ລາວ-ບຣູໄນ ສືບຕໍ່ຊຸກຍູ້ການຮ່ວມມືສອງຝ່າຍ

ໃນໂອກາດກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມປິ່ນອ້ອມ ຊຶ່ງຈັດຂຶ້ນທີ່ ນະຄອນຫລວງວຽງຈັນ ໃນລະຫວ່າງວັນທີ 21-27 ກໍລະ ກົດ 2024, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ພົບປະສອງຝ່າຍ ກັບ ທ່ານ ດາໂຕະ ເອີລິວານ ເປຮິນ ຢູສອບ, ລັດຖະມົນຕີການຕ່າງປະເທດ ຜູ້ທີ 2 ແຫ່ງ ບຣູໄນ ດາຣູ ຊາລາມ, ໃນຕອນບ່າຍຂອງວັນທີ 24 ກໍລະກົດ 2024, ເພື່ອປຶກສາຫາລື ແລະ ສືບຕໍ່ຊຸກຍູ້ການພົວພັນຮ່ວມມື ໃນຂອບສອງຝ່າຍ ແລະ ຫລາຍຝ່າຍ ກໍ່ຄືແນໃສ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງສອງປະເທດ ລາວ ແລະ ບຣູໄນ ດາຣູຊາລາມ ໃຫ້ມີບາດກ້າວຂະຫາຍຕົວຍິ່ງຂຶ້ນ

ໃນການພົບປະ, ສອງຝ່າຍ ໄດ້ຊົມເຊີຍ ແລະ ຕີລາຄາສູງຕໍ່ໝາກຜົນຂອງການຮ່ວມມືຕະຫຼອດໄລຍະ 30 ປີ ທີ່ຜ່ານມາ ທີ່ສືບຕໍ່ຂະຫຍາຍຕົວໃນຫຼາຍຂົງເຂດວຽກ ງານການພັດທະນາ ໂດຍສະເພາະການຍົກລະດັບການຮ່ວມມືລະຫວ່າງ ສປປ ລາວ ແລະ ບຣູໄນ ດາຣູຊາລາມ ຂຶ້ນເປັນຄູ່ຮ່ວມຍຸດທະສາດ ໃນໂອກາດທີ່ ສົມເດັດ ຊຸນຕານ ເດີນທາງມາຢ້ຽມຢາມທາງລັດຖະກິດ ທີ່ ສປປ ລາວ ໃນປີ 2023 ຜ່ານມາ.

ພ້ອມດຽວກັນນັ້ນ, ສອງຝ່າຍ ຍັງໄດ້ປຶກສາຫາລືກັນ ແລະ ທົບທວນຄືນ ຜົນຂອງການຜັນຂະຫຍາຍບົດບັນທຶກຄວາມເຂົ້າໃຈ ວ່າດ້ວຍການຮ່ວມມືທາງດ້ານກະສິກໍາ ທີ່ສອງລັດຖະບານໄດ້ລົງນາມຮ່ວມກັນ ໃນປີ 2022, ຊຶ່ງປັດຈຸບັນ ຝ່າຍບຣູໄນ ກຳລັງພິຈາລະນາ ແລະ ຄົ້ນຄ້ວາ ໃນດ້ານຕ່າງໆ ເພື່ອກ້າວໄປສູ່ການນຳເຂົ້າສິນຄ້າກະສິກຳ ຈາກ ສປປ ລາວ ໂດຍສະເພາະສິນຄ້າປະເພດເຂົ້າສານ ໃນອະນາຄົດອັນໃກ້ນີ້. ພ້ອມດຽວກັນນີ້, ສອງຝ່າຍຍັງໄດ້ປຶກສາຫາລື ແລະ ແລກປ່ຽນທັດສະນະກ່ຽວກັບບັນສາພາກພື້ນ ແລະ ສາກົນອື່ນໆ ອີກດ້ວຍ.