ວັນທີ 26 ມິຖຸນາ 2024 , ກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ ແຫ່ງ ສປປ ລາວ ໄດ້ອອກຄໍາແນະນໍາ ສະບັບເລກທີ 29/ຖວທ ກ່ຽວກັບການຈັດຕັ້ງປະຕິບັດກ່ຽວກັບນະໂຍບາຍວີຊາ ແລະ ໄລຍະການພັກເຊົາ ຢູ່ ສປປ ລາວ ສໍາລັບນັກທ່ອງທ່ຽວກຸ່ມເປົ້າໝາຍ ໃນໄລຍະປີທ່ອງທ່ຽວລາວ 2024 ໂດຍລະບຸວ່າ: ນັກທ່ອງ ທ່ຽວຈີນຜູ້ຖືພາສປອດທຳມະດາ ສາມາດເຂົ້າໄປທ່ຽວປະເທດລາວ 15 ວັນແບບຍົກ ເວັ້ນວີຊາ ໂດຍຜ່ານການຈັດຕັ້ງຂອງບໍລິສັດທ່ອງທ່ຽວ ເຊິ່ງຈະປະຕິບັດແຕ່ວັນທີ 1 ກໍລະກົດ ຫາ ວັນທີ 31 ທັນວາປີ 2024.
ພາຍຫຼັງໄດ້ເຫັນຄໍາແນະນໍາດັ່ງກ່າວ, ຊາວເນັດຈີນໄດ້ເລີ່ມຄົ້ນຫາກ່ຽວກັບການທ່ອງທ່ຽວປະເທດລາວຜ່ານທາງອິນເຕີເນັດເປັນຈຳນວນເພີ່ມຂຶ້ນຢ່າງວ່ອງໄວ, ຄຳ ສັບທີ່ວ່າ: “ລາວ” ເປັນທີ່ສົນໃຈໃນໂລກອິນເຕີເນັດຂອງຈີນເພີ່ມຂຶ້ນເກືອບໜຶ່ງເທົ່າ, ໃນນີ້ ຕົວເມືອງທ່ອງທ່ຽວທີ່ໄດ້ຮັບຄວາມນິຍົມຢູ່ລາວສໍາລັບນັກທ່ອງທ່ຽວຈີນ ລວມມີ: ນະຄອນຫຼວງວຽງຈັນ, ນະຄອນຫຼວງພະບງ, ເມືອງວັງວຽງ, ນະຄອນປາກເຊ ແລະ ແຂວງສະຫວັນນະເຂດ ເປັນຕົ້ນ.
ການຍົກເວັ້ນວີຊາ ຖືເປັນມາດຕະການສຳຄັນທີ່ຊຸກຍູ້ການທ່ອງທ່ຽວ. ນັບແຕ່ຕົ້ນປີນີ້ເປັນຕົ້ນມາ, ຈີນໄດ້ປັບປຸງມາດຕະການວີຊາຫຼາຍຂໍ້ ເຊິ່ງລວມທັງຍົກເວັ້ນວີຊາຕໍ່ຫຼາຍປະເທດ ໄດ້ອຳນວຍຄວາມສະດວກໃຫ້ແກ່ຊາວຕ່າງປະເທດທີ່ເຂົ້າມາທ່ອງທ່ຽວ, ເຮັດວຽກ, ຮ່ຳຮຽນ ແລະ ດຳລົງຊີວິດຢູ່ຈີນ ແລະ ໄດ້ຮັບຄວາມຊົມເຊີຍຢ່າງກວ້າງ ຂວາງຈາກປະຊາຄົມໂລກ. ຕົວເລກຂໍ້ມູນທີ່ອົງການຄຸ້ມຄອງຄົນເຂົ້າ-ອອກເມືອງແຫ່ງຊາດຈີນ ເປີດເຜີຍໃຫ້ເຫັນວ່າ: ໃນໄຕມາດທຳອິດຂອງປີນີ້, ຈຳນວນຊາວຕ່າງປະເທດທີ່ເດີນທາງເຂົ້າມາຈີນເພີ່ມຂຶ້ນຫລາຍກວ່າ 3 ເທົ່າ ເມື່ອທຽບໃສ່ໄລຍະດຽວ ກັນຂອງປີກາຍ, ໄດ້ອອກວີຊາໃຫ້ຊາວຕ່າງປະເທດທັງໝົດ 466.000 ເທື່ອຄົນ, ເພີ່ມ ຂຶ້ນ 118,8% ເມື່ອທຽບໃສ່ໄລຍະດຽວກັນຂອງປີກາຍ, ຊາວຕ່າງປະເທດທີ່ເຂົ້າມາຈີນແບບຍົກເວັ້ນວີຊາມີເຖິງ 1,988 ລ້ານເທື່ອຄົນ, ເພີ່ມຂຶ້ນ 266,1% ເມື່ອທຽບໃສ່ໄລ ຍະດຽວກັນຂອງປີກາຍ.
