ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ລາວ-ຫວຽດນາມ ສືບຕໍ່ຮັດແໜ້ນການພົວພັນຮ່ວມມືສອງຝ່າຍ

ຕອນບ່າຍວັນທີ 19 ກຸມພານີ້ ທີ່ໂຮງແຮມລາວພລາຊາ ນະຄອນຫລວງວຽງຈັນ, ໄດ້ມີການພົບປະສອງຝ່າຍ ລະຫວ່າງສະຫາຍ ສະເຫລີມໄຊ ກົມມະສິດ , ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະສະຫາຍ ຟ້າມບິ່ງມິງ ຮອງນາຍົກລັດຖະມົນຕີ , ລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ, ໃນໂອກາດທີ່ສະຫາຍ ຟາມບິ່ງມິງ ພ້ອມດ້ວຍຄະນະເດີນທາງເຂົ້າຮ່ວມກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 5 ແລະກອງປະຊຸມລັດຖະມົນຕີຕ່າງປະເທດອາຊຽນ-ຈີນ ສະໄໝພິເສດ ໃນລະຫວ່າງວັນທີ 19 ຫາ20 ກຸມພາ 2020ນີ້ ທີ່ນະຄອນຫລວງວຽງຈັນ.
ໃນການພົບປະຄັ້ງນີ້, ສອງຝ່າຍໄດ້ຕີລາຄາສູງ ຕໍ່ສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ກໍຄືສອງກະຊວງການຕ່າງປະເທດລາວ-ຫວຽດນາມ ທີ່ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງໃນທຸກຂົງເຂດວຽກງານ ໂດຍສະເພາະແມ່ນ ໄດ້ມີການແລກປ່ຽນການຢ້ຽມຢາມຂອງການນໍາຂັ້ນສູງສອງປະເທດຢ່າງເປັນປົກກະຕິ, ມີການຮ່ວມມືຂອງບັນດາກະຊວງ ຂະແໜງການ ແລະລະຫວ່າງສອງກະຊວງການຕ່າງປະເທດ, ເຊິ່ງຈະສືບຕໍ່ຮ່ວມມືກັນຢ່າງໃກ້ຊິດ ເພື່ອເປັນເສນາທິການໃຫ້ແກ່ຂັ້ນເທິງ ໃນການຊຸກຍູ້ການຈັດຕັ້ງປະຕິບັດບັນດາຂໍ້ຕົກລົງຕ່າງໆ ທີ່ສອງຝ່າຍໄດ້ລົງນາມຮ່ວມກັນ ກໍຄືການຊີ້ນໍາຂອງສອງນາຍົກລັດຖະມົນຕີ ລາວ-ຫວຍດນາມ ໃນໂອກາດກອງປະຊຸມຄັ້ງທີ 42 ປະຈໍາປີ 2020 ຂອງຄະນະກໍາມະທິການຮ່ວມມືທະວິພາຄີ ລະຫວ່າງລັດຖະບານແຫ່ງ ສປປ ລາວ ແລະລັດຖະບານ ແຫ່ງ ສສ ຫວຽດນາມ, ທີ່ຮ່າໂນ້ຍ ສສ ຫວຽດນາມ ເມື່ອຕົ້ນເດືອນມັງກອນຜ່ານມາ ໃຫ້ສໍາເລັດຕາມຄາດໝາຍທີ່ວາງໄວ້ , ພິເສດປີ 2020 ນີ້ ສອງກະຊວງການຕ່າງປະເທດລາວ-ຫວຽດນາມ ຈະຮ່ວມກັນສ້າງກິດຈະກໍາ ເພື່ອສະເຫລີມສະຫລອງວັນສໍາຄັນຕ່າງໆ ເຊັ່ນ: ວັນສ້າງຕັ້ງພັກຄອມມຸນິດຫວຽດນາມຄົບຮອບ 90ປີ ແລະວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 65ປີ , ວັນຄ້າຍວັນເກີດຂອງປະທານໂຮຈິມິນ ຄົບຮອບ 125ປີ ແລະປະທານໄກສອນ ພົມວິຫານ ຄົບຮອບ 100ປີ , ວັນຊາດຫວຽດນາມຄົບຮອບ 75ປີ, ວັນຊາດລາວຄົບຮອບ 45ປີ ແລະວັນປົດປ່ອຍພາກໃຕ້ຫວຽດນາມຄົບຮອບ 45ປີ .
