ຕອນເຊົ້າວັນທີ 27 ກໍລະກົດ 2024, ທີ່ ສູນປະຊຸມແຫ່ງຊາດ (NCC), ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນ ຮັບ ແລະພົບປະສອງຝ່າຍກັບ ທ່ານ ດຣ. ສຸບຣາມານຢໍາ ໃຈຊັງເກີ (Dr. Subrahmanyam Jaishankar), ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ອິນເດຍ, ໃນໂອກາດທີ່ມາເຂົ້າຮ່ວມກອງປະຊຸມລັດຖະມົນຕີຕ່າງປະເທດອາ ຊຽນ ຄັ້ງທີ 57, ທີ່ ນະຄອນຫຼວງວຽງຈັນ.
ໃນໂອກາດນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍຕໍ່ ທ່ານ ດຣ. ສຸບຣາມານຢໍາ ໃຈຊັງເກີ ໃນໂອກາດທີ່ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນລັດຖະມົນຕີຕ່າງປະເທດ ແຫ່ງ ສ. ອິນເດຍ ອີກຫນຶ່ງສະໄຫມ. ສອງຝ່າຍ ໄດ້ເຫັນດີເປັນເອກະພາບຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ – ສ. ອິນເດຍ ທີ່ສືບຕໍ່ນັບມື້ໄດ້ຮັບການເສີມຂະຫຍາຍຂຶ້ນຢ່າງຕໍ່ເນື່ອງ ພາຍຫຼັງທີ່ສອງປະເທດ ໄດ້ສ້າງຕັ້ງສາຍພົວພັນການທູດນຳກັນໃນວັນທີ 02 ກຸມພາ 1965 ຄົບຮອບ 68 ປີ, ເຊິ່ງສະແດງອອກໃນການ ແລກປ່ຽນການພົບປະຢ້ຽມຢາມຂອງຄະນະຜູ້ແທນສອງປະເທດ ຢ່າງເປັນປົກກະຕິ. ພ້ອມນີ້, ສອງຝ່າຍ ໄດ້ຢືນຢັນຄືນຈະສືບຕໍ່ໃຫ້ການຮ່ວມມື ແລະ ສະໜັບສະໜູນຊ່ວຍເຫຼືອເຊິ່ງກັນ ແລະ ກັນ ໂດຍສະເພາະການຈັດຕັ້ງປະຕິບັດບັນດາໂຄງການຮ່ວມມືສອງຝ່າຍທີ່ໄດ້ລົງນາມກັນແລ້ວນັ້ນ ໃຫ້ປະກົດຜົນເປັນຈິງຍິ່ງ ຂຶ້ນ, ເຫັນດີຈະຊຸກຍູ້ໃຫ້ພາກສ່ວນກ່ຽວຂ້ອງຂອງຕົນເຮັດວຽກຮ່ວມກັນຢ່າງໃກ້ຊິດ ເພື່ອປຶກສາຫາລືເຖິງຊ່ອງທາງໃນການຂະຫຍາຍການຮ່ວມມືໃນຂະແໜງການຕ່າງໆທີ່ມີທ່າແຮງຮ່ວມ ກັນໃນຕໍ່ຫນ້າ ໂດຍຈັດຕັ້ງປະຕິບັດຜ່ານກົນໄກການປຶກສາຫາລືສອງຝ່າຍ (JC). ຝ່າຍລາວ ໄດ້ຕີລາຄາສູງຕໍ່ການສະໜັບສະໜູນຊ່ວຍເຫຼືອຂອງລັດຖະບານອິນເດຍ ໃນການສະໜອງທຶນຝຶກອົບຮົມໄລຍະສັ້ນ ແລະ ໄລຍະຍາວ ໃນດ້ານຕ່າງໆ ເປັນຕົ້ນ ການ ຊ່ວຍຍົກລະດັບຄວາມຮູ້ຄວາມສາມາດດ້ານພາສາອັງກິດ, ການບໍລິຫານຈັດການ, ການສຶກສາ, ການພັດທະນາຊັບພະຍາກອນ ມະນຸດ, ການພົວພັນສາກົນ, ວັດທະນະທຳ, ກະສິກຳ ແລະ ວຽກ ງານປ້ອງກັນຊາດ,ໃຫ້ການຊ່ວຍເຫຼືອໂຄງການບູລະນະວັດພູຈຳ ປາສັກຂອງ ສປປ ລາວ ໄລຍະປີ 2018-2028.
ພ້ອມນີ້, ສອງຝ່າຍ ກໍ່ໄດ້ຕີລາຄາສູງຕໍ່ການຮ່ວມມືໃນຂອບແມ່ນ້ຳຂອງ-ແມ່ນ້ຳຄົງຄາ ໂດຍສະເພາະການຈັດຕັ້ງປະຕິບັດໂຄງ ການເຫັນຜົນໄວ, ເຊິ່ງປະຈຸບັນ ໂຄງການທີ່ ສປປ ລາວ ໄດ້ຮັບຈາກກອງທຶນໂຄງການເຫັນຜົນໄວ ແມ່ນມີທັງຫມົດ 26 ໂຄງ ການ, ລວມມູນຄ່າຫຼາຍກວ່າ 1,2 ລ້ານໂດລາສະຫະລັດ. ພ້ອມນີ້, ສອງຝ່າຍ ກໍ່ໄດ້ຢືນຢັນຄືນຈະໃຫ້ການສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ເປັນຕົ້ນ ສປຊ, ອາ ຊຽນ-ອິນເດຍ ແລະ ອື່ນໆ.
ໂອກາດດຽວກັນນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ຕາງຫນ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈມາຍັງ ລັດຖະບານ ແລະ ປະຊາຊົນອິນ ເດຍ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນໄລຍະຜ່ານ, ເຊິ່ງໄດ້ປະກອບສ່ວນເຂົ້າໃນການພັດທະນາເສດ ຖະກິດ-ສັງຄົມ ຂອງ ສປປ ລາວ ແລະ ຍົກສູງຄຸນນະພາບຊີວິດການເປັນຢູ່ຂອງປະຊາຊົນ ໃຫ້ນັບມື້ນັບດີຂຶ້ນ. ພ້ອມນີ້, ກໍ່ໄດ້ສະເໜີໃຫ້ສືບຕໍ່ການຮ່ວມມືກັນໃນຕໍ່ຫນ້າ ເພື່ອເສີມຂະຫຍາຍສາຍພົວພັນມິດຕະພາບອັນດີງາມຂອງສອງປະເທດ ໃຫ້ໄດ້ຮັບການພັດທະນາຂຶ້ນສູ່ລະດັບໃຫມ່ທີ່ຍິ່ງໃຫຍ່ກວ່າເກົ່າ, ອວຍພອນໃຫ້ຄະນະຜູ້ແທນ ສ. ອິນເດຍ ຈົ່ງປະສົບຜົນສຳເລັດໃນການມາຢ້ຽມຢາມ ແລະ ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ໃນຄັ້ງນີ້.
ພາຍຫຼັງສຳເລັດການພົບປະ, ສອງຝ່າຍ ກໍ່ໄດ້ເຂົ້າຮ່ວມເປັນສັກຂີພິຍານໃນພິທີລົງນາມບົດບັນທຶກຄວາມເຂົ້າໃຈ ເພື່ອມອບ- ຮັບ ການຊ່ວຍເຫຼືອຂອງໂຄງການເຫັນຜົນໄວ ພາຍໃຕ້ຂອບການ ຮ່ວມມື ແມ່ນ້ຳຂອງ-ແມ່ນ້ຳຄົງຄາ, ຈຳນວນ 10 ໂຄງການ, ລວມມູນຄ່າທັງຫມົດ 486,288 ໂດລາສະຫະລັດ, ເຊິ່ງເປັນໂຄງການສະໜັບສະໜູນຈາກ ລັດຖະບານ ອິນເດຍ ໃຫ້ແກ່ ສປປ ລາວ, ປະກອບມີຄື: 1). ໂຄງການປົກປັກຮັກສາຕົ້ນໂພ, ປັບປຸງ ແລະ ພັດທະນາບໍລິເວນແທ່ນໂພ ຢູ່ສະຖານທີ່ທ່ອງທ່ຽວພູສີ, ແຂວງຫຼວງພະບາງ, ມູນຄ່າ 49.312 ໂດລາສະຫະລັດ; 2). ໂຄງການກໍ່ສ້າງສູນຝຶກອົບຮົມໃຫ້ຄຳປຶກສາ ແລະ ປົກປ້ອງຜູ້ເຄາະຮ້າຍຈາກຄວາມຮຸນແຮງ ທີ່ ແຂວງບໍ່ແກ້ວ, ມູນຄ່າ 45.033 ໂດລາສະຫະລັດ; 3). ໂຄງການກໍ່ສ້າງ ສຸກສາລາບ້ານຈອມອອງ, ເມືອງໄຊ, ແຂວງອຸດົມໄຊ, ມູນຄ່າ 48.242 ໂດລາສະຫະລັດ; 4). ໂຄງການກໍ່ສ້າງຕະຫຼາດຊຸມຊົນ ໃນເມືອງສຳພັນ, ແຂວງຜົ້ງສາລີ, ມູນຄ່າ 47.302 ໂດລາສະຫະລັດ; 5). ໂຄງການກໍ່ສ້າງໂຮງຮຽນປະຖົມ, ບ້ານມອນ, ເມືອງແປກ, ແຂວງຊຽງຂວາງ, ມູນຄ່າ 48.416 ໂດລາສະຫະລັດ; 6). ໂຄງການສະໜອງອຸປະກອນການແພດ ໃຫ້ສຸກສາລາ, ບ້ານວຽງໄຊ ແລະ ສາມຕົວເມືອງ (ເມືອງຊານ, ເມືອງພູວົງ ແລະ ເມືອງໄຊເສດຖາ), ແຂວງຜົ້ງສາລີ, ມູນຄ່າ 50.000 ໂດລາສະຫະລັດ; 7). ໂຄງການກໍ່ສ້າງລະບົບນ້ຳປະປາຊົນລະປະທານ (ບ້ານຕົວແບບ), ບ້ານຈຳປີ, ແຂວງຈຳປາສັກ, ມູນ ຄ່າ 49.100 ໂດລາສະຫະລັດ; 8). ໂຄງການກໍ່ສ້າງສຸກສາລາ ບ້ານບຶງຂາມ ແລະ ບ້ານກະຊະ, ເມືອງສາລະວັນ, ແຂວງສາລະວັນ, ມູນຄ່າ 49.883 ໂດລາສະຫະລັດ; 9). ໂຄງການກໍ່ສ້າງຫ້ອງການກະສິກຳ ແລະ ປ່າໄມ້ ແຂວງວຽງຈັນ, ມູນຄ່າ 49.000 ໂດລາສະຫະລັດ ແລະ 10). ໂຄງການກໍ່ສ້າງສຸກສາລາ ທົ່ງລາດ, ເມືອງວຽງພູຄາ, ແຂວງຫຼວງນ້ຳທາ, ມູນຄ່າ 50.000 ໂດລາສະຫະລັດ.
ສ. ອິນເດຍ ໃນນາມຄູ່ຮ່ວມພັດທະນາຂອບການຮ່ວມມືແມ່ນໍ້າຂອງ-ແມ່ນໍ້າຄົງຄາ ໄດ້ປະກາດສ້າງຕັ້ງໂຄງການເຫັນຜົນໄວ ໃນປີ 2012, ໂດຍການສະໜັບສະໜູນງົບປະມານ ຈໍານວນ 1 ລ້ານໂດລາສະຫະລັດຕໍ່ປີ ໃຫ້ແກ່ປະເທດສະມາຊິກ ເພື່ອຈັດຕັ້ງປະຕິບັດໂຄງການຂະໜາດນ້ອຍ, ມູນຄ່າບໍ່ເກີນ 50,000 ໂດລາສະຫະລັດ ຕໍ່ 1 ໂຄງການ. ນັບຕັ້ງແຕ່ທີ່ມີການສ້າງຕັ້ງໂຄງການເຫັນຜົນໄວ ໃນປີ 2012, ສປປ ລາວ ໄດ້ຮັບອະນຸມັດໂຄງການທັງໝົດ ຈໍານວນ 26 ໂຄງການ, ລວມມູນຄ່າ 1.267.191 ໂດລາສະຫະລັດ.
