ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ສະມາຄົມຈີນ ນະຄອນຫຼວງວຽງຈັນ, ມູນນິທິຈີນ, ສູນຊ່ວຍເຫຼືອຊາວຈີນພົ້ນທະເລ ແລະ ໜ່ວຍກູ້ໄພ 1628 ຮ່ວມກັບ ພະແນກບໍລິຫານເຫດສຸກເສີນເຂດກວາງຊີ ຊົນເຜົ່າຈ້ວງປົກ ຄອງຕົນເອງ, ສູນຫຼຸດຜ່ອນໄພພິບັດແຫ່ງຊາດ ກະຊວງບໍລິຫານເຫດສຸກເສີນຂອງ ສ ປ ຈີນ, ກອງທຶນການກຸສົນຜິງຫຼານ, ນະຄອນປັກກິ່ງໄດ້ຝຶກອົບຮົມກິດຈະກໍາການບໍລິຫານເຫດສຸກເສີນໃນຕົວເມືອງຮ່ວມມື ມິດຕະພາບ ລາວ-ຈີນ ຈັດຂຶ້ນໃນລະຫວ່າງວັນທີ 25- 27ພຶດສະພານີ້ ທີ່ມູນນິທີຈີນໂດຍການເຂົ້າຮ່ວມຂອງທ່ານ ຫຼິວຈີອີວ ຫົວໜ້າຫ້ອງການສະຖານທູດຈີນປະຈໍາ ສປປ ລາວ, ທ່ານ ຄໍາແກ້ວ ມະຫາໄຊ ຮອງຫົວໜ້າພະແນກ ແຮງ ງານ ແລະ ສະຫວັດດີການສັງຄົມ ນະຄອນຫຼວງວຽງຈັນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ໄຊປະເສີດ ຕັ້ງຊະນະ ຫົວໜ້າສູນຊ່ວຍເຫຼືອຊາວຈີນພົ້ນທະເລ ໃຫ້ຮູ້ວ່າ: ກິດຈະກຳ ຮ່ວມມື ມິດຕະພາບລາວ – ຈີນ ຄັ້ງນີ້ ໄດ້ຈັດຝືກອົບຮົມໃຫ້ແກ່ບັນດາໜ່ວຍກູ້ໄພ ພາຍໃນນະຄອນຫຼວງວຽງຈັນ ໄດ້ຮູ້ກ່ຽວກັບພື້ນຖານ, ຄວາມຮູ້ໃນການອອກປະຕິບັດງານຊ່ວຍເຫຼືອສັງຄົມ, ຊ່ວຍເຫຼືອປະຊາຊົນໃນເວລາມີເຫດສູກເສີນເກີດຂຶ້ນ ເປັນຕົ້ນ: ການເກີດອຸປະເຫດ, ອັກຄີໄພ, ໄພທຳມະຊາດ ແລະ ອື່ນໆ ເພື່ອເຮັດແນວໃດໃນການຊ່ວຍເຫຼືອດັ່ງກ່າວຕ້ອງໃຫ້ທັນເວລາ, ທັນເຫດການ ແລະ ທັງຮັບປະກັນເຖິງຄວາມປອດໄພໃຫ້ສູງຂຶ້ນກວ່າເກົ່າ.
ທ່ານ ຄໍາແກ້ວ ມະຫາໄຊ ໄດ້ກ່າວວ່າ: ການກູ້ໄພແມ່ນວຽກທີ່ມີຄວາມຈໍາເປັນ ແລະ ມີຄວາມສຳຄັນໂດຍສະເພາະນະຄອນຫຼວງວຽງຈັນ, ເພາະເປັນເມືອງເອກຂອງ ສປປ ລາວ ມີປະຊາກອນອາໄສຢູ່ໜາແໜ້ນ, ມີສິ່ງປຸກສ້າງນັບມື້ຂະຫຍາຍຕົວ ແລະ ນັບມື້ເພີ່ມຂຶ້ນ, ມີອາຄານສູງ, ມີພາຫະນະຫຼວງຫຼາຍ ແລະ ການສັນຈອນຕາມທ້ອງຖະໜົນໃນແຕ່ລະວັນມີຄວາມແອອັດ ຊຶ່ງບັນຫາດັ່ງກ່າວມີຄວາມສ່ຽງກໍໃຫ້ເກີດບັນຫາຕ່າງໆເປັນຕົ້ນ: ການເກີດອຸບັດເຫດ ອັກຄິໄພ, ດັ່ງນັ້ນ. ຄວາມຕ້ອງການຊ່ວຍເຫຼືອຕ່າງໆຂອງປະຊາຊົນພາຍໃນນະຄອນຫຼວງວຽງຈັນໃນເວລາເຈັບເປັນ.
ນອກຈາກນີ້ ບັນຫາການປ່ຽນແປງທາງພູມີອາກາດ ເຮັດໃຫ້ສະພາບອາກາດອຸນຫະພູມມີການປ່ຽນແປງເຮັດໃຫ້ມີຜົນກະທົບຕໍ່ການດຳລົງຊີວິດ ແລະ ຜົນກະທົບຕໍ່ສະພາບຮ່າງກາຍຂອງປະຊາຊົນ, ພ້ອມກັນນັ້ນ. ກໍເຮັດໃຫ້ເກີດບັນຫາໄພພິບັດເຊັ່ນ: ພາຍຸ, ໄພນໍ້າຖ້ວມ, ໄພແຫ້ງແລ້ງ, ການລະບາດພະຍາດ,ໄຟໄໝ້, ໄຟລາມປ່າ, ຝຸ່ນລະອອງ ແລະ ອື່ນໆ, ໃນໄລຍະຜ່ານມາ ນະຄອນຫຼວງວຽງຈັນໄດ້ຮັບຜົນກະທົບຫຼາຍສົມຄວາມເຊັ່ນ: ນໍ້າຖ້ວມ, ພາຍຸພັດ, ອັກຄີໄພ, ໄຟໄໝ້ກອງຂິ້ເຫຍື້ອ ແລະ ໄຟລາມປ່າ ຊຶ່ງເປັນຜົນກະທົບຕໍ່ເສດຖະກິດ-ສັງຄົມ, ຜົນກະທົບຕໍ່ການດຳລົງຊີວິດ, ຜົນກະທົບຕໍ່ສຸຂະພາບ, ຊັບສິນ ແລະ ສິ່ງແວດລອມຕໍ່ຊາວນະຄອນຫຼວງວຽງຈັນ, ສິ່ງທີ່ເກີດຂຶ້ນເຫຼົ່ານີ້ເວລາເກີດຂຶ້ນແລ້ວແມ່ນຕ້ອງໄດ້ຮັບການຊ່ວຍເຫຼືອຈາກກູ້ໄພຕ່າງໆຢ່າງມີປະສິດທິພາບ ແລະ ທັນເຫດການ.
Cr: ບຸນອູ້ມ