ສປປ ລາວ ຈະເປັນເຈົ້າພາບຈັດການແຂ່ງຂັນກິລາປິ່ງປ່ອງ ຊິງແຊ້ມຊາວໜຸ່ມອາຊີ ຄັ້ງທີ 26 ໃນລະຫວ່າງວັນທີ 1 – 6 ກັນຍາ 2022 ທີ່ສູນການຄ້າ ລາວ-ໄອເຕັກມໍ ນະຄອນຫລວງວຽງຈັນ.
ພິທີຖະແຫຼງຂ່າວຢ່າງເປັນທາງການຈັດຂຶ້ນຕອນບ່າຍວັນທີ 16 ສິງຫາ 2022, ທີ່ໂຮງແຮມແລນມາກ ນະຄອນ ຫລວງວຽງຈັນ,ໂດຍການເປັນປະທານຮ່ວມຂອງ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະກິລາ ປະທານຄະນະກໍາມະການໂອລິມປິກແຫ່ງຊາດລາວ ແລະ ທ່ານ ນາງ ແສງເດືອນ ຫຼ້າຈັນທະບູນ ປະທານສະຫະພັນກິລາປິ່ງປ່ອງແຫ່ງຊາດລາວ.
ທ່ານ ພຸດ ສິມມາລາວົງ ໃຫ້ຮູ້ວ່າ: ການທີ່ໄດ້ຮັບກຽດເປັນເຈົ້າພາບຈັດງານແຂ່ງຂັນລະດັບພາກພື້ນນີ້ ແມ່ນເປັນການອ້າງອີງເຖິງບັນດາປະເທດສະມາຊິກອາຊີໄດ້ຮັບຮູ້ ແລະ ເຊື້ອໝັ້ນ ຕໍ່ການຊີ້ນຳ ນຳພາ ຂອງພັກ-ລັດຖະບານລາວ ຕໍ່ວຽກງານກິລາ-ກາຍຍະກໍາຂອງພວກເຮົາ. ການເປັນເຈົ້າພາບລ້ວນແຕ່ມີຄວາມໝາຍຄວາມສໍາຄັນ ເປັນການຮັດແໜ້ນຄວາມສາມັກຄີກັບບັນດາປະເທດສະມາຊິກ ຕອບສະໜອງແນວທາງນະໂຍບາຍ ກ່ຽວກັບວຽກງານພົວພັນການຕ່າງປະເທດ, ເປັນການພັດທະນາບຸກຄະລາກອນ ແລະ ພື້ນຖານໂຄງລ່າງ ວຽກງານກິລາ-ກາຍຍະກຳ ແລະ ເປັນການໂຄສະນາເຜີຍແຜ່ ການທ່ອງທ່ຽວຂອງລາວເຮົາຂຶ້ນໄປອີກກ້າວໜື່ງ.
ໃນນາມ ກະຊວງສຶກສາທິການ ແລະ ກິລາ ທີ່ຊີ້ນຳວຽກງານກິລາ-ກາຍຍະກຳ ຂໍສະແດງຄວາມຂອບໃຈ ມາຍັງສະຫະພັນກິລາປິ່ງປ່ອງແຫ່ງຊາດລາວ, ຜູ້ໃຫ້ການສະໜັບສະໜູນ ແລະ ທຸກພາກສ່ວນທີ່ມີສ່ວນຮ່ວມ ໃນການກະກຽມງານທີ່ມີຄວາມຕັດສິນໃຈສູງ, ເສຍສະຫຼະເຫື່ອແຮງ ສະຕິປັນຍາ ເພື່ອເຮັດໃຫ້ການເປັນເຈົ້າພາບຈັດງານແຂ່ງຂັນຊິງແຊ້ມຊາວໜຸ່ມ ອາຊີ ຄັ້ງທີ 26 ນີ້ ໄດ້ຮັບຜົນສຳເລັດຕາມທີ່ໄດ້ວາງໄວ້, ໃຫ້ຄະນະຈັດການແຂ່ງ ຂັນ ເອົາໃຈໃສ່ການຮັກສາຄວາມສະຫງົບ ແລະ ຄວາມປອດໄພ ເປັນອັນດັບຕົ້ນ, ທັງເອົາໃຈໃສ່ຕໍ່ມາດຕະການປ້ອງກັນ ແລະ ສະກັດກັ້ນ ການແຜ່ລະບາດຂອງພະຍາດໂຄວິດ-19 ໃນສະຖານທີ່ພັກເຊົາ, ສະຖານທີ່ແຂ່ງຂັນ, ສະຖານທີ່ງານລ້ຽງຕ້ອນຮັບ ແລະ ສະຖານທີ່ອື່ນໆ, ນອກນັ້ນ ຂໍໃຫ້ຄະນະຮັບຜິດຊອບຈັດງານແຂ່ງຂັນ ແລະ ກຳມະ ການຝ່າຍຕ່າງໆ ໄດ້ເອົາໃຈໃສ່ຕໍ່ໜ້າທີ່ຄວາມຮັບຜິດຊອບຂອງຕົນ ເພື່ອກ້າວໄປສູ່ຜົນສຳເລັດ ໃນການເປັນເຈົ້າພາບທີ່ດີ ແລະຂໍໃຫ້ຄະນະນັກກິລາປິ່ງປ່ອງທີມຊາດລາວ ເອົາໃຈໃສ່ໃນການຝຶກແອບ ມີຜົນສຳເລັດໃນການແຂ່ງຂັນ ແລະເປັນແບບຢ່າງນັກກິລາທີ່ມີນໍ້າໃຈມິດຕະພາບ, ນໍ້າໃຈນັກກິລາຂອງທີມເຈົ້າພາບ ຕໍ່ຜູ້ເຂົ້າຮ່ວມການແຂ່ງຂັນ.
ໃນງານແຂ່ງຂັນຄັ້ງນີ້ ມີນັກກິລາ 211 ຄົນຈາກ 20 ປະ ເທດ ໄດ້ລົງທະບຽນເຂົ້າຮ່ວມການແຂ່ງຂັນ ໂດຍມີຄະນະເຕັກນິກ ແລະກຳມະການຕັດສິນຈາກສາກົນມາຈາກ 20 ປະເທດ ຈຳນວນ 40 ຄົນ. ສ່ວນສະໜາມແຂ່ງຂັນຈະຈັດຂຶ້ນຢູ່ທີ່ສູນການຄ້າ ລາວ-ໄອເຕັກມໍ ຊັ້ນ 7.
