ສປປ ລາວ ໃນນາມເປັນປະທານອາຊຽນ ພາຍໃຕ້ຄຳຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ຈະເປັນເຈົ້າພາບ ແລະ ປະທານກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ບັນດາກອງປະຊຸມທີ່ກ່ຽວຂ້ອງ ໃນວັນທີ 21-27 ກໍລະກົດ 2024 ທີ່ຈະມາເຖິງນີ້, ຢູ່ ຫໍປະຊຸມເເຫ່ງຊາດ ນະຄອນຫລວງວຽງຈັນ.
ໃນໂອກາດ ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ຄັ້ງນີ້, ຈະມີກອງປະຊຸມລະດັບລັດຖະມົນຕີຕ່າງປະເທດ ລວມທັງໝົດ 25 ກອງປະຊຸມ ໂດຍມີລັດຖະມົນຕີຕ່າງປະເທດ ແລະ ຜູ້ຕາງໜ້າຈາກ 31 ປະເທດເຂົ້າຮ່ວມ ແລະ ຄາດວ່າ ຈະມີຜູ້ແທນຕ່າງປະເທດຫລາຍກວ່າ 1.000 ທ່ານ ແລະ ມີນັກຂ່າວຕ່າງປະເທດປະມານ 500 ທ່ານ. ບັນດາກອງປະຊຸມຄັ້ງນີ້, ຈະໄດ້ສຸມໃສ່ປຶກສາຫາລືການຮ່ວມມືສົ່ງເສີມປະຊາຄົມອາຊຽນ ກໍຄືການສົ່ງເສີມການເຊື່ອມຈອດ ແລະ ເຂັ້ມເເຂງຂອງອາຊຽນ ຕາມຄໍາຂວັນປະທານອາຊຽນຂອງ ສປປ ລາວ ໂດຍຜ່ານການຈັດຕັ້ງປະຕິບັດ 9 ບຸລິມະສິດສໍາລັບການເປັນປະທານອາຊຽນຂອງ ສປປ ລາວ ປີ 2024, ການຈັດຕັ້ງປະຕິບັດວິໄສທັດ ປະຊາຄົມອາຊຽນ 2025 ແລະ ການສ້າງແຜນຍຸດທະສາດ ເພື່ອຈັດຕັ້ງປະຕິບັດວິໄສທັດປະຊາຄົມອາຊຽນ 2045. ພ້ອມກັນນີ້, ກໍຈະປຶກສາຫາລືການຮ່ວມມືລະຫວ່າງ ອາຊຽນກັບພາຍນອກ ໂດຍຜ່ານກົນໄກການຮ່ວມມືທີ່ອາຊຽນສ້າງຕັ້ງຂຶ້ນ ແລະ ແລກປ່ຽນຄວາມຄິດຄວາມເຫັນກ່ຽວກັບບັນຫາພາກພື້ນ ແລະ ສາກົນທີ່ມີຄວາມສົນໃຈຮ່ວມກັນ.
ກອງປະຊຸມດັ່ງກ່າວ, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີຕ່າງປະເທດ ຈະໄດ້ເປັນປະທານ ແລະ ປະທານຮ່ວມໃນກອງປະຊຸມຕ່າງໆ ເປັນຕົ້ນ ກອງປະຊຸມຄະນະກຳມະການເຂດປອດອາວຸດນິວເຄລຍ ອາຊີຕາເວັນອອກສ່ຽງໃຕ້; ກອງປະຊຸມພົບປະລະຫວ່າງ ລັດຖະມົນຕີຕ່າງປະເທດອາຊຽນ ກັບຜູ້ຕາງໜ້າຄະນະກຳມາທິການ ລະຫວ່າງ ລັດຖະບານອາຊຽນ ວ່າດ້ວຍສິດທິມະນຸດ; ກອງປະຊຸມປຶກສາຫາລືເເບບບໍ່ເປັນທາງການ ລະຫວ່າງ ອະດີດປະທານອາຊຽນ, ປະທານອາຊຽນໃນປັດຈຸບັນ ແລະ ປະທານອາຊຽນໃນອະນາຄົດ ກ່ຽວກັບການຈັດຕັ້ງປະຕິບັດ 5 ຂໍ້ຕົກລົງຂອງຜູ້ນໍາອາຊຽນ; ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 (ເເບບຄົບຄະນະ); ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 (ເເບບວົງເເຄບ); ກອງປະຊຸມລັດຖະມົນຕີຕ່າງປະເທດ ລາວ-ນອກເເວ ແລະ ເລຂາທິການໃຫຍ່ອາຊຽນ; ກອງປະຊຸມລັດຖະມົນຕີຕ່າງປະເທດ ລາວ-ຕວັກກີ ແລະ ເລຂາທິການໃຫຍ່ອາຊຽນ; ກອງປະຊຸມລັດຖະມົນຕີຕ່າງປະເທດ ລາວ-ສະວິດ ແລະ ເລຂາທິການໃຫຍ່ອາຊຽນ; ກອງປະຊຸມລັດຖະມົນຕີຕ່າງປະເທດອາຊຽນ-ອົດສະຕຣາລີ ໃນນາມ ສປປ ລາວ ເປັນປະເທດປະສານງານການພົວພັນຮ່ວມມືອາຊຽນ-ອົດສະຕຣາລີ; ກອງປະຊຸມລັດຖະມົນຕີຕ່າງປະເທດ ອາຊຽນບວກສາມ ຄັ້ງທີ 25; ກອງປະຊຸມລັດຖະມົນຕີຕ່າງປະເທດຂອງກອງປະຊຸມສຸດຍອດອາຊີຕາເວັນອອກ (EAS) ຄັ້ງທີ 14 ແລະ ກອງປະຊຸມລັດຖະມົນຕີຕ່າງປະເທດເວທີພາກພື້ນອາຊຽນ ຄັ້ງທີ 31.
