ພິທີລົງນາມບັນທຶກຄວາມເຂົ້າໃຈ ລະຫວ່າງ ວິທະຍາໄລ ວິທະຍາສາດສຸຂະພາບ ຈໍາປາສັກ ສປປ ລາວ ກັບມະຫາວິທະຍາໄລ ວິຊາຊີບສຸຂະພາບກຸ້ຍຢາງ ສປ ຈີນ ຈັດຂຶ້ນໃນວັນທີ 10 ພຶດສະພາ 2024 ໂດຍຜ່ານລະບົບທາງໄກ.
ດຣ ວຽງສີ ສຸພັກດີ ຫົວໜ້າພະແນກສາທາລະນະສຸກ ແຂວງຈຳປາສັກ ກ່າວວ່າ: ເນື້ອໃນບົດບັນທຶກຄວາມເຂົ້າໃຈຮ່ວມມື ເພື່ອແລກປ່ຽນທາງວິຊາການ ໂດຍວິທະຍາໄລ ວິທະຍາສາດ ສຸຂະພາບ ຈຳປາສັກ ສປປ ລາວ ແລະ ມະຫາວິທະຍາໄລ ວິຊາຊີບ ສຸຂະພາບ ກຸ້ຍຢາງ ສປ ຈີນ ຕົກລົງທີ່ຈະອຳນວຍຄວາມສະດວກ ໃນການແລກປ່ຽນທາງວິຊາການ ລະຫວ່າງສອງສະຖາບັນ ເພື່ອສົ່ງເສີມການສຶກສາວິຊາການ ໃນດ້ານຕ່າງໆ ເປັນຕົ້ນ ການສ້າງຕັ້ງວິທະຍາໄລ ສຸຂະພາບ; ພັດທະນາບຸກຄະລາກອນ ກ່ຽວກັບການຮຽນ -ການສອນ ພາກທິດສະດີໃນຫ້ອງຮຽນ, ສາທິດ ແລະ ປະຕິບັດ, ການຄົ້ນຄວ້າວິທະຍາສາດ ແລະ ທັກສະການບໍລິການດ້ານວິຊາການ; ແລກປ່ຽນ ແລະ ສົ່ງເສີມນັກສຶກສາ ດ້ານການຝຶກປະສົບ ການ, ກິດຈະກຳດ້ານວັດທະນະທຳ ແລະ ກິລາ; ແລກປ່ຽນຄະນະອາຈານ ແລະ ນັກວິຊາການ ເພື່ອແລກປ່ຽນປະສົບການ ດ້ານວິຊາການ ແລະ ຜົນງານການຄົ້ນຄວ້າວິທະຍາສາດ; ຮ່ວມມືໃນການຄົ້ນຄວ້າ ດ້ານວິທະຍາສາດສຸຂະພາບ ເຊັ່ນ: ການແພດ, ການພະຍາບານ, ສຸຂະພາບ ແມ່ ແລະ ເດັກ, ການດູແລສຸຂະພາບ, ການວາງແຜນສຸຂະພາບຊຸມຊົນ ແລະ ປະເດັນອື່ນໆທີ່ມີຄວາມສົນໃຈ; ຮ່ວມມືໃນການຈັດບັນລະຍາຍພິເສດ, ການປະຊຸມສຳມະນາ ຫລື ການປະຊຸມວິຊາການດ້ານວິທະຍາສາດ ສຸຂະພາບ ໃນຮູບແບບທາງໄກ ແລະ ພາຍໃນສະຖານທີ່; ຮ່ວມມືພັດທະນາດ້ານພື້ນຖານໂຄງລ່າງ ເຊັ່ນ: ອາຄານຮຽນ, ຫ້ອງສາທິດ, ຫ້ອງສະໝຸດ, ຫ້ອງຄອມພິວເຕີ ແລະ ອື່ນໆ; ພັດທະນາບຸກຄະລາກອນ ໂດຍການໃຫ້ທຶນຍົກລະດັບແກ່ຄະນະຄູອາຈານ ໂດຍສະເພາະທຶນສໍາລັບຝຶກອົບຮົມໄລຍະສັ້ນ ຫລື ໄລຍະຍາວ ຢ່າງໜ້ອຍ 02 ທຶນ.
ຂ່າວ-ພາບ: ຈັນທະວີສັກ
