ວັນທີ 31 ກໍລະກົດ 2024 ຜ່ານມາ, ທີ່ນະຄອນຫລວງພະນົມເປັນ ຣາສະອານາຈັກກຳປູເຈຍ, ຄະນະຜູ້ແທນຂັ້ນສູງ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ນໍາໂດຍ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ໄດ້ພົບປະກັບ ທ່ານ ນາງ ເຈຍ ລຽງ ຫົວໜ້າອົງການໄອຍະການສູງສຸດ ແຫ່ງ ຣາຊະອານາ ຈັກກໍາປູເຈຍ ໂດຍມີຄະນະຜູ້ແທນທັງສອງຝ່າຍເຂົ້າຮ່ວມ.
ໃນວາລະດັ່ງກ່າວ, ທ່ານ ໄຊຊະນະ ໂຄດພູທອນ ໄດ້ສະແດງຄວາມຂອບໃຈ ທີ່ໄດ້ຮັບເຊື້ອເຊີນ ແລະ ຮັບຕ້ອນຢ່າງອົບອຸ່ນ, ພ້ອມຕີລາຄາສູງ ຕໍ່ຜົນສໍາເລັດຂອງການຮ່ວມມື ລະຫວ່າງ ອົງການໄອຍະການສອງປະເທດ ໃນການຈັດຕັ້ງປະຕິບັດບົດບັນທຶກຮ່ວມທີ່ໄດ້ລົງນາມກັນໃນປີ 2014 ທີ່ ຣາຊະອານາຈັກກໍາປູເຈຍ ແລະ ເຫັນດີເປັນເອກະພາບລົງນາມບົດບັນທຶກຊ່ວຍຈໍາ ໃນການປຶກສາຫາລືວຽກງານໄອຍະການຂອງສອງປະເທດ ໃນຊຸມປີຕໍ່ໜ້າ ແລະ ພ້ອມກັນລົງນາມໃນບົດບັນທຶກຊ່ວຍຈໍາ ໂດຍມີເນື້ອໃນຕົ້ນຕໍ ຄື: ສືບຕໍ່ແລກປ່ຽນໄປມາຢ້ຽມຢາມຄະນະຜູ້ແທນຂັ້ນສູງ, ຂັ້ນວິຊາການ ແລະ ຈັດກອງປະຊຸມອົງການໄອຍະການ ລາວ-ກໍາປູເຈຍ ກ່ຽວກັບການຮ່ວມມືສະກັດກັ້ນ ແລະ ຕ້ານອາຊະຍາກໍາຂ້າມຊາດ; ເຫັນດີຈະຈັດກອງປະຊຸມຊາຍແດນ ລະຫວ່າງ ອົງການໄອຍະການຂອງສອງປະເທດ ຢູ່ ສປປ ລາວ ໃນປີ 2025 ເພື່ອເປັນການສະເຫລີມສະຫລອງ ວັນສ້າງຕັ້ງອົງການໄອຍະການປະຊາຊົນ ແຫ່ງ ສປປ ລາວ ຄົບຮອບ 35 ປີ ກໍຄື ການສະເຫລີມສະຫລອງວັນຊາດແຫ່ງ ສປປ ລາວ ຄົບຮອບ 50 ປີ ເພື່ອເປັນການຍົກສູງສາຍພົວພັນມິດຕະພາບ ແລະ ການຮ່ວມມືວຽກງານໄອຍະການຂອງສອງຝ່າຍ; ເພີ່ມທະວີການພົວພັນຮ່ວມມື ລະຫວ່າງປະເທດ ທາງອາຍາ ແລະ ການສົ່ງຜູ້ຮ້າຍຂ້າມແດນ; ເພີ່ມທະວີການຮ່ວມມືລະຫວ່າງອົງການໄອຍະການ ບັນດາແຂວງທີ່ມີຊາຍແດນຕິດຈອດກັນ ກ່ຽວກັບບັນຫາອາຊະຍາກຳຂ້າມຊາດຢ່າງມີປະສິດທິຜົນ.
ການພົບປະຢ້ຽມຢາມຂອງຄະນະຜູ້ແທນໃນຄັ້ງນີ້, ໄດ້ເປັນພື້ນຖານສໍາຄັນທີ່ເຮັດໃຫ້ວຽກງານໄອຍະການຂອງສອງປະເທດ ໄດ້ຮັບການພັັດທະນາ, ຍົກສູງບົດບາດຄວາມສັກສິດຂອງກົດໝາຍ ໃນການຄຸ້ມຄອງລັດ, ຄຸ້ມຄອງສັງຄົມຂອງສອງປະເທດດ ຕ້ານອາຊະຍາກຳຂ້າມຊາດ, ປະກອບສ່ວນສໍາຄັນ ເຮັດໃຫ້ສອງປະເທດ ມີຄວາມສະຫງົບ ແລະ ຄວາມເປັນລະບຽບຮຽບຮ້ອຍ ເປັນຢ່າງດີ.
ຂ່າວ-ພາບ: ອອປສ
