ກອງປະຊຸມຄະນະກໍາມະການຮ່ວມມື ດ້ານເຕັກໂນໂລຊີ ແລະ ນະວັດຕະກໍາ ລາວ-ຫວຽດນາມ ຄັ້ງທີ I ຈັດຂຶ້ນໃນວັນທີ 28 ພຶດສະພາ 2024 ນະຄອນຫລວງວຽງຈັນ ໂດຍມີ ທ່ານ ບໍ່ວຽງຄໍາ ວົງດາລາ ກໍາມະການສູນກາງພັກປະຊາຊົນປະຕິວັດລາວ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແຫ່ງ ສປປ ລາວ, ທ່ານ ຮວິ່ງ ແທ່ງ ດາດ ກໍາມະການສູນກາງພັກກອມມູນິດຫວຽດນາມ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ແຫ່ງ ສສ ຫວຽດນາມ, ມີຄະນະຜູ້ແທນກ່ຽວຂ້ອງສອງຝ່າຍ ເຂົ້າຮ່ວມ.
ສອງຝ່າຍໄດ້ຕີລາຄາສູງຕໍ່ໝາກຜົນການຮ່ວມມືດ້ານເຕັກໂນໂລຊີ ແລະ ນະວັດຕະກໍາ ລະຫວ່າງສອງປະເທດໃນໄລຍະຜ່ານມາ ໂດຍຜ່ານກິດຈະກໍາຕ່າງໆ ເຊັ່ນ: ແລກປ່ຽນຄະນະຂັ້ນຕ່າງໆ ແລະ ຈັດຕັ້ງຜັນຂະຫຍາຍສັນຍາຮ່ວມມືລະຫວ່າງໜ່ວຍງານຕ່າງໆ; ສ້າງ ແລະ ຜັນຂະຫຍາຍປະຕິບັດບັນດາໂຄງການຄົ້ນຄວ້າຮ່ວມ ລະຫວ່າງສອງປະເທດ; ພັດທະນາຊັບພະຍາກອນມະນຸດ ແລະ ເພີ່ມທະວີຄວາມສາມາດດ້ານວິຊາສະເພາະໃຫ້ແກ່ພະນັກງານລາວ ໂດຍຜ່ານຊຸດຝຶກອົບຮົມຕ່າງໆ; ສ້າງ, ປັບປຸງນະໂຍບາຍ ແລະ ເອກະສານນິຕິກໍາໃນຂົງເຂດເຕັກໂນໂລຊີ ແລະ ນະວັດຕະກໍາຂອງລາວ; ຜັນຂະຫຍາຍບັນດາກິດຈະກໍາສົ່ງເສີມການຖ່າຍທອດເຕັກໂນໂລຊີ, ເຊື່ອມໂຍງວິສາຫະກິດ; ຊຸກຍູ້ການຮ່ວມມືດ້ານເຕັກໂນໂລຊີ ແລະ ນະວັດຕະກໍາຂອງທ້ອງຖິ່ນ, ພິເສດແມ່ນບັນດາທ້ອງຖິ່ນລຽບຊາຍແດນ.
ພ້ອມນັ້ນ, ກອງປະຊຸມໄດ້ເປັນເອກະພາບບັນດາເນື້ອໃນ ການຮ່ວມມືດ້ານເຕັກໂນໂລຊີ ແລະ ນະວັດຕະກໍາ ລະຫວ່າງ ສອງປະເທດ ໄລຍະ 2024-2026 ເປັນຕົ້ນ ການສ້າງລະບຽບການ, ນິຕິກໍາ,ແລກປ່ຽນຄະນະຂັ້ນຕ່າງໆ, ຮ່ວມມືຄົ້ນຄວ້າ, ພັດທະນາ, ນໍາໃຊ້, ຖ່າຍທອດເຕັກໂນໂລຊີ ແລະ ນະວັດຕະກໍາ, ພັດທະນາຊັບພະຍາກອນມະນຸດ, ຍົກສູງຄວາມສາມາດໃຫ້ພະນັກງານຄຸ້ມຄອງ, ຖ່າຍທອດເຕັກໂນໂລຊີ, ຊຸກຍູ້ການຮ່ວມມືດ້ານເຕັກໂນໂລຊີ ແລະ ນະວັດຕະກໍາຢູ່ທ້ອງຖິ່ນ; ສອງຝ່າຍຍັງໄດ້ເປັນເອກະພາບ ຈັດກອງປະຊຸມຄະນະກໍາມະການຮ່ວມມືດ້ານເຕັກໂນໂລຊີ ແລະ ນະວັດຕະກໍາ ຄັ້ງທີ II ໃນປີ 2026 ທີ່ ສສ ຫວຽດນາມ.
ຂ່າວ: ສົມຫວັງ. ພາບ: ຂ່າວສານຫວຽດນາມປະຈຳລາວ