ນອກຈາກນີ້, ສອງຝ່າຍຍັງໄດ້ແລກປ່ຽນທັດສະນະກ່ຽວກັບສະພາບການພາກພື້ນ ແລະສາກົນ ທີ່ສອງຝ່າຍມີຄວາມສົນໃຈ; ມີການປຶກສາຫາລືໃນການກະກຽມ ການເຂົ້າຮ່ວມກອງປະຊຸມສຸດຍອດອາຊຽນຕ່າງໆ; ແລະການຮ່ວມມືໃນການປ້ອງກັນ ການແຜ່ລະບາດຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ COVID-19 ທີ່ກໍາລັງລະບາດໃນຫລາຍປະເທດໃນໂລກ.
ໃນໂອກາດດັ່ງກ່າວ, ສະຫາຍສະເຫລີມໄຊ ກົມມະສິດ ໄດ້ສະແດງຄວາມຍິນດີ ແລະປິຕິຊົມຊື່ນເປັນຢ່າງຍິ່ງ ທີ່ໄດ້ຕ້ອນຮັບ ສະຫາຍ ຟ້າມບິ່ງມິງ ພ້ອມດ້ວຍຄະນະ ໃນໂອກາດເດີນທາງມາເຂົ້າຮ່ວມກອງປະຊຸມດັ່ງກ່າວ, ພ້ອມທັງສະແດງຄວາມຊົມເຊີຍຕໍ່ຜົນສໍາເລັດໃນການເຮັດວຽກຮ່ວມກັນ ໃນໄລຍະຜ່ານມາ ໂດຍສະເພາະແມ່ນຜົນສໍາເລັດການເຂົ້າຮ່ວມກອງປະຊຸມຕ່າງທ ທີ່ ສສ ຫວຽດນາມ, ເຊິ່ງໄດ້ຮັບຜົນສໍາເລັດຢ່າງຈົບງາມ , ພ້ອມນັ້ນ, ໃນເດືອນມິນາ ທີ່ຈະມາເຖິງນີ້ ສປປ ລາວ ຈະໄດ້ເປັນເຈົ້າພາບຈັດກອງປະຊຸມສຸດຍອດ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ3 ; ກອງປະຊຸມສຸດຍອດຍຸດທະສາດການຮ່ວມມືດ້ານເສດຖະກິດແມ່ນໍ້າອີຣະວະດີ-ແມ່ນໍ້າເຈົ້ພະຍາ-ແມ່ນໍ້າຂອງ ຫລື ACMECS ຄັ້ງທີ9 ; ກອງປະຊຸມສຸດຍອດຂອບການຮ່ວມມືກໍາປູເຈຍ-ລາວ-ມຽນມ້າ-ຫວຽດນາມ ຫລື CLMV ຄັ້ງທີ 10 ແລະກອງປະຊຸມສຸດຍອດກໍາປູເຈຍ-ລາວ-ຫວຽດນາມ- ຫລືCLV ຄັ້ງທີ 11 ທີ່ນະຄອນຫລວງວຽງຈັນ, ເຊິ່ງລັດຖະບານແຫ່ງ ສປປ ລາວ ມີຄວາມຍິນດີທີ່ຈະໄດ້ຕ້ອນຮັບ ສະຫາຍ ຫງວຽນຊວັນຟຸກ ນາຍົກລັດຖະມົນຕີ ແຫ່ງ ສສ ຫວຽດນາມ ເຊິ່ງຈະເດີນທາງມາຢ້ຽມຢາມ ແລະເຂົ້າຮ່ວມກອງປະຊຸມດັ່ງກ່າວ ທີ່ ສປປ ລາວ
ໃນຕອນທ້າຍ, ສະຫາຍທອງໄຫລ ກົມມະສິດ ໄດ້ອວຍພອນໃຫ້ ສະຫາຍ ຟ້າມບິ່ງມິງ ຈົ່ງປະສົບຜົນສໍາເລັດ ໃນການເຂົ້າຮ່ວມກອງປະຊຸມ ລັດຖະມົນຕີຕ່າງປະເທດ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ແລະກອງປະຊຸມລັດຖະມົນຕີຕ່າງປະເທດອາຊຽນ-ຈີນສະໄໝພິເສດ ຢ່າງຈົບງາມ.
ໂອກາດດຽວກັນນີ້, ສະຫາຍຟ້າມບິ່ງມິງ ກໍໄດ້ກ່າວສະແດງຄວາມຂອບໃຈເປັນຢ່າງສູງ ມາຍັງລັດຖະບານແຫ່ງ ສປປ ລາວ ກໍຄືກະຊວງການຕ່າງປະເທດ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ໃນການເຂົ້າຮ່ວມກອງປະຊຸມຕ່າງໆໃນຄັ້ງນີ້ ແລະອວຍພອນໃຫ້ ສປປ ລາວ ໄດ້ຮັບຜົນສໍາເລັດຢ່າງຈົບງາມ ໃນການເປັນເຈົ້າພາບຈັດກອງປະຊຸມຕ່າງໆ.