ກະຊວງອຸດສາຫະກຳ ແລະ ການຄ້າ ຮ່ວມກັບ ອົງການພັດທະນາສາກົນປະເທດສະຫະລັດອາເມຣິກາ (USAID) ເປີດນຳໃຊ້ລະບົບອອກໃບຢັ້ງຢືນ ແຫຼ່ງກຳເນີດສິນຄ້າທາງເອເລັກໂຕຣນິກ (e-CO) ທີ່ໄດ້ປັບປຸງໃໝ່ ຂຶ້ນວັນທີ 31 ກໍລະກົດ 2024 ທີ່ ນະຄອນຫຼວງວຽງຈັນ ເປັນປະທານຂອງ ທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະ ທ່ານ ນາງ Heather Variava ເອກອັກຄະລັດຖະທູດສະຫະລັດອາເມຣິກາປະຈໍາ ລາວ ພ້ອມດ້ວຍຕາງໜ້າຈາກ ພາກລັດ ແລະ ບໍລິສັດ ເອກະຊົນ ເຂົ້າຮ່ວມແບບເຊິ່ງໜ້າ ແລະ ອອນລາຍ.
ລະບົບອອກໃບຢັ້ງຢືນແຫຼ່ງກຳເນີດສິນຄ້າ ທາງເອເລັກໂຕຣນິກ (e-CO) ທີ່ໄດ້ຮັບການປັບປຸງໃໝ່ນີ້ ເປັນວິທີທີ່ສະດວກຂຶ້ນສຳລັບພາກທຸລະກິດ ໃນການຂໍໃບຢັ້ງຢືນແຫຼ່ງກຳເນີດສິນຄ້າ ທີ່ຈະຊ່ວຍໃຫ້ໄດ້ຮັບສິດທິພິເສດທາງດ້ານການຄ້າໂດຍປະຢັດເວລາ ແລະ ຄ່າໃຊ້ຈ່າຍ ອີງຕາມກົດລະບຽບ ຂອງ ສປປ ລາວ ແລະ ສາກົນເຊິ່ງ ສາມາດເຂົ້າສູ່ລະບົບໄດ້ທີ່ https://www.ecolao.gov.la/.
e-CO ຄຸ້ມຄອງໂດຍກົມການຄ້າຕ່າງປະເທດ ກະຊວງອຸດສາຫະກຳ ແລະ ການຄ້າ ເປັນການສະໜອງບໍລິການ ໃຫ້ແກ່ບັນດາທຸລະກິດ ວິສາຫະກິດຂະໜາດນ້ອຍ ແລະ ກາງ ສາມາດຍື່ນຂໍໃບຢັ້ງຢືນ ແຫຼ່ງກຳເນີດສິນຄ້າ ຢ່າງເປັນທາງການ ໄດ້ທາງອອນລາຍ ລະບົບອອກໃບຢັ້ງຢືນແຫຼ່ງກຳເນີດ ສິນຄ້າມີບົດບາດສຳຄັນສຳລັບການຄ້າລະຫວ່າງ ປະເທດ ເພາະ ສາມາດສະແດງຫຼັກຖານແຫຼ່ງ ກຳເນີດຂອງສິນຄ້າເຮັດໃຫ້ສິນຄ້າ ມີສິດທິ ໄດ້ຮັບການ ປະຕິບັດແບບພິເສດ ໃນການສົ່ງອອກສິນຄ້າຂ້າມແດນລະຫວ່າງປະເທດ.
ທ່ານ ມະໂນທອງ ວົງໄຊ ກ່າວວ່າ: ການເປີດນຳໃຊ້ລະບົບອອກໃບຢັ້ງຢືນແຫຼ່ງກຳເນີດສິນຄ້າ ທາງເອເລັກໂຕຣນິກ ຖືເປັນບາດກ້າວສຳຄັນໃຫ້ແກ່ພາກທຸລະກິດຂອງລາວ ການປັບປຸງຂັ້ນ ຕອນໃຫ້ມີຄວາມງ່າຍດາຍຂຶ້ນ ຊ່ວຍສ້າງຄວາມເຂັ້ມແຂງໃຫ້ແກ່ພາກທຸລະກິດເຂົ້າເຖິງຕະຫຼາດໃໝ່ໆ ແລະ ປະກອບສ່ວນເຂົ້າໃນການເຕີບໃຫຍ່ຂອງຂະແໜງການສົ່ງອອກຂອງພວກເຮົາ.”
ທ່ານ ນາງ Heather Variava ໄດ້ສະແດງຄວາມຊົມເຊີຍຕໍ່ລັດຖະບານ ສປປ ລາວ ໂດຍ ສະເພາະແມ່ນກະຊວງອຸດສາຫະກຳ ແລະ ການຄ້າ ສຳລັບຄວາມເປັນຜູ້ນຳໃນການສ້າງຄວາມສາມາດໃຫ້ແກ່ການແຂ່ງຂັນຂອງພາກທຸລະກິດ ຜ່ານການປັບປຸງລະບົບອອກໃບຢັ້ງຢືນແຫຼ່ງກຳເນີດສິນຄ້າ ທາງເອເລັກໂຕຣນິກ (e-CO) ລະບົບອອກໃບຍັ້ງຢືນແຫຼ່ງກຳເນີດສິນຄ້າ ແມ່ນຜົນຂອງການຮ່ວມມືກັນ ຂອງປະເທດ ສະຫະລັດອາເມຣິກາ ແລະ ສປປ ລາວ ໃນການສົ່ງເສີມສະພາບແວດລ້ອມ ທີ່ເອື້ອອຳນວຍ ໃຫ້ແກ່ການເຕີບໂຕຂອງພາກທຸລະກິດຫຼາຍຂຶ້ນ ງານໃນມື້ນີ້ແມ່ນການສະເຫຼີມສະຫຼອງຜົນສຳເລັດຂອງ ຄວາມພະຍາຍາມຮ່ວມກັນຂອງພວກເຮົາ ທັງເປັນການຮຽກຮ້ອງໃຫ້ທຸກພາກສ່ວນ ທັງພາກລັດ ແລະ ພາກເອກະຊົນ ນຳໃຊ້ລະບົບດັ່ງກ່າວນີ້ ເພື່ອເພີ້ມການເຊື່ອມໂຍງກັບຕະຫຼາດໃນພາກພື້ນ ແລະ ສາກົນ.”
ຂ່າວ: ວຽງຈັນໃໝ່
