ລາວ-ມາເລເຊຍ ຫາລືວຽກງານຮ່ວມມືດ້ານການທ່ອງທ່ຽວ

ລາວ-ມາເລເຊຍ ພົບປະເພື່ອປຶກສາຫາລືວຽກງານຮ່ວມມືດ້ານການທ່ອງທ່ຽວຂຶ້ນໃນວັນທີ 24 ມັງກອນນີ້ ທີ່ນະຄອນ ຫຼວງວຽງຈັນ ຝ່າຍລາວໂດຍ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແລະ ຝ່າຍມາເລເຊຍໂດຍ ທ່ານ ດາໂຕ ຊີ ຕຽງ ກິງ ຊິງ ລັດຖະມົນ ຕີ ກະຊວງທ່ອງທ່ຽວ, ສິລະປະ ແລະ ວັດທະນະທຳ ມາເລເຊຍ. ໃນໂອກາດເຂົ້າຮ່ວມກອງປະຊຸມລັດຖະມົນຕີທ່ອງທ່ຽວອາຊຽນ 2024 ທີ່ນະຄອນຫຼວງວຽງຈັນ ລະຫວ່າງວັນທີ 22-27 ມັງກອນ 2024 ນີ້.

ທ່ານ ນາງ ສວນສະຫວັນ ວິຍະເກດ ໄດ້ກ່າວວ່າ: ສປປ ລາວ ແລະ ມາເລເຊຍ ໄດ້ມີສາຍພົວພັນມິດຕະພາບ ແລະ ການຮ່ວມມືອັນດີງາມໃນຫຼາຍຂົງເຂດ ນັບແຕ່ການສ້າງຕັ້ງສາຍພົວພັນການທູດ ໃນ 1966 ທີ່ຜ່ານມາ ຊຶ່ງພາຍຫຼັງການເສີມສ້າງສາຍພົວພັນທາງການທູດຂອງສອງປະເທດ, ຂອບການຮ່ວມມືສອງຝ່າຍຂອງພວກເຮົາໄດ້ຮັບການເສີມຂະຫຍາຍໃຫ້ກວ້າງຂວາງ ແລະ ເລິກເຊິ່ງຍິ່ງຂຶ້ນ ອັນໄດ້ນໍາເອົາຜົນປະໂຫຍດມາສູ່ປະຊາຊົນສອງຊາດ ແລະ ການພັດທະນາໃນຂົງເຂດພາກພື້ນຂອງພວກເຮົາ. ຜ່ານມາລັດ ຖະບານ ແລະ ປະຊາຊົນ ມາເລເຊຍ ໄດ້ໃຫ້ການສະໜັບສະໜູນ ແລະ ຊ່ວຍເຫຼືອຕໍ່ ສປປ ລາວ ໃນການພັດທະນາຊັບພະຍາກອນ ມະນຸດໂດຍຜ່ານ ໂຄງການຮ່ວມມືດ້ານວິຊາການມາເລເຊຍ, ທຶນຝຶກອົບຮົມ ເວົ້າລວມ, ເວົ້າສະເພາະວຽກງານທ່ອງທ່ຽວ. ພ້ອມນີ້, ທັງສອງກະຊວງຈະໄດ້ເຮັດວຽກຮ່ວມກັນ ຢ່າງໃກ້ຊິດດັ່ງທີ່ໄດ້ປຶກສາຫາລືຮ່ວມກັນໃນການພົບປະສອງຝ່າຍ ເພື່ອເພີ່ມທະວີຮັດແໜ້ນການຮ່ວມມື ແລະ ການເປັນຄູ່ຮ່ວມຍຸດທະສາດ ໂດຍສະ ເພາະຂະແໜງການທ່ອງທ່ຽວອັນເປັນສ່ວນປະກອບທີ່ສຳຄັນ ໜຶ່ງໃນການສະເຫຼີມສະຫຼອງມິດຕະພາບ ແລະ ການຮ່ວມມື ໃນຂອບອາຊຽນ, ລວມທັງການເປັນປະທານອາຊຽນຂອງ ສປປ ລາວ ໃນປີ 2024 ທີ່ຈະມາເຖິງນີ້.

