ພິທີລົງນາມສົນທິສັນຍາທະວິພາຄີ ວ່າດ້ວຍການຂົນສົ່ງທາງອາກາດ ລະຫວ່າງ ສປປ ລາວ ແລະ ສະຫະພັນທະລັດສະວິດເຊີແລນ ໄດ້ຈັດຂຶ້ນໃນວັນທີ 26 ກໍລະກົດ 2024 ທີ່ກະຊວງໂຍທາທິການ ແລະ ຂົນສົ່ງ (ຍທຂ); ຮ່ວມລົງນາມຄັ້ງນີ້ ຕາງໜ້າລັດຖະບານ ສປປ ລາວ ໂດຍ ທ່ານ ງາມປະສົງ ເມືອງມະນີ ລັດຖະມົນຕີກະຊວງ ຍທຂ ແລະ ທ່ານ ອາເລັກຊານເດີ ຟາເຊວ ລັດຖະມົນຕີກະຊວງການຕ່າງປະເທດ ແຫ່ງສະວິດເຊີແລນ. ໃຫ້ກຽດເຂົ້າຮ່ວມເປັນສັກຂີພິຍານໂດຍ ທ່ານເອກອັກຄະລັດຖະທູດສະວິດເຊີແລນ ພ້ອມດ້ວຍພາກສ່ວນກ່ຽວຂ້ອງ 2 ຝ່າຍ. ການເຊັນສັນຍາຄັ້ງນີ້ ເພື່ອປ່ຽນແທນສົນທິສັນຍາທີ່ທັງ 2 ຝ່າຍໄດ້ຮ່ວມລົງນາມໃນວັນທີ 15 ທັນວາ ປີ 1999 ເພື່ອເປັນການເພີ່ມທະວີການຮ່ວມມືຂອງ 2 ປະເທດ ຮັບປະກັນການເຊື່ອມໂຍງເຊື່ອມຈອດ, ການຈັດຕັ້ງປະຕິບັດຖ້ຽວບິນພົນລະເຮືອນລະຫວ່າງ 2 ປະເທດໃຫ້ສອດຄ່ອງຕາມເຕັກນິກ ແລະ ມາດຕະຖານສາກົນ. ຊຶ່ງໃນປີ 2024 ນີ້ຖືເປັນນິມິດໝາຍທີ່ດີທີ່ ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມສຸດຍອດອາຊຽນ ແລະ ພິທີເຊັນສົນທິສັນຍາ ວ່າດ້ວຍການຂົນສົ່ງທາງອາກາດ ລະຫວ່າງ ສປປ ລາວ ແລະ ສະຫະພັນທະລັດສະວິດເຊີແລນ ກໍເປັນອີກໜຶ່ງວາລະທີ່ສຳຄັນທີ່ລັດຖະບານແຫ່ງ ສປປ ລາວ ໄດ້ຮັບກຽດເປັນເຈົ້າພາບ, ຊຶ່ງສົນທິສັນຍາດັ່ງກ່າວຈະຊ່ວຍເສີມຂະຫຍາຍວຽກງານຂົນສົ່ງທາງອາກາດລາວອອກສູ່ສາກົນ.
ຂ່າວ: ຍຸພິນທອງ
