ວັນທີ 31 ກໍລະກົດ 2024 ທີ່ກະຊວງອຸດສາຫະກໍາ ແລະ ການຄ້າ (ອຄ) ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຕ້ອນຮັບການເຂົ້າພົບປະຂອງ ທ່ານ ນາງ ກຣາຕ້າ ເອັນດາ ເວີດັນນິງຕີຢາດ ເອກອັກຄະລັດຖະທູດອິນໂດເນເຊຍ ປະຈຳລາວ.
ໂອກາດດັ່ງກ່າວ ທ່ານລັດຖະມົນຕີໄດ້ ສະແດງຄວາມຂອບໃຈຕໍ່ລັດຖະບານອິນໂດເນເຊຍ ທີ່ໄດ້ໃຫ້ການສະໜັບສະໜູນຊ່ວຍເຫຼືອລາວຕະຫຼອດຜ່ານມາ ແລະ ທີ່ຮ່ວມມືກັບສະຖາບັນຄົ້ນຄວ້າເສດຖະກິດອາຊຽນອາຊີຕາເວັນອອກ (ERIA) ທີ່ໃຫ້ການສະໜັບສະໜູນຊ່ວຍໃນການຈັດ 2 ກອງປະຊຸມທີ່ນະຄອນຫຼວງວຽງຈັນຄື: ກອງປະຊຸມຄັ້ງປະຖົມມະລຶກຂອງຄະນະປະຕິບັດງານປະສານງານອາຊຽນ ກ່ຽວກັບເສດຖະກິດສີຟ້າ ແລະ ກອງປະຊຸມ Blue Economy Task Force ຈະຈັດຂຶ້ນເດືອນສິງຫາ 2024.
ການພົບປະສອງຝ່າຍຄັ້ງນີ້ທ່ານລັດຖະມົນຕີ ໄດ້ແລກປ່ຽນປຶກສາຫາລືສະພາບລວມໃນການພັດທະນາເສດຖະກິດ ແລະ ການຄ້າຂອງລາວ ການເປັນເຈົ້າພາບໃນການຈັດກອງປະຊຸມອາຊຽນ ຂອງລາວ ສະເໜີແລກປ່ຽນປຶກສາຫາລືກ່ຽວກັບບັນດາແຜນງານ ແລະ ໂຄງການຮ່ວມມືທີ່ອິນໂດເນເຊຍ ກຳລັງໃຫ້ການຊ່ວຍເຫຼືອ ແລະ ສະໜັບສະໜູນ ແລະ ທ່ານທູດໄດ້ແນະນໍາຕົວໃນໂອກາດມາຮັບຕໍາແໜ່ງເປັນທູດ ປະຈໍາ ລາວ ນັບແຕ່ເດືອນ ກັນຍາ 2023 ວຽກງານ Blue Economy ວຽກງານ ASEAN Chair Year 2024 ແລະ Request for Support on the Launch of Batik for ASEAN ອິນໂດເນເຊຍ ໄດ້ນໍາສົ່ງຈົດໝາຍຈາກ HLTF-EI ອິນໂດເນເຊຍ ເພື່ອຮ້ອງຂໍການສະໜັບສະໜູນຈາກລາວ ໃນການຮ່ວມມືດ້ານຂໍ້ລິເລີ່ມກ່ຽວກັບຜ້າ Batik ຂອງອິນໂດເນເຊຍ ທີ່ຈະນໍາມານຳສະເໜີ ແລະ ເປັນຂອງຂວັນສຳລັບລັດຖະມົນຕີເສດຖະກິດອາຊຽນ ໃນກອງປະຊຸມສະພາປະຊາຄົມເສດຖະກິດອາຊຽນ (AECC) ທີ່ຈະມາເຖິງນີ້ ແລະ ໄດ້ແລກປ່ຽນບັນຫາສຳຄັນອື່ນໆຕື່ມອີກ.
ຂ່າວ: ວຽງຈັນໃໝ່
