ພິທີສະຫຼຸບປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ຈັດຂຶ້ນໃນບ່າຍ ວັນທີ 11 ມັງກອນ 2023, ທີ່ ຫໍປະຊຸມແຫ່ງຊາດ, ໂດຍການໃຫ້ກຽດເປັນປະທານຮ່ວມຂອງ ສະຫາຍ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະສະຫາຍ ຟ້າມ ມິງ ຈິງ, ນາຍົກລັດຖະມົນຕີ ແຫ່ງ ສາທາລະນະລັດ ສັງຄົມນິຍົມ ຫວຽດນາມແລະມີບັນດາສະຫາຍການນໍາພັກ, ລັດຖະບານ, ພະນັກງານ, ທະຫານ, ຕຳຫຼວດ, ຊາວໜຸ່ມ, ນ້ອງນັກຮຽນ-ນັກສຶກສາ ທັງຫວຽດນາມ ແລະ ລາວ ຫຼາຍກວ່າ 450ສະຫາຍເຂົ້າຮ່ວມ.
ເລີ່ມຕົ້ນພິທີໄດ້ມີການສາຍວີດີໂອປະມວນການເຄື່ອນໄຫວສໍາຄັນ ແລະ ບັນດາກິດສະກໍາສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022; ມີການສະແດງສີລະປະ ທີ່ສະແດງໃຫ້ເຫັນເຖິງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ໂດຍໄດ້ຖ່າຍທອດຜ່ານບັນດາບົດເພງ ແລະ ບົດຟ້ອນມິດຕະພາບ ລາວ-ຫວຽດນາມ ຢ່າງເບີກບານມ່ວນຊື່ນ ແລະ ມີເນື້ອໃນຄວາມໝາຍສຳຄັນທາງປະຫວັດສາດ ສ່ອງແສງໃຫ້ເຫັນເຖິງສາຍໄຍແຫ່ງຄວາມຜູກພັນ ຄວາມສາມັກຄີມິດຕະພາບອັນຍິ່ງໃຫຍ່ ທີ່ບໍ່ສາມາດຕັດຂາດຈາກກັນໄດ້.
ຈາກນັ້ນ, ສອງສະຫາຍນາຍົກລັດຖະມົນຕີ ລາວ ແລະ ຫວຽດນາມ ໄດ້ຮ່ວມກັນຖະແຫຼງຂ່າວແລະ ສະຫຼຸບການສະເຫຼີມສະຫຼອງປີສາມັກຄິມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022. ໃນໂອກາດນີ້, ສະຫາຍ ນາຍົກລັດຖະມົນຕີ ສອນໄຊ ສີພັນດອນ ໄດ້ຍົກໃຫ້ເຫັນເຖິງ ຜົນສໍາເລັດຂອງການພົບປະສອງຝ່າຍກັບ ສະຫາຍ ນາຍົກລັດຖະມົນຕີ ຟ້າມ ມິງ ຈິງ ໃນຕອນເຊົ້າຜ່ານມາ ແລະ ບັນດາຜົນສໍາເລັດຂອງກິດຈະກໍາສະເຫຼີມສະຫຼອງປີສາມັກຄິມິດຕະພາບ ລາວ-ຫວຽດນາມ, ຫວຽດນາມ-ລາວ ໃນປີ 2022, ເຊິ່ງມີເນື້ອໃນສໍາຄັນບາງຕອນດັ່ງນີ້:
ການພົບປະສອງຝ່າຍ ລະຫວ່າງ ສອງນາຍົກລັດຖະມົນຕີ ລາວ ແລະ ຫວຽດນາມ ໄດ້ດໍາເນີນໄປດ້ວຍບັນຍາກາດສະໜິດສະໜົມ, ກົງໄປກົງມາ, ຈິງໃຈ ແລະ ໄດ້ຮັບຜົນສໍາເລັດຢ່າງຈົບງາມ, ເຊິ່ງສອງຝ່າຍໄດ້ພ້ອມກັນທົບທວນຄືນການພົວພັນຮ່ວມມືຮອບດ້ານຂອງສອງປະເທດໃນໄລຍະຜ່ານມາ ແລະ ວາງທິດທາງແຜນການຮ່ວມມືໃນຕໍ່ໜ້າ, ສອງຝ່າຍໄດ້ຮ່ວມລົງນາມເອກະສານຮ່ວມກັນ 10 ສະບັບໃນຫຼາຍຂົງເຂດ. ພິເສດການຢ້ຽມຢາມ ສປປ ລາວ ໃນຄັ້ງນີ້ ຂອງຄະນະຜູ້ແທນ ສສ ຫວຽດນາມແມ່ນມີຄວາມໝາຍສຳຄັນທີ່ສຸດເພາະຢູ່ໃນທ່າມກາງບັນຍາກາດການສະຫຼຸບການສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ,ຫວຽດນາມ-ລາວປີ 2022 ເພື່ອສະເຫຼີມສະຫຼອງສອງວັນປະຫວັດສາດ ຄື: ວັນສ້າງຕັ້ງສາຍພົວພັນການທູດ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ຢ່າງຟົດຟື້ນ. ສອງຝ່າຍໄດ້ຕີລາຄາສູງ ຕໍ່ບັນດາກິດຈະກໍາສະເຫຼີມສະຫຼອງຕ່າງໆ, ເຊິ່ງນັບແຕ່ພິທີເປີດຢ່າງເປັນທາງການໃນຕົ້ນປີ 2022 ທີ່ນະຄອນຫຼວງຮ່າໂນ້ຍເປັນຕົ້ນມາ, ສອງຝ່າຍໄດ້ຮ່ວມກັນຈັດຫຼາຍກິດຈະກຳ ສະເຫລີມສະຫລອງຢ່າງເປັນຂະບວນຟົດຟື້ນ ໃນຂອບເຂດທົ່ວປະເທດ ທັງພາຍໃນ ແລະ ຕ່າງປະເທດ ກໍ່ຄືບັນດາອົງການຕາງໜ້າ ແລະ ສະຖານທູດ ຂອງສອງປະເທດ ຢູ່ຕ່າງປະເທດ.