ວັນທີ 4 ກໍລະກົດ 2024 ທີ່ໂຮງແຮມແລນມາກ, ນະຄອນຫລວງວຽງຈັນ ໄດ້ຈັດພິທີເຊັນບົດບັນທຶກຄວາມເຂົ້າໃຈ ລະຫວ່າງ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແລະ ກຸ່ມບໍລິສັດທຣິບການຄ້າ ຊຽງໄຮ ແຫ່ງ ສປ ຈີນ, ໂດຍມີ ທ່ານ ນາງ ສວນສະຫວັນ ວິຍະເກດ, ລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ທ່ານ ຈ້າວ ເຫວິນຢູ (Zhao Wenyu), ທູດເສດຖະກິດ ແລະ ການຄ້າ, ສປ ຈີນ ປະຈຳລາວ, ທ່ານ ເສິນກວນສີ (Chen Guanqi) ຮອງປະທານ ກຸ່ມບໍລິສັດທຣິບ ການຄ້າຊຽງໄຮ ແຫ່ງ ສປ ຈີນ ແລະ ພາກສ່ວນທີ່ກ່ຽວຂ້ອງຂອງສອງຝ່າຍເຂົ້າຮ່ວມ.
ຈຸດປະສົງຂອງການເຊັນບົດບັນທຶກໃນຄັ້ງນີ້ ເພື່ອພັດທະນາ ແລະ ສົ່ງເສີມການຕະຫຼາດທ່ອງທ່ຽວລາວ, ນໍາສະເໜີທ່າເເຮງຜະລິດຕະພັນການທ່ອງທ່ຽວ, ການບໍລິການ ເພື່ອດຶງດູດນັກທ່ອງທ່ຽວຈີນໃຫ້ເຂົ້າມາທ່ອງທ່ຽວລາວນັບມື້ນັບເພີ່ມຂຶ້ນ. ການລົງນາມໃນຄັ້ງນີ້ ຈະເປັນບາດກ້າວທີ່ສໍາຄັນ ເພື່ອປະກອບສ່ວນເຂົ້າໃນການຈັດຕັ້ງປີທ່ອງທ່ຽວລາວ 2024. ພ້ອມດຽວກັນນີ້ຈະເປັນໂອກາດທີ່ດີສໍາລັບການພັດທະນາ ສົ່ງເສີມການຕະຫຼາດຂອງລາວ ໃນຕະຫຼາດນັກທ່ອງທ່ຽວຈີນ, ລວມທັງການນໍາໃຊ້ເຕັກໂນໂລຊີ ໃນຂະແໜງການທ່ອງທ່ຽວ. ສອງຝ່າຍຈະພ້ອມກັນສ້າງແຜນກິດຈະກຳໂຄສະນາການທ່ອງທ່ຽວລາວ ແນໃສ່ຍົກລະດັບການບໍລິການ, ສ້າງລາຍການທ່ອງທ່ຽວທີ່ຫຼາກຫຼາຍ ເພື່ອດຶງດູດນັກທ່ອງທ່ຽວຈີນມາທ່ຽວລາວ.
ທ່ານ Chen Guangi ຮອງປະທານກຸ່ມ ບໍລິສັດ ທຣິບການຄ້າ ຊຽງໄຮ ແຫ່ງ ສປ ຈີນ ໃຫ້ຮູ້ວ່າ: ກຸ່ມບໍລິສັດ ທຣິບການຄ້າ ຊຽງໄຮ ຈໍາກັດ ເປັນບໍລິສັດໜຶ່ງໃຫ້ການບໍລິ ການຂໍ້ມູນການທ່ອງທ່ຽວ, ຈັດຢູ່ໃນອັນດັບແຖວໜ້າຂອງໂລກ ແລະ ເຫັນວ່າ ສປປ ລາວ ມີທ່າແຮງເປັນຈຸດໝາຍປາຍທາງຂອງການທ່ອງທ່ຽວ. ບໍລິສັດ ຢັ້ງຢືນວ່າ ຈະນໍາສະເໜີບັນດາແຫຼ່ງທ່ອງທ່ຽວທີ່ໂດດເດັ່ນ ແລະ ເປັນເອກະລັກດັ່ງກ່າວຂອງລາວ ເພື່ອໃຫ້ນັກທ່ອງທ່ຽວຈີນໄດ້ຮັບຮູ້.
ບໍລິສັດ ທຣິບການຄ້າ ຊຽງໄຮ ຈໍາກັດ ຍາມໃດກໍ່ຖືເອົາການບໍລິການຂໍ້ມູນຂ່າວສານ, ການໂຄສະນາການທ່ອງທ່ຽວລາວຕໍ່ລູກຄ້າດ້ວຍຄວາມປະກັນໃຈ, ມີຄຸນນະພາບ ແລະ ດີທີ່ສຸດ. ພ້ອມນີ້ ທ່ານສະແດງຄວາມເຊື່ອໝັ້ນວ່າ: ດ້ວວຍປະສົບການ, ເຕັກໂນໂລຊີ, ບົດຮຽນຫຼາກຫຼາຍ ແລະ ມີຄວມທີ່ເຂັ້ມແຂງ ຈະເຮັດໃຫ້ການນໍາສະເໜີ ແລະ ໂຄສະນາດ້ານການທ່ອງທ່ຽວລາວສູ່ຕະຫຼາດໂລກໃຫ້ນັບມື້ກວ້າງຂວາງ.
ປັດຈຸບັນ ນັກທ່ອງທ່ຽວຈີນ ໄດ້ກາຍເປັນຕະຫຼາດທ່ອງທ່ຽວອັນດັບ 3 ຂອງລາວ. ໃນ 4 ເດືອນຂອງປີ 2024 ນັກທ່ອງທ່ຽວຈີນ ມາທ່ຽວລາວ 351,419 ເທື່ອຄົນ ເພີ່ມຂຶ້ນ 67% ຖ້າທຽບໃສ່ເວລາດຽວກັນຂອງປີ 2023; ຄາດຄະເນວ່າຮອດທ້າຍປີ 2024 ຈະບັນລຸໄດ້ 8 ແສນ ເທື່ອຄົນ.
ຮ່ວມລົງນາມໃນພິທີຄັ້ງນີ້ ຝ່າຍລາວ ແມ່ນທ່ານ ຄົມ ດວງ ຈັນທາ, ຫົວໜ້າກົມໂຄສະນາການທ່ອງທ່ຽວ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແລະ ຝ່າຍຈີນ ແມ່ນ ທ່ານ ນາງ ຊຳເມີ້ ຫວັງ, ຫົວໜ້າການຕະຫຼາດພາກພື້ນ ກຸ່ມບໍລິສັດທຣິບການຄ້າ ຊຽງໄຮ ແຫ່ງ ສປ ຈີນ.
