ກອງປະຊຸມພົບປະການຮ່ວມມືດ້ານອຸດສາຫະກຳການທ່ອງທ່ຽວ ລາວ-ຈີນ ຈັດຂຶ້ນຕອນບ່າຍວັນທີ 3 ມິຖຸນາ 2024 ທີ່ຫໍວັດທະນາທໍາແຫ່ງຊາດ ນະຄອນຫລວງວຽງຈັນ ໂດຍການເປັນປະທານຂອງທ່ານ ນາງ ດາລານີ ພົມມະວົງສາ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ. ມີທ່ານ ສາລີ ພິມພິນິດ ປະທານສະມາຄົມສົ່ງເສີມການທ່ອງທ່ຽວລາວ-ຈີນ, ທ່ານ ຈາງ ຊີຫຼົງ ອາດີດຮອງຫົວໜ້າກົມເຈົ້າໜ້າທີ່ອາວຸໂສຂັ້ນ 1 ກົມພົວພັນ ແລະ ຮ່ວມມືສາກົນ ກະຊວງວັດທະນະທຳ ແລະ ທ່ອງທ່ຽວ ແຫ່ງປະເທດຈີນ, ທ່ານ ຢູ ຈີນຟາງ ປະທານສະພາການທ່ອງທ່ຽວຈີນ ພ້ອມດ້ວຍພາກສ່ວນກ່ຽວຂ້ອງສອງຝ່າຍເຂົ້າຮ່ວມ.
ໂອກາດນີ້, ທ່ານນາງ ດາລານີ ພົມມະວົງສາ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ມີຄຳເຫັນວ່າ: ກອງປະຊຸມພົບປະແລກປ່ຽນຄັ້ງນີ້ ແມ່ນເວທີໜຶ່ງທີ່ມີຄວາມໝາຍສໍາຄັນ ເພື່ອເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ການເປັນຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ- ຈີນ, ຈີນ-ລາວ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ນັບມື້ໄດ້ນັບໄດ້ຮັບການເພີ່ມພູນຄູນສ້າງຢ່າງຕໍ່ເນື່ອງ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນຂອງສອງຊາດ ເວົ້າລວມ ເວົ້າສະເພາະ ການສົ່ງເສີມການທ່ອງທ່ຽວເປັນໜຶ່ງໃນແຜນວຽກບຸລິມະສິດທີ່ສໍາຄັນຂອງລັດຖະບານລາວ ແລະ ພາຍໃຕ້ການສະໜັບສະໜູນ ຮ່ວມມືຢ່າງຈິງໃຈຂອງ ສປ ຈີນ ໃນໄລຍະຜ່ານມາ.
ທ່ານຮອງລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະທ່ອງທ່ຽວ ໃຫ້ຮູ້ຕື່ມວ່າ: ຜົນຂອງກອງປະຊຸມພົບປະແລກປ່ຽນຄັ້ງນີ້ ຍັງຈະສົ່ງຜົນດີໃຫ້ແກ່ ສປປລາວ ໃນການສົ່ງເສີມທ່າແຮງດ້ານການທ່ອງທ່ຽວຂອງຕົນ ໃຫ້ຄະນະຜູ້ແທນ ຈາກຈີນ ໄດ້ຮັບຮູ້ ແລະ ສ້າງກາລະໂອກາດໃນການລົງທຶນ ດ້ານການທ່ອງທ່ຽວ ຢູ່ ສປປ ລາວ ຕື່ມອີກ. ແລະຫວັງຢ່າງຍິ່ງວ່າ ການເປີດປີທ່ອງທ່ຽວ ລາວ 2024 ນີ້ ຈະເປັນໂອກາດອັນດີ ເພື່ອໃຫ້ປະຊາຊົນຈີນ ກໍຄືນັກທ່ອງທ່ຽວຕ່າງປະເທດ ຈາກທຸກມຸມໂລກໄດ້ມາຢຽມຢາມ. ທ່ອງທ່ຽວສະຖານທີ່ທ່ອງທ່ຽວວັດທະນະທໍາ ທໍາມະຊາດ ແລະ ປະຫວັດສາດ ທີ່ມີຄວາມຫຼາກຫຼາຍ ຂອງ ສປປ ລາວ ທັງໄດ້ຮັບຮູ້ເຂົ້າໃຈເມື່ອມາສໍາຜັດດ້ວຍຕົນເອງ ໃນຄວາມຫຼາກຫຼາຍ, ຄວາມສວຍງາມ, ຄວາມໂດດເດັ່ນ ແລະເປັນເອກະລັກຂອງວັດທະນະທໍາລາວ ໂດຍຜ່ານການນໍາໃຊ້ເສັ້ນທາງລົດໄຟລາວ – ຈີນ. ໂດຍສະເພາະ ໃນໄລຍະປີທ່ອງທ່ຽວລາວ 2024 ລັດຖະບານ ສປປ ລາວ ໄດ້ມີນະໂຍບາຍຍົກເວັ້ນວີຊາ ແບບບໍ່ຕິດວີຊາສະຕິກເກີ ສໍາລັບນັກທ່ອງທ່ຽວຈີນ, ຮົງກົງ, ມາເກົາ ທີ່ຖືໜັງສືຜ່ານແດນ ທໍາມະດາ ລວມທັງ ນັກທ່ອງທ່ຽວຈີນທີ່ເປັນກຸ່ມທີ່ຖືໜັງສືຜ່ານແດນໄຕ້ຫວັນ ແມ່ນອອກວີຊາປິວ ແຕ່ບໍ່ຕິດວີຊາສະຕິກເກີ, ທີ່ມາທ່ອງທ່ຽວ ເປັນກຸ່ມໃນນາມບໍລິສັດນໍາທ່ຽວ ສາມາດພັກເຊົາໄດ້ 15 ວັນ ແຕ່ຕ້ອງໃຫ້ຜ່ານການບໍລິການຂອງບໍລິສັດນໍາທ່ຽວ ທີ່ຢູ່ ສປປ ລາວ ແລະ ໄດ້ລົງທະບຽນຮັບຮອງຈາກກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ .
