ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ພົບປະສອງຝ່າຍກັບ ທ່ານ ເຊເກ ອາເລນິກ (Seigei Aleinik), ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ເບລາຣຸດຊີ, ໃນໂອກາດນໍາພາຄະນະຜູ້ແທນຂອງ ສປປ ລາວ ເດີນທາງເຂົ້າຮ່ວມກອງປະຊຸມລັດຖະມົນຕີຕ່າງປະເທດ ຂອງປະເທດສະມາຊິກກຸ່ມ BRICS ແລະ ປະເທດກໍາລັງພັດທະນາ (International Relations Meeting ‘BRICS Dialogue with Developing Countries’), ໃນວັນທີ 10-11 ມິຖຸນາ 2024, ທີ່ ເມືອງ Nizhny Novgorod, ສະຫະພັນ ຣັດເຊຍ.
ສອງຝ່າຍໄດ້ສະແດງຄວາມດີໃຈທີ່ໄດ້ພົບກັບກັນໃນຄັ້ງນີ້ ເພື່ອປຶກສາຫາລືໃນການສືບຕໍ່ເສີມຂະຫຍາຍການພົວພັນມິດຕະພາບ ແລະ ຮ່ວມມື ລະຫວ່າງສອງປະເທດ ລາວ-ເບລາຣຸດຊີ ທີ່ມີມາແຕ່ດົນນານນັ້ນ ໃຫ້ແຕກດອກອອກຜົນຍິ່ງໆຂຶ້ນ ເພື່ອຜົນປະໂຫຍດຂອງປະຊາຊາຊົນສອງຊາດ ລາວ-ເບລາຣຸດຊີ. ການພົວພັນຮ່ວມມືລະຫວ່າງສອງປະເທດ ຕະຫຼອດໄລຍະທີ່ຜ່ານມາ ແມ່ນຢູ່ໃນລະດັບດີ ໂດຍສະເພາະທາງດ້ານການເມືອງ.
ສອງຝ່າຍໄດ້ມີການແລກປ່ຽນການຢ້ຽມຢາມຂອງການນໍາຂັ້ນສູງ ຂອງສອງປະເທດເປັນປະຈໍາ. ສອງກະຊວງການຕ່າງປະເທດ ລາວ-ເບລາຣຸດຊີ ໄດ້ມີກົນໄກປຶກສາຫາລືທາງດ້ານການເມືອງ ລະຫວ່າງສອງກະຊວງການຕ່າງປະເທດ (PC), ຊຶ່ງສອງຝ່າຍຫາກໍ່ຮ່ວມກັນຈັດກອງປະຊຸມປຶກສາຫາລືດ້ານການເມືອງ ຄັ້ງທີ 3 ແລະ ຮ່ວມກັນສະເຫຼີມສະຫຼອງ ຄົບຮອບ 30 ປີ ແຫ່ງການສ້າງຕັ້ງສາຍພົວພັນການທູດ ລາວ-ເບລາຣຸດຊີ ໃນໂອກາດທີ່ ທ່ານ ເຢັບເກນີ ເຊດຕາສະກົບ (Evgeny Shestakov), ຮອງລັດຖະມົນຕີກະຊວງການຕ່າງປະເທດ ເບລາຣຸດຊີ ເດີນທາງຢ້ຽມຢາມ ສປປ ລາວ ໃນເດືອນມີນາ 2024 ຜ່ານມາ.
ພ້ອມກັນນີ້, ສອງຝ່າຍໄດ້ປຶກສາຫາລື ເພື່ອສືບຕໍ່ຊຸກຍູ້ການພົວພັນຮ່ວມມືໃນຕໍ່ໜ້າ ໂດຍສະເພາະ ການສືບຕໍ່ຊຸກຍູ້ໃຫ້ມີການແລກປ່ຽນການຢ້ຽມຢາມຂອງການນໍາຂັ້ນສູງລະຫວ່າງສອງປະເທດ ລວມທັງສາຍພັກ; ຊຸກຍູ້ສຶບຕໍ່ ສຶກສາຄວາມເປັນໄປໄດ້ໃນການຮ່ວມມືໃນຂະແຫນງທີ່ມີທ່າແຮງ ໂດຍສະເພາະ ດ້ານກະສິກໍາ, ເຄມີ, ສຶກສາ-ກິລາ, ການທ່ອງທ່ຽວ ແລະ ອື່ນໆ; ການກະກຽມຈັດກອງປະຊຸມປຶກສາຫາລື ລະຫວ່າງ 2 ກະຊວງການຕ່າງປະເທດ ຄັ້ງທີ່ 4 ທີ່ ເບລາຣຸດຊີ, ລວມເຖິງການພົວພັນຮ່ວມມືໃນຂອບຫຼາຍຝ່າຍ ໂດຍສະເພາະ ໃນຂອບອາຊຽນ-ເບລາຣຸດຊີ ແລະ ຂອບອື່ນໆ, ທັງຍັງໄດ້ແລກປ່ຽນຄໍາຄິດເຫັນຕໍ່ສະພາບການພາກພື້ນ ແລະ ສາກົນຈໍານວນໜຶ່ງ.
ໃນໂອກາດດຽວກັນນີ້, ຝ່າຍລາວ ໄດ້ສະແດງຄວາມຊົມເຊີຍທີ່ຝ່າຍ ເບລາຣຸດຊີ ຈະພິຈາລະນາສ້າງຕັ້ງສະມາຄົມ ມິດຕະພາບ ເບລາຣຸດຊີ-ລາວ ໃນຕໍ່ຫນ້ານີ້ ເພື່ອແນໃສ່ສົ່ງເສີມການພົວພັນລະຫວ່າງ ປະຊາຊົນສອງປະເທດ, ທັງຍັງໄດ້ເຊື້ອເຊີນທ່ານລັດຖະມົນຕີກະຊວງການຕ່າງປະເທດ ເບລາຣຸດຊີ ເດີນທາງຢ້ຽມຢາມ ສປປ ລາວ ໃນເວລາທີ່ເຫມາະສົມ.