ນັບແຕ່ໄທ ໄດ້ປະຕິບັດນະໂຍບາຍຍົກເວັ້ນວີຊາຕໍ່ນັກທ່ອງທ່ຽວຈີນ ແຕ່ວັນທີ 25 ກັນຍາປີ 2023 ແລະ ໄດ້ປະຕິບັດນະໂຍບາຍຍົກເວັ້ນວີຊາຖາວອນຕໍ່ພົນລະເມືອງຈີນ ແຕ່ວັນທີ 1 ມີນາປີນີ້ເປັນຕົ້ນມາ, ນັກທ່ອງທ່ຽວຈີນທີ່ເດີນທາງໄປທ່ຽວໄທໄດ້ເພີ່ມຂຶ້ນຢ່າງວ່ອງໄວ. ນັບແຕ່ວັນທີ 1 ມັງກອນຫາວັນທີ 9 ມິຖຸນາປີ 2024, ໄທໄດ້ຕ້ອນຮັບນັກທ່ອງທ່ຽວຕ່າງປະເທດທັງໝົດ 15,54 ລ້ານຄົນ. ໃນນັ້ນ, ນັກທ່ອງທ່ຽວຈີນມີຫຼາຍກວ່າ 3 ລ້ານຄົນ, ຈັດຢູ່ອັນດັບທີໜຶ່ງໃນຈໍານວນນັກທ່ອງທ່ຽວຕ່າງປະ ເທດທີ່ເດີນທາງໄປທ່ອງທ່ຽວໄທ. ນັບແຕ່ມາເລເຊຍໄດ້ປະຕິບັດນະໂຍບາຍຍົກເວັ້ນວີຊາຕໍ່ພົນລະເມືອງຈີນແຕ່ວັນທີ 1 ທັນວາປີ 2023 ເປັນຕົ້ນມາ, ໃນລະຫວ່າງເດືອນທັນວາປີກາຍຫາເດືອນເມສາປີນີ້, ນັກທ່ອງທ່ຽວຈີນໄດ້ເດີນທາງໄປທ່ຽວມາເລເຊຍບັນລຸເຖິງ 1,124 ລ້ານເທື່ອຄົນ, ເພີ່ມຂຶ້ນເກືອບ 2,4 ເທົ່າ ເມື່ອທຽບໃສ່ເດືອນທັນວາປີ 2022 ຫາເດືອນເມສາປີ 2023.
ຕົວເລກຂໍ້ມູນທາງອິນເຕີເນັດ ສະແດງໃຫ້ເຫັນວ່າ: ນັບແຕ່ຕົ້ນປີນີ້ເປັນຕົ້ນມາ, ນັກທ່ອງທ່ຽວແຜ່ນດິນໃຫຍ່ຈີນທີ່ເດີນທາງໄປທ່ຽວລາວໄດ້ເພີ່ມຂຶ້ນປະມານ 1 ເທົ່າ ເມື່ອທຽບໃສ່ໄລຍະດຽວກັນຂອງປີກາຍ, ໃບສັ່ງຈອງຈະໄປທ່ຽວລາວໃນຍາມພັກຮຽນລະດູຮ້ອນປີນີ້ໄດ້ເພີ່ມຂຶ້ນຫຼາຍກວ່າ 140%, ລາວໄດ້ກາຍເປັນ 1 ໃນ 10 ປະເທດທີ່ດຶງດູດນັກທ່ອງທ່ຽວຈີນໃຫ້ເພີ່ມຂຶ້ນໄວທີ່ສຸດໃນໄລຍະພັກຮຽນລະດູຮ້ອນປີນີ້.
ປີທ່ອງທ່ຽວລາວ ໄດ້ຜ່ານໄປເຄິ່ງປີແລ້ວ, ລັດຖະບານລາວ ໄດ້ປະຕິບັດນະໂຍບາຍຍົກເວັ້ນວີຊາດັ່ງກ່າວ ຈະມີບົດບາດອັນຕັ້ງໜ້າຕໍ່ການແລກປ່ຽນດ້ານວັດທະນະທຳ ແລະ ຂະແໜງການທ່ອງທ່ຽວຂອງລາວໃນຫົກເດືອນທ້າຍປີນີ້ ແລະ ຈະອຳນວຍຄວາມສະດວກໃຫ້ແກ່ນັກທ່ອງທ່ຽວຈີນໄປທ່ຽວລາວ, ທັງຈະຊຸກຍູ້ຕະຫຼາດການທ່ອງ ທ່ຽວລາວໃຫ້ພັດທະນາຂຶ້ນຢ່າງຈະແຈ້ງ. ໃນຂະນະດຽວກັນ, ເວົ້າສຳລັບພາກພື້ນອາຊີຕາເວັນອອກສຽງໃຕ້ແລ້ວ, ປັດຈຸບັນນີ້, ຈີນໄດ້ບັນລຸສັນຍາຍົກເວັ້ນວີຊາກັບມາເລ ເຊຍ, ໄທ ແລະ ສິງກະໂປ ເຊິ່ງໄດ້ຊຸກຍູ້ໃຫ້ນັກທ່ອງທ່ຽວຈີນໄປທ່ຽວ 3 ປະເທດດັ່ງກ່າວເປັນຈຳນວນຫຼວງຫຼາຍ.
ດັ່ງນັ້ນ ເຊື່ອແນ່ວ່າ: ພາຍຫຼັງລາວໄດ້ປະຕິບັດມາດຕະການຍົກເວັ້ນວີຊາຕໍ່ນັກທ່ອງທ່ຽວຈີນແລ້ວ, ຈະດຶງດູດນັກທ່ອງທ່ຽວຈີນໄປທ່ຽວລາວ ພ້ອມທັງໄປທ່ຽວສິງກະ ໂປ, ມາເລເຊຍ ແລະ ໄທ ທີ່ຢູ່ໃກ້ຄຽງກັນເພີ່ມຂຶ້ນຫລາຍກວ່າເກົ່າ.
