ລາວ-ກຳປູເຈຍ ພົບປະແລກປ່ຽນການຮ່ວມມືວຽກກວດກາລັດ ແລະ ຕ້ານການສໍ້ລາດບັງຫລວງ

ກອງປະຊຸມພົບປະແລກປ່ຽນລະຫວ່າງ ອົງການກວດກາແຫ່ງ ລັດ ສປປ ລາວ ແລະ ອົງການຕ້ານການສໍ້ລາດບັງຫລວງ ແຫ່ງ ຣາຊະອານາຈັກ ກຳປູເຈຍ ຈັດຂຶ້ນໃນວັນທີ 3 ກັນຍາ 2024 ຢູ່ນະຄອນຫລວງວຽງຈັນ ຝ່າຍລາວນຳໂດຍ ທ່ານ ຄຳພັນ ພົມມະທັດ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ, ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ ແລະ ຝ່າຍກຳປູເຈຍ ນຳໂດຍ ທ່ານ ອອມ ເຢິນຕຽງ ລັດຖະມົນຕີອາວຸໂສ, ປະທານອົງການຕ້ານການສໍ້ລາດບັງຫລວງ ແຫ່ງຣາຊະອານາຈັກ ກຳປູເຈຍ ພ້ອມ ດ້ວຍຄະນະ.

ທ່ານ ຄຳພັນ ພົມມະທັດ ໄດ້ສະແດງຄວາມຍິນດີຕ້ອນຮັບຄະນະຜູ້ແທນ ອົງການຕ້ານການສໍ້ລາດບັງຫລວງ ແຫ່ງຣາຊະ ອານາຈັກ ກຳປູເຈຍ ເຊິ່ງການພົບປະແລກປ່ຽນ ລະຫວ່າງ ສອງອົງການໃນຄັ້ງນີ້, ບໍ່ສະເພາະແຕ່ເປັນການຜັນຂະຫຍາຍບົດບັນ ທຶກການຮ່ວມມືສອງຝ່າຍທີ່ໄດ້ເຊັນຮ່ວມກັນ, ແຕ່ຍັງເປັນການປະກອບ ສ່ວນສໍາຄັນເຂົ້າໃນການເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອ ຖານບ້ານໃກ້ເຮືອນຄຽງທີ່ມີມາແຕ່ດົນນານ ລະຫວ່າງ ປະຊາຊົນສອງຊາດລາວ- ກຳປູເຈຍ ກໍຄື ເປັນຄູ່ຮ່ວມມືຍຸດທະສາດຮອບ ດ້ານ ແລະ ໝັ້ນຄົງຍາວນານ ຂອງສອງປະເທດ ນັບມື້ສູງຂຶ້ນ ໂດຍສະເພາະລະ ຫວ່າງສອງອົງການພວກເຮົາເລິກເຊິ່ງ,ເຂັ້ມແຂງຕະຫລອດໄປ.

ໂອ ກາດນີ້, ທ່ານ ອອມ ເຢິນຕຽງ ກໍໄດ້ສະແດງຄຳຂອບໃຈຕໍ່ການ ຕ້ອນຮັບອັນ ອົບອຸ່ນ ແລະ ຈິງໃຈ ຂອງອົງການກວດກາແຫ່ງລັດ ສປປ ລາວ, ພ້ອມທັງແຈ້ງສະພາບໃນການເຄື່ອນໄຫວຢ້ຽມຢາມ ສປປ ລາວ ໃນຄັ້ງນີ້.