ນອກຈາກນີ້, ທ່ານຮອງນາຍົກລັດຖະມົນຕີ ຍັງຈະໄດ້ເປັນເຈົ້າພາບ ແລະ ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ແລະ ບັນດາຄູ່ເຈລະຈາຄື: ກອງປະຊຸມລັດຖະມົນຕີຕ່າງປະເທດອາຊຽນ-ຈີນ; ກອງປະຊຸມລັດຖະມົນຕີຕ່າງປະເທດອາຊຽນ-ນູເເວນເຊລັງ; ກອງປະຊຸມລັດຖະມົນຕີຕ່າງປະເທດອາຊຽນ-ຍີ່ປຸ່ນ; ກອງປະຊຸມລັດຖະມົນຕີຕ່າງປະເທດອາຊຽນ-ສະຫະພາບເອີຣົບ; ກອງປະຊຸມລັດຖະມົນຕີຕ່າງປະເທດອາຊຽນ-ສ ເກົາຫລີ; ກອງປະຊຸມລັດຖະມົນຕີຕ່າງປະເທດອາຊຽນ-ອິນເດຍ; ກອງປະຊຸມລັດຖະມົນຕີຕ່າງປະເທດອາຊຽນ-ຣັດເຊຍ; ກອງປະຊຸມລັດຖະມົນຕີຕ່າງປະເທດອາຊຽນ-ຣາຊະອານາຈັກອັງກິດ; ກອງປະຊຸມລັດຖະມົນຕີຕ່າງປະເທດອາຊຽນ-ອາເມລິກາ ແລະ ກອງປະຊຸມລັດຖະມົນຕີຕ່າງປະເທດອາຊຽນ-ການາດາ. ພ້ອມນີ້, ທ່ານຮອງນາຍົກລັດຖະມົນຕີ ສະເຫລີມໄຊ ກົມມະສິດ ຈະໄດ້ເປັນປະທານຮ່ວມກອງປະຊຸມໃນຂອບແມ່ນໍ້າຂອງຄື: ກອງປະຊຸມລັດຖະມົນຕີຕ່າງປະເທດເເມ່ນໍ້າຂອງ-ອາເມລິກາ ຄັ້ງທີ 3; ກອງປະຊຸມລັດຖະມົນຕີຕ່າງປະເທດເເມ່ນໍ້າຂອງ-ຍີ່ປຸ່ນ ຄັ້ງທີ 15 ແລະ ກອງປະຊຸມລັດຖະມົນຕີຕ່າງປະເທດເເມ່ນໍ້າຂອງ-ສ ເກົາຫລີ ຄັ້ງທີ 12.
ໃນໂອກາດນີ້, ທ່ານ ສະເຫລີມໄຊ ກົມມະສິດ ຍັງຈະມີການພົບປະສອງຝ່າຍກັບລັດຖະມົນຕີຕ່າງປະເທດຂອງປະເທດຕ່າງໆອີກດ້ວຍ.
ໃນໂອກາດກອງປະຊຸມຄັ້ງນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ເເຫ່ງ ສປປ ລາວ ໃນນາມປະທານອາຊຽນປີ 2024 ຈະໄດ້ຕ້ອນຮັບການເຂົ້າຢ້ຽມຂໍ່ານັບຂອງບັນດາລັດຖະມົນຕີຕ່າງປະເທດ ທີ່ມາເຂົ້າຮ່ວມກອງປະຊຸມ ໃນຄັ້ງນີ້.
ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ບັນດາກອງປະຊຸມກ່ຽວຂ້ອງ ຈະສໍາເລັດໃນຕອນບ່າຍຂອງວັນທີ 27 ກໍລະກົດ 2024.
ຂ່າວ: ກຕທ
