ລາວ-ບຣູໄນ ສືບຕໍ່ຮັດແໜ້ນສາຍພົວພັນ ແລະ ການຮ່ວມມືສອງຝ່າຍ
ໂດຍຕອບສະໜອງຕາມການເຊື້ອເຊີນຂອງ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ທ່ານ ດາໂຕະ ເອີຣິວານ ເປຮິນ ຢູສອບ (Dato ErywanPehin Yusof), ລັດຖະມົນຕີກະຊວງການຕ່າງປະເທດ ຜູ້ທີ 2 ແຫ່ງ ບຣູໄນ ດາຣູຊາລາມ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມຄະນະກໍາມາທິການຮ່ວມ ວ່າດ້ວຍ ການຮ່ວມມືສອງຝ່າຍ ລາວ-ບຣູໄນ ຄັ້ງທີ 4 (the 4thMeeting of the Joint Commission for Bilateral Cooperation between the Lao PDR and Brunei Darussalam–JCBC-4 ) ໃນວັນທີ 28-29 ສິງຫາ 2024 ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ກໍຄືການເປັນ ຄູ່ຮ່ວມຍຸດທະສາດ ລະຫວ່າງ ສປປ ລາວ ແລະ ບຣູໄນ ດາຣູຊາລາມ ໃຫ້ເຕີບໃຫຍ່ຂະຫຍາຍຕົວ ແລະ ແໜ້ນແຟ້ນຍິ່ງຂຶ້ນ.
ໃນຕອນບ່າຍຂອງວັນທີ 28 ສິງຫາ 2024, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ຄະນະ ໄດ້ຕ້ອນຮັບ ທ່ານ ດາໂຕະ ເອີຣິວານ ເປຮິນ ຢູສອບ, ລັດຖະມົນຕີກະຊວງການຕ່າງປະເທດ ຜູ້ທີ 2 ແຫ່ງ ບຣູໄນ ດາຣູຊາລາມ ແລະ ຄະນະແລະ ສອງຝ່າຍ ໄດ້ເປັນປະທານຮ່ວມກອງປະຊຸມຄະນະກໍາມາທິການຮ່ວມ ວ່າດ້ວຍ ການຮ່ວມມືສອງຝ່າຍ ລະຫວ່າງ ສປປ ລາວ ແລະ ບຣູໄນ ດາຣູຊາລາມ ຄັ້ງທີ 4 (JCBC-4). ໃນກອງປະຊຸມຄັ້ງນີ້, ສອງຝ່າຍໄດ້ຮ່ວມກັນທົບທວນຄືນການພົວພັນ ແລະ ການຮ່ວມມືດ້ານຕ່າງໆໃນໄລຍະຜ່ານມາ ເປັນຕົ້ນແມ່ນການຮ່ວມມືດ້ານການເມືອງ, ເສດຖະກິດ, ປ້ອງກັນຊາດ ແລະ ປ້ອງກັນຄວາມສະຫງົບ, ການສຶກສາ, ພະລັງງານ, ການຕ້ານການຟອກເງິນ, ການບໍລິການທາງອາກາດ, ແຮງງານ ແລະ ສະຫວັດດີການສັງຄົມ,ການສົ່ງເສີມການທ່ອງທ່ຽວ ແລະ ການຮ່ວມມືທາງດ້ານວັດທະນະທໍາ, ຊາວໜຸ່ມ, ແມ່ຍິງ ແລະ ກິລາ, ພ້ອມທັງໄດ້ກໍານົດທິດທາງ ແລະ ແຜນການຮ່ວມມືໃນຕໍ່ໜ້າ ເພື່ອຈັດຕັ້ງປະຕິບັດຜົນຂອງກອງປະຊຸມ JCBC-4 ໃຫ້ເປັນຮູບປະທໍາ.ສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືສອງຝ່າຍ ລາວ-ບຣູໄນທີ່ໄດ້ຮັບການພັດທະນາຢ່າງຕໍ່ເນື່ອງ ພາຍຫຼັງກອງປະຊຸມ JCBC-3 ທີ່ ບັນດາ ເສຣີເບກາວັນ, ບຣູໄນ ດາຣູຊາລາມ ໃນປີ 2022 ຜ່ານມາ, ໂດຍສະເພາະການແລກປ່ຽນການຢ້ຽມຢາມເຊິ່ງກັນ ແລະ ກັນ ຂອງ ການນໍາຂັ້ນສູງ ເປັນຕົ້ນແມ່ນ ການຢ້ຽມຢາມທາງລັດຖະກິດ ຢູ່ ບຣູໄນ ດາຣູຊາລາມ ຂອງ ທ່ານທອງລຸນສີສຸລິດ, ປະທານປະເທດແຫ່ງ ສປປ ລາວ ໃນເດືອນຕຸລາ 2022 ແລະ ການຢ້ຽມຢາມທາງລັດຖະກິດ ຢູ່ ສປປ ລາວ ຂອງ ສົມເດັດ ຊຸນຕານ ຮາຈິ ຮັດຊານານ ໂບນເກຍ (His Majesty Sultan Haji Hassanal Bolkiah)ແຫ່ງ ບຣູໄນ ດາຣູຊາລາມ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ລະຫວ່າງ ສປປ ລາວ ແລະ ບຣູໄນ ດາຣູຊາລາມ ຄົບຮອບ 30 ປີ ແລະ ການຍົກລະດັບສາຍພົວພັນທາງການທູດ ລະຫວ່າງ ສປປ ລາວ ແລະ ບຣູໄນ ດາຣູຊາລາມ ມາເປັນ “ຄູ່ຮ່ວມຍຸດທະສາດ” ໃນເດືອນຕຸລາ 2023 ຜ່ານມາ.
