ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ລາວເຮົາຍັງບໍ່ພົບການລະບາດຂອງພະຍາດ ໂຄວິດ-19 ເທື່ອ

ຄວາມສ່ຽງຂອງການລະບາດພະຍາດ ໂຄວິດ-19 ຢູ່ປະເທດອ້ອມຂ້າງພວກເຮົານັບມື້ນັບມີສູງຂຶ້ນ; ພ້ອມກັນນັ້ນ, ຄົນຕ່າງປະເທດເດີນທາງເຂົ້າມາປະເທດເຮົາກໍ່ຍັງມີຫລາຍຢູ່, ແຕ່ມາຮອດປະຈຸບັນກໍ່ຍັງບໍ່ພົບການລະບາດຂອງພະຍາດຊະນິດນີ້ເທື່ອຢູ່ປະເທດເຮົາ.

ທ່ານບຸນກອງ ສີຫາວົງ, ລັດຖະມົນຕີກະຊວງສາທາລະນະສຸກໃຫ້ສໍາພາດຕໍ່ສູ່ມວນຊົນ ທີ່ສໍານັກນາຍົກລັດຖະມົນຕີ ນະຄອນຫຼວງວຽງຈັນ, ໃນຕອນແລງວັນທີ 18 ມິນານີ້ເຖິງກໍລະນີຂ່າວລືຈາກຫລາຍແຫ່ງທີ່ມີຄວາມສ່ຽງ ເຊັ່ນ: ກໍລະນີຢູ່ແຂວງສະຫວັນນະເຂດ ຕາມຂ່າວອອກມາແມ່ນມີແມ່ຍິງຊາວແຂວງສະຫວັນນະເຂດ ໄປເຮັດວຽກຢູ່ປະເທດໄທ ໄດ້ເດີນທາງກັບມາບ້ານຕົນເອງ ໃນຂະນະທີ່ມີອາການໄຂ້ຂຶ້ນສູງ ເຊິ່ງມີອາການເຂົ້າກັບນິຍາມທີ່ຕິດພະຍາດໂຄວິດ-19 ເພາະປະຈຸບັນນີ້, ປະເທດໄທກໍາລັງມີການລະບາດ ຄືມີຜູ້ຕິດເຊື້ອເຖິງ 200 ກວ່າຄົນແລ້ວ, ເຊິ່ງຜົນກວດຍັງບໍ່ພົບເຊື້ອພະຍາດໂຄວິດ-19 ແຕ່ຢ່າງໃດ. ເຖິງແນວນັ້ນກໍ່ຕາມ, ຄະນະສະເພາະກິດຂອງແຂວງສະຫວັນນະເຂດໄດ້ໃຫ້ການປິ່ນປົວ ແຍກດ່ຽວ ແລະ ຕິດຕາມອາການຂອງຜູ້ກ່ຽວໄປອີກຈົນຄົບ 14 ວັນ.

ນອກຈາກນີ້, ທ່ານລັດຖະມົນຕີກະຊວງສາທາລະນະສຸກ ຍັງໃຫ້ຮູ້ເຖິງກໍລະນີຄະນະນັກທ່ອງທ່ຽວຄົນໄທທີ່ເດີນທາງເຂົ້າມາແຂວງຄໍາມ່ວນ ຕາມການແຈ້ງການຂອງກົງສູນໄທ ປະຈໍາແຂວງສະຫວັນນະເຂດວ່າ: ມີຊາວໄທເດີນທາງເຂົ້າໄປແຂວງຄໍາມ່ວນ ແຕ່ເວລາກັບຄືນປະເທດແລ້ວມີການໄຂ້ ແລະ ກວດພົບວ່າຕິດເຊື້ອພະຍາດ ໂຄວິດ-19 ນັ້ນ; ຕໍ່ກໍລະນີນີ້ ຄະນະສະເພາະກິດແຂວງຄໍາມ່ວນ ໄດ້ຮີບຮ້ອນລົງຕິດຕາມ ແລະ ກວດກາສຸຂະພາບຂອງຜູ້ທີ່ໃກ້ຊິດ ໃຫ້ບໍລິການແກ່ຄະນະນັກທ່ອງທ່ຽວໄທຊຸດນີ້ຢ່າງທັນການ ໂດຍຜົນກວດທັງໝົດແມ່ນບໍ່ພົບເຊື້ອພະຍາດແຕ່ຢ່າງໃດ; ເຖິງຢ່າງໃດກໍ່ຕາມ, ປະຈຸບັນນີ້, ຜູ້ຕ້ອງສົງໄສທັງໝົດ ແມ່ນໄດ້ຖືກກັກແຍກປ່ຽວຢູ່ໂຮງໝໍແຂວງຄໍາມ່ວນແລ້ວ ແລະ ຍັງຈະສືບຕໍ່ກວດຫາເຊື້ອອີກຕື່ມ 2-3 ຄັ້ງເພື່ອຄວາມແນ່ນອນ.

ສ່ວນກໍລະນີທີ່ມີຊາວແອສປາຍ ເດີນທາງມາຢ້ຽມຢາມຊາວຈີນ ທີ່ກໍາລັງສຶກສາຢູ່ມະຫາວິທະຍາໄລແຫ່ງຊາດ ຕາມການແຈ້ງຂອງສະຖານທູດຈີນ ເຊິ່ງທາງການລາວມີຄວາມເປັນຫ່ວງເປັນໃຍທີ່ສຸດ ໂດຍໄດ້ຕິດຕາມຫາພວກກ່ຽວ, ນໍາໄປກວດສຸຂະພາບ ແລະ ກັກແຍກປ່ຽວຢູ່ໂຮງໝໍເສດຖາທິລາດນັ້ນ ເຊິ່ງຜົນກວດຍັງບໍ່ພົບເຊື້ອພະຍາດ ແຕ່ກໍ່ຍັງສືບຕໍ່ແຍກປ່ຽວ ແລະຈະກວດສຸຂະພາບຕື່ມອີກຫລາຍຄັ້ງ.

ພ້ອມນີ້, ທ່ານບຸນກອງ ສີຫາວົງ, ລັດຖະມົນຕີກະຊວງສາທາລະນະສຸກ ຍັງໄດ້ຮຽກຮ້ອງມາຍັງຜູ້ບໍລິໂພກຂ່າວ, ໂດຍສະເພາະຂ່າວທາງສື່ສັງຄົມອອນລາຍ ໃຫ້ຄວນເຊື່ອຟັງສະເພາະຂ່າວທາງການ ຫລື ຂ່າວທີ່ໄດ້ຮັບການຢັ້ງຢືນຈາກພາກສ່ວນສາທາລະນະສຸກເທົ່ານັ້ນ.