ກະຊວງເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມການຮ່ວມມືດ້ານເສດ ຖະກິດດິຈິຕອນຈີນ-ລາວ ແລະ ເປີດ ແພລັດຟອມຂໍ້ມູນຂ່າວສານຄວາມໜ້າເຊື່ອຖືວິສາຫະກິດລາວຢ່າງເປັນທາງການໃນວັນ7 ສິງຫາ2024,ທີ່ນະຄອນຫຼວງວຽຈັນ, ໂດຍການເປັນປະທານຂອງ
ທ່ານ ບໍ່ວຽງຄຳ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ທ່ານ ນາງ ຟ່າງຫົງ ເອກອັກຄະລັດຖະທູດສປ ຈີນ ປະຈໍາສປປ ລາວ, ມີທ່ານ ດາວອນພະຈັນທະວົງ ຮອງປະທານຜູ້ປະຈຳການ ສະພາການຄ້າ ແລະ ອຸດສາຫະກຳແຫ່ງຊາດ, ທ່ານ ຈ້າວ ເສິນກາງ ຮອງເລຂາທິການອົງການເຂດປົກຄອງພິເສດເຜົ່າຈ້ວງກວາງຊີ, ທັງເປັນຫົວໜ້າກົມພັດທະນາ big data ພ້ອມດ້ວຍພາກສ່ວນກ່ຽວ ຂ້ອງທັງສອງຝ່າຍລາວ-ຈີນເຂົ້າຮ່ວມແບບເຊິ່ງໜ້າ ແລະ ທາງໄກ.
ໂອກາດນີ້, ທ່ານ ບໍ່ວຽງຄໍາ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ກ່າວວ່າ: ການຮ່ວມມືຄັ້ງນີ້ຈະເປັນບາດກ້າວສໍາຄັນໃນການນໍາເອົາເຕັກໂລໂລຊີດິຈິຕອນ, ບົດຮຽນ, ທ່າແຮງ ແລະ ປະສົບການຂອງສປ ຈີນ ມາຊ່ວຍຍົກລະດັບຄວາມສາມາດຂອງບຸກຄະລາກອນ, ອໍານວຍຄວາມສະດວກໃນການຄຸ້ມ ຄອງ ແລະ ຈັດການວຽກງານຂອງພາກລັດໃຫ້ທັນສະໄໝ, ໂປ່ງໃສ, ມີຄຸນນະພາບ ແລະ ມີປະສິດທິພາບ ໃຫ້ຕອບສະໜອງໄດ້ຕາມແນວທາງນະໂຍບານຂອງພັກ, ວິໄສທັດຍຸດທະສາດ ແລະ ແຜນພັດທະນາເສດຖະກິດດິຈິຕອນຂອງ ສປປ ລາວ.
ທ່ານ ບໍ່ວຽງຄໍາ ວົງດາລາ ໄດ້ກ່າວຕື່ມວ່າ: ປະຈຸບັນ ສປປ ລາວ ໄດ້ເລີ່ມເອົາເຕັກໂນໂລຊີດິຈິຕອນເຂົ້າມານໍາໃຊ້ໃນບັນດາຂົງເຂດວຽກງານຕ່າງໆ, ເພື່ອຊຸກຍູ້ສົ່ງເສີມການພັດທະນາເສດຖະກິດ ແລະ ສັງຄົມ ໃນນັ້ນວຽກງານການບໍລິຫານ ແລະ ການບໍລິການລັດໄດ້ຮັບການພັັດທະນາຢ່າງວ່ອງໄວ ແຕ່ຍັງບໍ່ທັນສາມາດຕອບສະໜອງກັບຄວາມຕ້ອງການຂອງສູນກາງ ແລະ ທ້ອງຖິ່ນໄດ້ຢ່າງພຽງພໍ, ເພາະຍັງຢູ່ໃນຂັ້ນເລີ່ມຕົ້ນ. ຕາມການປະເມີນຄວາມພ້ອມໃນການຫັນເປັນລັດຖະບານດິຈິຕອນຂອງສປປ ລາວ ຍັງຢູ່ໃນອັນດັບ 159 ໃນຈໍານວນ 192 ປະເທດໃນທົ່ວໂລກ.
ໃນຕອນທ້າຍສອງຝ່າຍລາວ-ຈີນ ໄດ້ຮ່ວມກັນເປີດແພລັດຟອມຂໍ້ມູນຂ່າວສານຄວາມໜ້າເຊື່ອຖືວິສາຫະກິດລາວ ເພື່ອຊ່ວຍໃຫ້ວິສາຫະກິດລາວກ້າວສູ່ວົງຈອນການຮ່ວມມືກັບການຄ້າສາກົນ.
ທີ່ມາ: CMG FM93
