ກອງປະຊຸມແລກປ່ຽນບົດຮຽນວຽກງານຄຸມຂັງ ລະຫວ່າງ ກົມຕຳຫລວດຄຸມຂັງ-ດັດສ້າງ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກົມໃຫຍ່ຄຸມຂັງ-ດັດສ້າງ ກະຊວງພາຍໃນ ແຫ່ງຣາຊະອານາຈັກກຳປູເຈຍ ຈັດຂຶ້ນໃນວັນທີ 14 ສິງຫາ 2024 ທີ່ນະຄອນຫລວງວຽງຈັນ, ນຳໂດຍ ທ່ານ ພົນຈັດຕະວາ ລັດສະໝີ ໄຊຍະຄຳ ຫົວໜ້າກົມຕຳຫລວດຄຸມຂັງ-ດັດສ້າງ ກະຊວງປ້ອງກັນຄວາມສະຫງົບລາວ ແລະ ທ່ານ ພົນໂທ ຊ້ອນ ຊານາດ ຫົວໜ້າກົມໃຫຍ່ຄຸມຂັງ-ດັດສ້າງ ກະຊວງພາຍໃນກໍາປູເຈຍ ໂດຍມີຄະນະຜູ້ແທນສອງຝ່າຍ ເຂົ້າຮ່ວມ.
ໃນກອງປະຊຸມ, ສອງຝ່າຍໄດ້ຜັດປ່ຽນກັນລາຍງານສະພາບການຈັດຕັ້ງປະຕິບັດ ວຽກງານຄຸມຂັງ ໃນໄລຍະຜ່ານມາ ແລະ ພ້ອມກັນປຶກສາຫາລືແລກປ່ຽນບົດຮຽນວຽກວິຊາສະເພາະ, ຕີລາຄາຄືນກ່ຽວກັບສະພາບການຮ່ວມມື ລະຫວ່າງ ສອງກົມໃນໄລຍະຜ່ານມາ ເພື່ອຮັດແໜ້ນ ແລະ ເສີມຂະຫຍາຍຄູ່ຮ່ວມມືຍຸດທະສາດ ແລະ ໝັ້ນຄົງຍາວນານ ເພື່ອການພັດທະນາຢ່າງຍືນຍົງ ລະຫວ່າງ ກົມຕຳຫລວດຄຸມຂັງ-ດັດສ້າງ ກະຊວງປ້ອງກັນຄວາມສະຫງົບລາວ ແລະ ກົມໃຫຍ່ຄຸມຂັງ-ດັດສ້າງ ກະຊວງພາຍໃນກຳປູເຈຍ ໃຫ້ຈະເລີນງອກງາມ ຕາມທີ່ກະຊວງປ້ອງກັນຄວາມສະຫງົບຂອງສອງປະເທດ ຊີ້ນໍາສອງກົມຄຸມຂັງລາວ-ກຳປູເຈຍ, ປະສານສົມທົບຊ່ວຍເຫລືອເຊິ່ງກັນ ແລະ ກັນ, ພ້ອມກັນແກ້ໄຂບັນຫາອາຊະຍາກຳ ແລະ ບັນຫາຫຍໍ້ທໍ້ຕ່າງໆທີ່ເກີດຂຶ້ນຂອງສອງປະເທດຕາມກົດໝາຍ ແລະ ລະບຽບຫລັກການທີ່ສອງລັດຖະບານ ຕົກລົງກັນ.
ໄລຍະຜ່ານມາ, ກົມຕຳຫລວດຄຸມຂັງສອງປະເທດລາວ-ກຳປູເຈຍ ກໍໄດ້ຢ້ຽມຢາມແລກປ່ຽນບົດຮຽນຕາມຮອບວຽນຢ່າງເປັນປົກກະຕິ. ຄຽງຄູ່ກັນນັ້ນ, ກໍໄດ້ປະສານສົມທົບຮ່ວມກັບພາກສ່ວນກ່ຽວຂ້ອງປຶກສາຫາລື ແລະ ໂອນຕົວນັກໂທດ ລາວ-ກຳປູເຈຍ ຄັ້ງທີ 1 ສໍາເລັດດ້ວຍດີ, ອັນເປັນການປະກອບສ່ວນ ເພື່ອຄວາມສະຫງົບ, ຄວາມເປັນລະບຽບຮຽບຮ້ອຍ, ພ້ອມກັນແກ້ໄຂບັນຫາຕ່າງໆດ້ວຍຄວາມເຂົ້າອົກເຂົ້າໃຈເຊິ່ງກັນ ແລະ ກັນ, ປະກອບສ່ວນສໍາຄັນເຂົ້າໃນການເສີມສ້າງສາຍພົວພັນແບບບ້ານໃກ້ເຮືອນຄຽງ, ຄວາມມຸ່ງມາດປາຖະໜາຂອງປະຊາຊົນສອງຊາດລາວ-ກຳປູເຈຍ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນ ແລະ ໃຫ້ມີຄວາມເລິກເຊິ່ງຫລາຍຂຶ້ນກວ່າເກົ່າ.
ໃນກອງປະຊຸມ, ທັງສອງຝ່າຍຍັງໄດ້ແລກປ່ຽນບົດຮຽນເຊິ່ງກັນ ແລະ ກັນ ໃນຂົງເຂດວຽກງານຄຸ້ມຄອງນັກໂທດ ໂດຍສະເພາະນັກໂທດຍິງ, ນັກໂທດທີ່ເປັນເດັກກະທຳຜິດ ແລະ ນັກໂທດຄະດີຢາເສບຕິດ; ແລກປ່ຽນຂໍ້ມູນນັກໂທດສັນຊາດລາວ ທີ່ພວມປະຕິບັດໂທດຢູ່ກຳປູເຈຍ ໃນປັດຈຸບັນ, ພ້ອມທັງສະເໜີຊຸກຍູ້ພາກສ່ວນທີ່ກ່ຽວຂ້ອງ ເພື່ອຂໍຄໍາຕັດສິນຂອງນັກໂທດສັນຊາດລາວ ທີ່ຖືກຕັດສິນລົງ ໂທດຢູ່ກຳປູເຈຍ; ແລກປ່ຽນບົດຮຽນວຽກງານສຶກສາອົບຮົມ ແລະ ຝຶກວິຊາຊີບທຳການຜະລິດແກ້ໄຂຊີວິດການເປັນຢູ່ໃຫ້ແກ່ນັກໂທດ; ແລກປ່ຽນບົດຮຽນກ່ຽວກັບການປະຕິບັດກົດໝາຍ ແລະ ນິຕິກຳທີ່ກ່ຽວຂ້ອງທີ່ເປັນບ່ອນອີງໃນການຈັດຕັ້ງປະຕິບັດວຽກງານຄຸມຂັງ-ດັດສ້າງ ແລະ ວຽກງານອື່ນໆທີ່ກ່ຽວຂ້ອງ.
ຂ່າວ-ພາບ: ໜັງສືພິມປ້ອງກັນຄວາມສະຫງົບ