ສອງຝ່າຍມີການແລກປ່ຽນການຢ້ຽມຢາມ ເຊິ່ງກັນ ແລະ ກັນ ໃນທຸກລະດັບເຖິງ 115 ຄະນະ,ໃນນີ້ຄະນະເບື້ອງລາວໄປຫວຽດນາມມີ 51 ຄະນະ ແລະຄະນະເບື້ອງຫວຽດນາມມາລາວມີ 64 ຄະນະ. ສອງຝ່າຍ ໄດ້ຮ່ວມກັນຈັດຕັ້ງປະຕິບັດຫຼາຍກິດຈະກໍາ ເພື່ອສົ່ງເສີມເສດຖະກິດ, ການຄ້າ, ການລົງທຶນ, ລວມເຖິງບັນດາກິດຈະກໍາສົ່ງເສີມດ້ານວັດທະນະທໍາ-ສັງຄົມ-ການສຶກສາ ເປັນຕົ້ນການແລກປ່ຽນວັດທະນະທໍາ, ວາງສະແດງຮູບພາບ, ການຈັດງານບຸນມະໂຫລານຂອງສະມາຄົມມິດຕະພາບ ແລະ ອື່ນໆ, ພິເສດ ພັກ-ລັດຖະບານ ຫວຽດນາມ ໄດ້ມອບຂອງຂວັນ ເປັນໂຮງຮຽນມັດທະຍົມ ວິຊາຊີບ ຕົວແບບ ມິດຕະພາບ ລາວ-ຫວຽດນາມ ຢູ່ແຂວງຄໍາມ່ວນ ເຊິ່ງຖືເປັນໂຮງຮຽນວິຊາຊີບ ຕົວແບບທໍາອິດຢູ່ ສປປ ລາວ.ພ້ອມນີ້, ສອງຝ່າຍ ໄດ້ຮ່ວມກັນຈັດຫຼາຍກິດຈະກໍາໂຄສະນາເຜີຍແຜ່ຕາມສື່ມວນຊົນ, ມີການຕີພິມປື້ມວາລະສານ, ບົດຄວາມ, ມີການຈັດແຂ່ງຂັນຄວາມຮູ້ກ່ຽວກັບການພົວພັນລາວ-ຫວຽດນາມ, ປະກວດບົດກອນ, ບົດເພງ, ບົດຄວາມ, ເຊິ່ງໄດ້ຮັບຄວາມສົນໃຈຢ່າງກວ້າງຂວາງຈາກສັງຄົມ; ມີການໃຫ້ສໍາພາດຂອງການນໍາໂດຍສະເພາະແມ່ນ ສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດ ແຫ່ງ ສປປ ລາວ ແລະ ສະຫາຍ ຫງວຽນ ຊວັນ ຟຸກ, ປະທານປະເທດ ແຫ່ງ ສສ ຫວຽດນາມ ໃນໂອກາດ ວັນສ້າງຕັ້ງສາຍພົວພັນການທູດ 5 ກັນຍາ 2022, ແລະອີກຫຼາຍໆສະຫາຍ. ສິ່ງທີ່ພົ້ນເດັ່ນ ແລະ ພິເສດທີ່ສຸດໃນການສະເຫຼີມສະຫຼອງປີສາມັກຄີດັ່ງກ່າວ, ສອງປະເທດໄດ້ຈັດພິທີໂຮມຊຸມນຸມສະເຫຼີມສະຫຼອງໃຫຍ່ຢູ່ສອງນະຄອນຫຼວງ ຂອງສອງປະເທດ ໃນວັນທີ 18 ກໍລະກົດ 2022 ຢ່າງເຄັ່ງຂຶມ ແລະ ເຕັມໄປດ້ວຍຄວາມໝາຍຄວາມສໍາຄັນ, ໂດຍມີການເຂົ້າຮ່ວມ ຂອງ ການນໍາຂັ້ນສູງສອງປະເທດ ແລະ ມວນຊົນ, ໂອກາດດັ່ງກ່າວ ກໍ່ມີການຈັດສັບປະດາ ວັດທະນະທໍາ ຫວຽດນາມ ແລະ ລາວ ຢູ່ນະຄອນຫຼວງຂອງກັນ ແລະ ກັນ.
ໃນຕອນທ້າຍ, ສອງຝ່າຍ ໄດ້ສະແດງຄວາມຊົມເຊີຍຢ່າງສຸດໃຈ ແລະ ຕີລາຄາສູງ ຕໍ່ການຮ່ວມກັນຈັດການສະເຫຼີມສະລອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ໃນຄັ້ງນີ້ ທີ່ປະສົບຜົນສໍາເລັດຢ່າງຈົບງາມ, ພ້ອມທັງໄດ້ອວຍພອນໃຫ້ສາຍພົວພັນມິດຕະພາບ ທີ່ຍິ່ງໃຫຍ່, ຄວາມສາມັກຄີພິເສດແລະການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມຈົ່ງໝັ້ນຄົງຄະນົງແກ່ນ ແລະ ຈະເລີນງອກງາມຍິ່ງໆຂຶ້ນຕະຫລອດໄປ.