ພ້ອມນັ້ນ, ໃນປີ 2025 ທີ່ຈະມາເຖິງນີ້ ກໍເປັນອີກວາລະໜຶ່ງທີ່ປະເທດມາເລເຊຍຈະໄດ້ຮັບກຽດເປັນປະທານອາຊຽນຕໍ່ຈາກ ສປປ ລາວ ແລະ ບັນດາບູລິມະສິດປີ່ນອ້ອມພາຍໃຕ້ 3 ເສົາຄໍ້າອາຊຽນ ຄື: ເສົາຄໍ້າປະຊາຄົມການເມືອງ-ຄວາມໝັ້ນຄົງອາຊຽນ, ເສົາຄໍ້າປະຊາຄົມເສດຖະກິດອາຊຽນ ແລະ ເສົາຄໍ້າປະຊາຄົມວັດທະ ນະທໍາ-ສັງຄົມອາຊຽນ, ລວມທັງເປົ້າໝາຍ ໃນການເປັນປະ ທານອາຊຽນຂອງ ມາເລເຊຍ ໃນປີ 2025 ຈະຍົກໃຫ້ເຫັນພັນ ທະ ແລະ ບົດບາດອັນສໍາຄັນ ເພື່ອນໍາພາກອງປະຊຸມລະດັບຕ່າງໆ ພາຍໃຕ້ຂອບການຮ່ວມມືອາຊຽນ ກໍຄືກອງປະຊຸມ ລັດຖະມົນຕີ ທ່ອງທ່ຽວອາຊຽນ ຄັ້ງທີ 28, ງານວາງສະແດງທ່ອງທ່ຽວອາ ຊຽນ ແລະ ບັນດາກອງປະຊຸມ ປິ່ນອ້ອມ ເພື່ອນໍາຜົນປະໂຫຍດສູງສຸດມາສູ່ອາຊຽນ.

ໂອກາດນີ້, ທ່ານ ດາໂຕ ຊີ ຕຽງ ກິງ ຊິງ ໄດ້ກ່າວວ່າ: ການຮ່ວມມືລະຫວ່າງສອງກະຊວງຂະ ແໜງການຂອງພວກເຮົາ ໂດຍສະ ເພາະຂໍ້ລິເລີ່ມໃນການສ້າງບົດບັນທຶກເພື່ອຮ່ວມມືກັນໃນຂະແໜງ ການທ່ອງທ່ຽວ ເພື່ອເຮັດໃຫ້ວຽກງານຮ່ວມທີ່ກ່າວມານັ້ນໄດ້ມີ ຂໍ້ສະ ດວກ, ມີປະສິດທິຜົນຫຼາຍກວ່າເກົ່ານັ້ນແມ່ນເຫັນດີຄື: ໃຫ້ສ້າງຕັ້ງໜ່ວຍງານວິຊາການຂອງທັງສອງຝ່າຍ ຊຶ່ງຈະປະກອບ ດ້ວຍບັນດາກົມ, ກອງທີ່ກ່ຽວຂ້ອງ ເພື່ອຊຸກຍູ້ ແລະ ປະເມີນຜົນກ່ຽວກັບການຈັດຕັ້ງປະຕິບັດກິດຈະກຳຕ່າງໆ ໃນວຽກງານການ ຮ່ວມມືສອງຝ່າຍ, ສະເໜີໃຫ້ໜ່ວຍງານວິຊາການທີ່ກ່າວມານີ້ ໄດ້ມີການພົບປະແລກປ່ຽນປຶກສາຫາລືກັນ ໃນເບື້ອງຕົ້ນກ່ອນ ເພື່ອທົບທວນຮ່າງບົດບັນທຶກທີ່ພວກເຮົາໄດ້ແລກປ່ຽນກັນນີ້ເພື່ອໃຫ້ມີຄວາມເປັນເອກະພາບກັນ ແລະ ເພື່ອຜ່ານຂະບວນການອະນຸ ມັດພາຍໃນຂອງຕົນກ່ອນການລົງນາມຮ່ວມກັນໃນອະນາຄົດ. ສຳລັບສະຖິຕິນັກທ່ອງທ່ຽວມາເລເຊຍ ເຂົ້າມາທ່ອງທ່ຽວ ສປປ ລາວ ໃນປີ 2023 ມີ 14.990 ເທື່ອຄົນ ຖືເປັນອັນດັບ 4 ຈາກບັນດານັກທ່ອງທ່ຽວ ພາກພື້ນອາຊຽນມາທ່ຽວ ສປປ ລາວ.

ຂ່າວ: ວັນເພັງ, ພາບ: ສໍານານ