ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ບໍລິສັດ ລັດວິສາຫະກິດ ລາວເດີນອາກາດ ຫລື ລາວສະກາຍເວ (LAO SKYWAY) ໄດ້ເປີດຖ້ຽວບິນຄັ້ງປະຖົມມະລຶກ ເສັ້ນບິນ ນະຄອນຫລວງວຽງຈັນ-ສະຫວັນນະເຂດ-ນະຄອນຫລວງວຽງຈັນ ໃນວັນທີ 02 ເມສາ 2024 ທີ່ສະໜາມບິນສາກົນ ສະຫວັນນະເຂດ ໂດຍການເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ, ທ່ານ ສີວຽງທອງ ກອນນິວົງ ຜູ້ອໍານວຍການໃຫຍ່ບໍລິສັດ ລັດວິສາຫະກິດ ລາວເດີນອາກາດ ພ້ອມດ້ວຍພະແນກການທີ່ກ່ຽວຂ້ອງ.
ທ່ານ ສີວຽງທອງ ກອນນິວົງ ໄດ້ກ່າວວ່າ: ຈຸດປະສົງໃນການເປີດຖ້ຽວບິນຄັ້ງນີ້ ເພື່ອເປັນການສົ່ງເສີມປີທ່ອງທ່ຽວລາວ ພ້ອມທັງເປັນການອຳນວຍຄວາມສະດວກ ໃຫ້ພໍ່ແມ່ປະຊາຊົນ, ພະນັກງານ, ທະຫານ, ຕຳຫລວດ, ນັກທ່ອງທ່ຽວ ໄດ້ໄປ-ມາ ລະຫວ່າງນະຄອນຫລວງວຽງຈັນ ຫາແຂວງສະຫວັນນະເຂດ ແລະ ເປັນການສົ່ງເສີມບັນດານັກທ່ອງທ່ຽວ ມາສູ່ແຂວງສະຫວັນນະເຂດ ໃຫ້ຫລາຍຂຶ້ນ ພ້ອມທັງເປັນການກະຈາຍລາຍໄດ້ສູ່ຊຸມຊົນຕື່ມອີກ. ນອກນີ້, ລາວສະກາຍເວ ຍັງເປັນສ່ວນໜຶ່ງໃນການອຳນວຍຄວາມສະດວກ ແກ່ການເດີນທາງຂອງຜູ້ໂດຍສານທີ່ຢາກມາຢ້ຽມຢາມ ແຂວງສະຫວັນນະເຂດ ດ້ວຍເວລາທີ່ສັ້ນອີກດ້ວຍ. ການເປີດຖ້ຽວບິນ ນະຄອນຫລວງວຽງຈັນ-ສະຫວັນນະເຂດ-ນະຄອນຫລວງວຽງຈັນ ແມ່ນນໍາໃຊ້ເຮືອບິນ MA 60 ຂະໜາດ 56 ບ່ອນນັ່ງ, ເຊິ່ງຮັບໃຊ້ໃນເບື້ອງຕົ້ນແມ່ນ 3 ຖ້ຽວຕໍ່ອາທິດ ຄື: ວັນອັງຄານ, ວັນພະຫັດ ແລະ ວັນເສົາ, ອອກເດີນທາງ ຈາກນະຄອນຫລວງວຽງຈັນ ເວລາ 08:30 ໂມງ ແລະ ກັບຈາກ ສະຫວັນນະເຂດ ເວລາ 10:15 ໂມງ ໂດຍໃຊ້ເວລາບິນປະມານ 1 ຊົ່ວໂມງ 15 ນາທີ ແລະ ໃນຕໍ່ໜ້າບໍລິສັດ ຍັງຈະພິຈາລະນາການເພີ່ມຖ້ຽວບິນຕື່ມ ພາຍຫລັງການບິນຮັບໃຊ້ໄປໄລຍະໜຶ່ງ ບົນພື້ນຖານຄວາມຕ້ອງການເດີນທາງຂອງຜູ້ໂດຍສານແຕ່ລະໄລຍະ.
ທ່ານ ສີວຽງທອງ ກອນນິວົງ ກ່າວຕື່ມວ່າ: ອີງໃສ່ສະພາບການພັດທະນາ ດ້ານເສດຖະກິດ-ສັງຄົມ ທີ່ເຕີບໂຕ ແລະ ຂະຫຍາຍຕົວ ຂອງແຂວງສະຫວັນນະເຂດ, ບໍລິສັດ ເຊື່ອໝັ້ນວ່າ ການເປີດບໍລິການ ສາຍການບິນໃນຄັ້ງນີ້ ຈະອໍານວຍຄວາມສະດວກໃນການເດີນທາງ ຂອງພໍ່ແມ່ປະຊາຊົນ, ພະນັກງານ, ນັກທຸລະກິດ ແລະ ນັກທ່ອງທ່ຽວ ໄດ້ຫລາຍຂຶ້ນກວ່າເກົ່າ ເພື່ອເປັນການປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມຂອງແຂວງສະຫວັນນະເຂດ ກໍຄືຂອງປະເທດ. ຖ້າຫາກລູກຄ້າທ່ານໃດສົນໃຈສາມາດຕິດຕໍ່ຈອງ ແລະ ຊື້ປີເຮືອບິນໄດ້ທີ່: ນະຄອນຫລວງວຽງຈັນ: ບໍລິສັດ ລັດວິສາຫະກິດ ລາວເດີນອາກາດ ຫລື ຊື້ຜ່ານ www.laoskyway.com; ແຂວງ ສະຫວັນນະເຂດ: ວິສາຫະກິດສ່ວນບຸກຄົນ ວົງລະຄອນ ບໍລິການປີ້ເຮືອບິນ ໂທ: 020 7740 3326, 020 9100 6924, ບໍລິສັດ ສະຫວັນວິນລາ ທ່ອງທ່ຽວ ໂທ: 020 5565 1995, ບໍລິສັດ ລັດວິສາຫະກິດສ່ວນບຸກຄົນ ຫ້ອງຂາຍສຸນັນທາໂທ: 020 5555 9359.
ຂ່າວຈາກ: ຂປລ.