ຈາກນັ້ນ, ທ່ານ ຄຳພັນ ພົມມະທັດ ກໍໄດ້ສະເໜີສະພາບລວມຂອງ ສປປ ລາວ ແລະ ການເຄື່ອນໄຫວວຽກງານກວດກາລັດ ແລະ ຕ້ານການສໍ້ລາດບັງຫລວງ ສປປ ລາວ ໂດຍໄດ້ສຸມໃສ່ດໍາເນີນການຕິດຕາມ ການຄຸ້ມຄອງບໍລິຫານລັດ ແຕ່ລະຂັ້ນເປັນລະບົບ ແລະ ແຂງແຮງສົມຄວນ ເປັນຕົ້ນ ກວດກາບັນດາໂຄງການລົງທຶນຂອງລັດເຊິ່ງໃນໄລຍະຜ່ານມາ. ພ້ອມນັ້ນ, ກໍໄດ້ກວດກາການປະຕິບັດກົດໝາຍ, ລະບຽບການໃນການຄຸ້ມຄອງການຂຸດ ຄົ້ນຊັບ ພະຍາກອນ, ການຈັດຊື້ຈັດຈ້າງ ແລະ ການແກ້ໄຂຂໍ້ຂັດ ແຍ່ງຕ່າງໆ. ຜ່ານການຕິດຕາມ ກວດກາ ເຫັນໄດ້ຄວາມຮັບ ຜິດ ຊອບຂອງບຸກຄົນ, ການຈັດຕັ້ງ ແລະ ໄດ້ນໍາສະເໜີ ໃຫ້ມີການປັບປຸງແກ້ໄຂຕາມແຕ່ລະບັນຫາ, ແຕ່ລະກໍລະ ນີ ທີ່ເກີດຂຶ້ນຕາມກົດໝາຍ ແລະ ລະບຽບການກ່ຽວຂ້ອງກໍານົດໄວ້ ບົນພື້ນຖານນັ້ນໄດ້ດໍາເນີນການສືບສວນ-ສອບສວນ ຄະດີທີ່ກ່ຽວຂ້ອງກັບການສໍ້ລາດບັງຫລວງ ຕໍ່ເຈົ້າໜ້າທີ່ລັດ ແລະ ບຸກຄົນກ່ຽວຂ້ອງກັບຄະດີສໍ້ລາດບັງຫລວງ ເພີ່ມຂຶ້ນຫລາຍ. ສະເພາະແຕ່ຕົ້ນປີ 2024 ມານີ້ ໄດ້ດໍາເນີນການສືບສວນຕໍ່ເຈົ້າໜ້າທີ່ລັດທຸກລະດັບ 209 ຄົນ, ປະຕິບັດວິໄນທາງບໍລິຫານ 112 ຄົນ, ນອກນີ້ຍັງໄດ້ຄົ້ນຄວ້າ, ສ້າງ ແລະ ປັບປຸງບັນດານິຕິກຳຂອງສະພາແຫ່ງຊາດ (1 ສະບັບ), ນິຕິກຳຂອງຄະນະກວດກາສູນກາງພັກ-ອົງການກວດກາແຫ່ງລັດ 11 ສະບັບ, ຄົ້ນຄວ້າປັບປຸງດໍາລັດ 159 ວ່າດ້ວຍການແຈ້ງຊັບສິນຂອງພະນັກງານ-ລັດຖະກອນ ແລະ ອື່ນໆ, ນັບປີ 2023 ເຖິງປັດຈຸບັນ ອົງການກວດກາແຫ່ງລັດ ໄດ້ຮັບຄໍາຮ້ອງ ແລະ ຄໍາສະເໜີ 1.179 ສະບັບ, ຄໍາຮ້ອງຕົກຄ້າງແຕ່ປີ 2022 ທັງໝົດ 65 ສະບັບ, ລວມຄຳຮ້ອງທັງໝົດ 1.244 ສະບັບ. ໃນນີ້, ຄົ້ນຄວ້າພິຈາລະນາແລ້ວ 485 ສະບັບ, ສ່ວນຍັງເຫລືອແມ່ນສືບຕໍ່ແກ້ໄຂຕໍ່ໄປ, ຄໍາຮ້ອງ-ຄໍາສະເໜີ ທີ່ພົ້ນເດັ່ນກວ່າໝູ່ແມ່ນຂໍ້ຂັດແຍ່ງກ່ຽວກັບທີ່ດິນ, ເຮືອນ, ການດຳເນີນທຸລະກິດ, ຄວາມບໍ່ພໍໃຈຕໍ່ຂະບວນການສືບສວນ-ສອບສວນ ຫລື ຕໍ່ການປະຕິບັດຄໍາຕັດສິນຂອງສານ, ການລົງວິໄນຕໍ່ພະນັກງານ-ສະມາ ຊິກພັກ ແລະ ບັນຫາອື່ນໆ.

ພ້ອມນີ້, ຫົວໜ້າຄະນະທັງສອງຝ່າຍ ກໍໍໄດ້ຜັດປ່ຽນກັນມີຄຳເຫັນແລກປ່ຽນບົດຮຽນ ເຊິ່ງກັນ ແລະ ກັນໂດຍສະເພາະ ກ່ຽວ ກັບບັນຫາສິ່ງທ້າທາຍຕ່າງໆຕໍ່ການເຄື່ອນໄຫວວຽກວຽກງານຕິດຕາມກວດກາລັດ ແລະ ສະກັດກັ້ນຕ້ານການສໍ້ລາດບັງຫລວງ ແລະ ການໂຄສະນາບິດເບືອນຜ່ານສື່ສັງຄົມອອນລາຍ.

ຂ່າວ-ພາບ: ຕຸ່ນາ ເລົ່າຖາວອນ