ໃນວັນທີ 18 ມິຖຸນາ 2024 ທີ່ກະຊວງເຕັກໂນໂລຊີ ແລະ ການສື່ສານ ທ່ານ ບັນດິດ ສຈ. ບໍ່ວຽງຄຳ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ຕ້ອນຮັບການເຂົ້າຢ້ຽມຕໍ່ານັບ ພົບປະຂອງ ທ່ານ ປລາຊານ ອາກລາວາລ ເອກອັກຄະລັດຖະທູດອິນເດຍປະຈຳ ສປປ ລາວ ເພື່ອແຈ້ງຈຸດປະສົງຮ່ວມມືວຽກງານດີຈີຕອນ ແລະ ວຽກອື່ນໆ.
ທ່ານລັດຖະມົນຕີ ໄດ້ຕີລາຄາສູງສາຍພົວພັນທາງການທູດລະຫວ່າງ ລາວ-ອິນເດຍ ເຊິ່ງລັດຖະບານແຫ່ງ ສາທາລະນະລັດ ອິນເດຍ ກໍຄື ສະຖານທູດອິນເດຍ ໄດ້ໃຫ້ການຊ່ວຍເຫຼືອບໍ່ວ່າຈະເປັນດ້ານການໃຫ້ທຶນໄປເຝິກອົບຮົມໄລຍະສັ້ນ ທີ່ປະເທດອິນເດຍ ດ້ານອາວະກາດ ICT ກະສິກຳ ແລະ ອື່ນໆ ລວມເຖິງທຶນການສຶກສາລະດັບປະລິນຍາຕີ ປະລິນຍາໂທ ແລະ ປະລິນຍາເອກ ຢູ່ປະເທດອິນເດຍ.
ທ່ານເອກອັກຄະລັດຖະທູດອິນເດຍ ຂໍສະແດງຄວາມຂອບໃຈຕໍ່ການເສຍສະຫຼະເວລາອັນມີຄຸນຄ່າ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ຈຸດປະສົງຂອງທ່ານເອກອັກຄະລັດຖະທູດອິນເດຍ ມາພົບປະທ່ານລັດຖະຕົນຕີໃນຄັ້ງນີ້ ເພື່ອຫາລືການພັດທະນາດ້ານດີຈີຕອນ ຍິ່ງໄປກວ່ານັ້ນ ຍັງໄດ້ຫາລືການເຊັນບົດບັນທຶກຄວາມເຂົ້າໃຈ ດ້ານການພັດທະນາດີຈີຕອນ ແລະ ການອອກແບບສະແຕມ ເພື່ອສະເຫຼີມສະຫຼອງວັນສາຍພົວພັນທາງການທູດ ລະຫວ່າງ ລາວ-ອິນເດຍ ເຊິ່ງຄາດວ່າຈະມິພິທີເຊັນບົດບັນທຶກຄວາມເຂົ້າໃຈ ແລະ ຈັດພິທີສະເຫຼີມສະຫຼອງມອບຮັບສະແຕມ ລະຫວ່າງ 21-27 ເດືອນກໍລະກົດ 2024 ເຊິ່ງເປັນໂອກາດດີໃນການຕ້ອນຮັບລັດຖະມົນຕີ ກະຊວງການຕ່າງປະເທດອິນເດຍ ທີ່ມາເຂົ້າຮ່ວມກອງປະຊຸມລັດຖະມົນຕີການຕ່າງປະເທດອາຊຽນ ເຊິ່ງປະເທດລາວເປັນເຈົ້າພາບຈັດກອງປະຊຸມ.
ເນື່ອງໃນໂອກາດອັນສະຫງ່າລາສີນີ້ ທ່ານລັດຖະມົນຕີກໍມີຄວາມຍິນດີຕ້ອນຮັບລັດຖະມົນຕີກະຊວງການຕ່າງປະເທດອິນເດຍ ທີ່ຈະມາຢ້ຽມຢາມປະເທດລາວ ແລະ ຫວັງຢ່າງຍິ່ງວ່າການເຊັນບົດບັນທຶກຄວາມເຂົ້າໃຈ ດ້ານການພັດທະນາດີຈີຕອນ ແລະ ພິທີມອບຮັບສະແຕມ ຈະຈັດຂຶ້ນເນື່ອງໃນໂອກາດດັ່ງກ່າວ.
ທີ່ມາ: ວຽງຈັນທຸລະກິດ-ສັງຄົມ