ສອງຝ່າຍ ຍັງໄດ້ເຫັນດີເປັນເອກະພາບ ໃນການສືບຕໍ່ສົ່ງເສີມການຮ່ວມມືທາງດ້ານເສດຖະກິດ ກໍຄືການຄ້າ ແລະ ການລົງທຶນຂອງສອງປະເທດ ໃຫ້ມີການພັດທະນາຍິ່ງຂຶ້ນໂດຍສະເພາະ ການສົ່ງເສີມການຮ່ວມມືໃນຂົງເຂດພະລັງງານ, ກະສິກໍາ ແລະ ອື່ນໆ.ນອກຈາກນັ້ນ, ສອງຝ່າຍ ຍັງໄດ້ເຫັນດີເປັນເອກະພາບໃນການສືບຕໍ່ສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ໂດຍສະເພາະ ການຮ່ວມມືໃນຂອບອາຊຽນ ແລະ ອົງການສະຫະປະຊາຊາດ ແລະ ຍັງໄດ້ແລກປ່ຽນຄໍາຄິດເຫັນ ກ່ຽວກັບສະພາບການໃນພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈຮ່ວມກັນ.
ໃນໂອກາດນີ້, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມຄັ້ງນີ້, ເຊິ່ງຈະເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງສອງປະເທດ ໃຫ້ແຕກດອກອອກຜົນຍິ່ງໆຂຶ້ນ. ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ຍັງໄດ້ສະແດງຄວາມຊົມເຊີຍ ເນື່ອງໃນໂອກາດວັນຊາດ ແຫ່ງ ບຣູໄນ ດາຣູຊາລາມ ຄົບຮອບ 40 ປີ ໃນເດືອນກຸມພາ 2024 ຜ່ານມາ, ເຊິ່ງເຫັນວ່າ ປະເທດ ບຣູໄນ ໄດ້ຮັບການພັດທະນາຢ່າງຕໍ່ເນື່ອງ ແລະ ປະຊາຊົນມີຄວາມສົມບູນພູນສຸກພາຍໃຕ້ພະບໍລົມໂພທິສົມພານ ຂອງ ສົມເດັດ ຊຸນຕານ ແຫ່ງ ບຣູໄນ ດາຣູຊາລາມ.ພ້ອມນີ້, ກໍໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ຕໍ່ການສະໜັບສະໜູນ ແລະ ການຊ່ວຍເຫຼືອຂອງລັດຖະບານ ແລະ ປະຊາຊົນບຣູໄນ ໃນໄລຍະຜ່ານມາ ໂດຍສະເພາະການພັດທະນາຊັບພະຍາກອນມະນຸດໃຫ້ແກ່ຂະແໜງການກ່ຽວຂ້ອງຂອງລາວ ແລະ ການສະໜັບສະໜູນການເປັນປະທານອາຊຽນ 2024 ຂອງ ສປປ ລາວ.
ໃນໂອກາດດຽວກັນ, ທ່ານ ດາໂຕະ ເອີຣິວານ ເປຮິນ ຢູສອບ, ລັດຖະມົນຕີກະຊວງການຕ່າງປະເທດ ຜູ້ທີ 2 ແຫ່ງ ບຣູໄນ ດາຣູຊາລາມ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງຝ່າຍລາວ ແລະ ຢືນຢັນຄືນຄວາມໝາຍໝັ້ນຂອງຕົນໃນການສືບຕໍ່ປະສານສົມທົບກັບຝ່າຍລາວຢ່າງໃກ້ຊິດ ເພື່ອສືບຕໍ່ຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມ ກໍຄືການເປັນ ຄູ່ຮ່ວມຍຸດທະສາດ ລະຫວ່າງ ບຣູໄນ ດາຣູຊາລາມ ແລະ ສປປ ລາວ ໃຫ້ມີບາດກ້າວຂະຫຍາຍຕົວຍິ່ງຂຶ້ນ, ພ້ອມທັງໄດ້ຖືໂອກາດນີ້ ເຊື້ອເຊີນ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຢ້ຽມຢາມ ບຣູໄນ ດາຣູຊາລາມ ແລະ ເຂົ້າຮ່ວມກອງປະຊຸມ JCBC-5 ທີ່ ຝ່າຍບຣູໄນ ຈະເປັນເຈົ້າພາບ ໃນເວລາທີ່ສອງຝ່າຍມີຄວາມສະດວກ, ເຊິ່ງຝ່າຍລາວໄດ້ສະແດງຄວາມຍິນດີ ແລະ ຕອບຮັບການເຊື້ອເຊີນດັ່ງກ່າວ.
ພາຍຫຼັງສໍາເລັດກອງປະຊຸມJCBC-4, ທ່ານ ສະເຫຼີມໄຊ ກົມມະສິດ ແລະ ທ່ານ ດາໂຕະ ເອີຣິວານ ເປຮິນ ຢູສອບ ໄດ້ຮ່ວມກັນລົງນາມຮັບຮອງເອົາບົດບັນທຶກກອງປະຊຸມ JCBC-4, ໂດຍມີຄະນະຜູ້ແທນຂອງທັງສອງຝ່າຍ ລາວ ແລະ ບຣູໄນ ເຂົ້າຮ່ວມເປັນສັກຂີພິຍານ.
