ໃນຕອນບ່າຍ ຂອງວັນທີ 27 ກໍລະກົດ 2024 ນີ້, ທີ່ ກະຊວງເຕັກໂນໂລຊີ ແລະ ການສື່ສານ (ກຕສ), ໄດ້ມີກອງປະຊຸມພົບປະສອງຝ່າຍ ລະຫວ່າງ ກະຊວງເຕັກໂນໂລຊີ ແລະ ການສື່ສານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ກະຊວງໄປສະນີ ແລະ ໂທລະຄົມມະນາຄົມ ແຫ່ງ ຣາຊະອານາຈັກ ກຳປູ ເຈຍ. ຄະນະຜູ້ແທນຝ່າຍລາວ ນໍາໂດຍ ທ່ານ ບໍ່ວຽງຄຳ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ຄະນະຜູ້ແທນຝ່າຍກໍາປູເຈຍ ນໍາໂດຍ ທ່ານ ເຈຍ ວັນເດດ (Chea Vandeth), ລັດຖະມົນຕີ ກະຊວງໄປສະນີ ແລະ ໂທລະຄົມມະ ນາຄົມ ພ້ອມດ້ວຍຄະນະທັງສອງຝ່າຍ.
ຈຸດປະສົງຂອງກອງປະຊຸມພົບປະໃນຄັ້ງນີ້ ເພື່ອປຶກສາຫາລື, ແລກປ່ຽນກ່ຽວກັບແຜນການຮ່ວມມື ແລະ ບັນດາຂໍ້ສະເໜີຕ່າງໆໃນຕໍ່ໜ້າ. ທັງເປັນການຜັນຂະຫຍາຍບົດບັນທຶກຄວາມ ເຂົ້າໃຈ ວ່າດ້ວຍການຮ່ວມມືດ້ານໄປສະນີ, ໂທລະຄົມມະນາຄົມ, ເຕັກໂນໂລຊີການສື່ສານຂໍ້ມູນຂ່າວສານ ແລະ ລັດຖະບານດິຈິຕອນ ທີ່ໄດ້ຮ່ວມລົງນາມກັນໃນວັນທີ 11 ມີນາ ຜ່ານມາ ທີ່ນະຄອນຫຼວງພະນົມເປັນ, ຣາຊະອານາຈັກ ກໍາປູເຈຍ.
ພ້ອມດຽວກັນ ກໍເພື່ອເສີມຂະຫຍາຍການຮ່ວມມື ລະຫວ່າງສອງປະເທດໃນຂົງເຂດວຽກງານດັ່ງກ່າວ ໂດຍສະເພາະໃນດ້ານການພັດທະນາການບໍລິການລັດຖະບານດິຈິຕອນ, ການນຳໃຊ້ເຕັກໂນໂລຊີກຸ່ມຂໍ້ມູນຜູກພັນ (Blockchain) ແລະ ລະ ບົບຢັ້ງຢືນເອກະສານພາກລັດ; ການແລກປ່ຽນບົດຮຽນ, ຂໍ້ມູນຂ່າວສານ ແລະ ບຸກຄະລາກອນ, ການຖ່າຍທອດເຕັກໂນໂລຊີ ລວມເຖິງການຈັດຝຶກອົບຮົມຮ່ວມກັນ.
ໃນໂອກາດນີ້, ທ່ານ ບໍ່ວຽງຄຳ ວົງດາລາ ໄດ້ກ່າວສະແດງຄວາມປິຕິຊົມຊື່ນ ແລະ ເປັນກຽດຢ່າງສູງ ທີ່ໄດ້ຕ້ອນຮັບ ທ່ານລັດຖະມົນຕີ ເຈຍ ວັນເດດ ພ້ອມດ້ວຍຄະນະ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້. ທັງນີ້ກໍເພື່ອຮ່ວມກັນເສີມຂະຫຍາຍສາຍພົວພັນມິດຕະພາບທີ່ມີມູນເຊື້ອ, ການພົວພັນແບບຄູ່ຮ່ວມມືຍຸດທະສາດຮອບດ້ານ ແລະ ໝັ້ນຄົງຍາວນານ ລະຫວ່າງ ລາວ-ກຳປູເຈຍ ກໍຄືການຮ່ວມມືໃນຂະແໜງໄປສະນີ, ໂທລະຄົມມະນາຄົມ, ເຕັກໂນໂລຊີ ແລະ ລັດຖະບານດິຈິຕອນ ໃຫ້ມີຄວາມກ້າວໜ້າ ແລະ ປະສິດທິຜົນສູງສຸດ. ພ້ອມນີ້, ທ່ານຍັງໄດ້ຕີລາຄາສູງ ຕໍ່ຜົນສຳເລັດຂອງການພົບປະໃນຄັ້ງນີ້ ທີ່ໄດ້ວາງທິດທາງແຜນການຮ່ວມມືໃນຕໍ່ໜ້າຮ່ວມກັນ. ຊຶ່ງໄດ້ເປັນພື້ນຖານອັນໜັກແໜ້ນ ໃຫ້ບັນດາພາກສ່ວນ ທີ່ກ່ຽວຂ້ອງຂອງທັງສອງກະຊວງ ນຳໄປຈັດຕັ້ງຜັນຂະຫຍາຍ ໃຫ້ເກີດດອກອອກຜົນຍິ່ງຂຶ້ນ.
ພາຍຫຼັງສໍາເລັດກອງປະຊຸມ, ໄດ້ມີພິທີ ມອບ-ຮັບ ຄອມ ພິວເຕີ ຈຳນວນ 300 ຊຸດ ຈາກລັດຖະບານ ແຫ່ງ ຣາຊະອານາ ຈັກ ກຳປູເຈຍ ໃຫ້ແກ່ ກະຊວງເຕັກໂນໂລຊີ ແລະ ການສື່ສານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.
ຕາງໜ້າມອບໂດຍ ທ່ານ ເຈຍ ວັນເດດ, ລັດຖະມົນຕີ ກະຊວງໄປສະນີ ແລະ ໂທລະຄົມມະນາຄົມ ແຫ່ງ ຣາຊະອານາຈັກ ກຳປູ ເຈຍ ແລະ ຕາງໜ້າຮັບໂດຍ ທ່ານ ບໍ່ວຽງຄຳ ວົງດາລາ, ລັດຖະມົນ ຕີ ກະຊວງເຕັກໂນໂລຊີ ແລະ ການສື່ສານ ແຫ່ງ ສປປ ລາວ ໂດຍມີຄະນະຜູ້ແທນທັງສອງຝ່າຍເຂົ້າຮ່ວມ.
ທີ່ມາ: ຂ່າວສານເຕັກໂນໂລຊີ ແລະ ການສື່ສານ
