ໃນທ້າຍປີ 2023 ອົງການເພື່ອການສຶກສາວິທະຍາສາດ ແລະ ວັດທະນະທໍາ ຂອງສະຫະປະຊາຊົນ ຫລື ອຸຍແນັສໂກ (UNESCO) ໄດ້ຮັບຮອງເອົາລາຍນາກ ພູມປັນຍາ ຂອງຊາວຊ່າງຫັດຖະກໍາ ທີ່ຕິດພັນກັບຄວາມເຊື່ອ ໃນການດໍາລົງຊີວິດຂອງປະຊາຊົນລາວ ເປັນມໍລະດົກໂລກທາງວັດທະນະທໍາ ທີ່ບໍ່ເປັນວັດຖຸ ທີ່ເປັນຕົວແທນຂອງມວນມະນຸດຢ່າງເປັນທາງການ ນັ້ນໄດ້ສ້າງຄວາມພາກພູມໃຈໃຫ້ແກ່ປະຊາຊົນລາວ ເພາະລາຍນາກ ເປັນລາຍທີ່ໂດດເດັ່ນອັນດັບຫນຶ່ງໃນຜ້າແພລາວ ທີ່ຖືກປະດິດຄິດສ້າງຂຶ້ນ
ດ້ວຍຈິດສໍານຶກ ແລະ ສິລະປະອັນປານີດຂອງຄົນລາວ ເຊິ່ງໄດ້ຕິດພັນກັບການດໍາລົງຊີວິດ ຂອງຄົນລາວມາແຕ່ສະໄຫມບູຮານ. ສໍາລັບພິທີສະຫລອງ ແລະ ປະກາດ ລາຍນາກ ເປັນມໍລະດົກໂລກນັ້ນທາງ ກະຊວງຖະແຫລງຂ່າວ ວັດທະນະທໍາ ແລະທ່ອງທ່ຽວ ຈະໄດ້ຈັດຂຶ້ນໃນໄວໆນີ້.
ການຮັບຮອງລາຍນາກ ໃຫ້ເປັນມໍລະດົກ ວັດທະນະທໍາ ທີ່ບໍ່ເປັນວັດຖຸ ທີ່ເປັນຕົວແທນຂອງມວນມະນຸດໂລກ ແມ່ນມີຄວາມຫມາຍ ແລະ ຄວາມສໍາຄັນຕໍ່ການອະນຸລັກ, ປົກປັກຮັກສາມໍລະດົກອັນລໍ້າຄ່າຂອງຊາດ ໃຫ້ມີຄວາມຍືນຍົງ ທັງເປັນການປະກອບສ່ວນເຂົ້າໃນການສົ່ງເສີມວຽກງານເສດຖະກິດ ຂອງຊາດ, ເປັນການຕໍ່ຍອດໃຫ້ແກ່ຜະລິດຕະພັນ ຫັດຖະກໍາຂອງລາວ ໃຫ້ມີບາດກ້າວຂະຫຍາຍຕົວອັນໃຫມ່ ແລະເປັນທີ່ຮັບຮູ້ຈາກສາກົນຫລາຍ ຂຶ້ນ. ກ່ອນຈະໄດ້ມາເຊິ່ງລາງວັນແຫ່ງຄວາມພາກພູມໃຈນີ້ ກໍບໍ່ແມ່ນເລື່ອງງ່າຍ ໂດຍສະເພາະແມ່ນການແຂ່ງຂັນຍາດແຍ່ງ ຈາກປະເທດອ້ອມຂ້າງທີ່ມີສິລະປະວັດທະນະທໍາ ຄ້າຍຄືກັນ. ແຕ່ສິ່ງທີ່ເປັນການຢັ້ງຢືນໃຫ້ ເຫັນຢ່າງປະຈັກຕາຄືການຕໍ່າຫູກແມ່ນມູນເຊື້ອທີ່ຕິດພັນ ກັບເອື້ອຍ ນ້ອງແມ່ຍິງລາວມາແຕ່ດົນນານແລ້ວ ເຊິ່ງມີການສືບທອດຈາກຮຸ່ນສູ່ຮຸ່ນ ເຊິ່ງການຕໍ່າກໍມີລວດລາຍທີ່ແຕກຕ່າງກັນອອກໄປ ແລ້ວແຕ່ຄວາມນິຍົມຊົມຊອບ ແລະ ການເຊື່ອຖືເພາະການປັກລວດລາຍໄວ້ໃນຜືນຜ້າ ຫມາຍຄວາມວ່າການສະແດງເອກະລັກ ເພື່ອສື່ຄວາມຫມາຍຜ່ານລວດລາຍຕ່າງໆ ເຊັ່ນ: ລາຍນາກລາວ ກໍເປັນລາຍຫນຶ່ງທີ່ມີຄວາມຫມາຍຄວາມສໍາຄັນ ສໍາລັບຄົນລາວ ເພາະຕາມຄວາມເຊື່ອຖືຂອງຄົນລາວ ທີ່ເຊື່ອກັນວ່າພະຍານາກແມ່ນສິ່ງສັກສິດທີ່ຄອຍປົກປັກຮັກສາ ໃຫ້ຄວາມຢູ່ເຢັນເປັນສຸກປາສະຈາກສິ່ງທີ່ບໍ່ດີ. ສະນັ້ນ, ຄົນລາວຈຶ່ງນໍາເອົາລວດລາຍນາກ ມາເປັນສັນຍາລັກໃນສະຖານທີ່ຕ່າງໆ ລວມເຖິງລາຍນາກທີ່ປັກແສ່ວ ຫລື ຕໍ່າໃນເຄື່ອງນຸ່ງຫົ່ມຂອງແມ່ຍິງລາວ. ການຕໍ່າລາຍນາກ ກໍ່ບໍ່ແມ່ນເລື່ອງງ່າຍຕ້ອງໄດ້ໃຊ້ຄວາມປານິດ ແລະ ຄວາມອົດທົນພະຍາມ ເພາະການຕໍ່າມີຫລາຍຂັ້ນຕອນ ເລີ່ມ ຈາກການສາວເສັ້ນໄຫມ ແລ້ວນໍາໄປຍ້ອມສີທໍາມະຊາດ ແລ້ວຈຶ່ງນໍາມາຕໍ່າເປັນລວດລາຍທີ່ສວຍງາມ ດັ່ງທີ່ເຮົາເຫັນຕາມຜືນຜ້ານັ້ນເອງ ໂດຍການຕໍ່າລາຍນາກຕາມປະເພນີແລ້ວໂຕນາກຈະໃຊ້ຝ້າຍຂາວຕໍ່າ, ສ່ວນຫົວນາກຈະໃສ່ສີທີ່ມີຄວາມໂດດເດັ່ນ ເພື່ອສະແດງເຖິງພະລັງອໍານາດ. ສະນັ້ນ, ການຍ້ອມສີຕ້ອງໄດ້ກະກຽມສີຄື ສີແດງ, ຂຽວ, ສີທອງ ແລະ ການຕໍ່າກໍ່ໄດ້ໃຊ້ຫລາຍວິທີເຊັ່ນ: ການຈົກ, ການຂິດ, ການມັດມີ່ ແລະ ອື່ນໆ ຫລາຍຂັ້ນຕອນ ກ່ອນຈະອອກມາເປັນຜ້າແພລວດລາຍຕ່າງໆທີ່ເຮົາເຫັນຄືທຸກມື້ນີ້.
ການທີ່ລາຍນາກໃນຜ້າພື້ນເມືອງລາວ ໄດ້ຮັບຮອງເປັນມໍລະດົກໂລກ ນັ້ນເປັນສິ່ງປະຈັກສູ່ສາຍຕາຊາວໂລກ ແລະ ສ້າງຄວາມພາກພູມໃຫ້ປະຊາຊົນລາວ. ແນວໃດກໍດີ ເພື່ອເຮັດໃຫ້ວັດທະນະທໍາທີ່ສວຍງາມແບບນີ້ ຢູ່ຄຽງຄູ່ປະຊາຊົນຄົນລາວເຮົານັ້ນ, ໄວຫນຸ່ມຜູ້ເກີດໃຫມ່ໃຫຍ່ລຸນຕ້ອງພ້ອມກັນປົກປັກຮັກສາ ແລະສືບທອດວັດທະນະທໍາອັນລໍ້າຄ່າ ບໍ່ໃຫ້ຈາງຫາຍໄປກັບການເວລາ ແລະຢູ່ຄູ່ກັບຄົນລາວເຊື້ອຊາດລາວຕະຫລອດໄປ.
ໂດຍ: ໄໝຄຳ ຍ້ອມສິນ
ພາບປະກອບ ຈາກອິນເຕີເນັດ
ຂປລ
