມຫວັງ
