ເມື່ອບໍ່ດົນມານີ້, ຄະນະຜູ້ແທນອົງການໄອຍະການທະຫານຂັ້ນສູງກອງທັບປະຊາຊົນລາວນໍາໂດຍ ສະຫາຍ ພັນເອກ ອໍາເພັດ ພົມມະກອນ ຫົວໜ້າອົງການໄອຍະການທະຫານຂັ້ນສູງ ໄດ້ເດີນທາງຢ້ຽມຢາມ ສປ ຈີນ ແລະ ເຮັດວຽກຮ່ວມກັບຄະນະຜູ້ແທນອົງການໄອຍະການທະຫານຂັ້ນສູງ ກອງທັບປົດປ່ອຍປະຊາຊົນຈີນ ໃຫ້ການຕ້ອນຮັບໂດຍ ສະຫາຍ ພົນຕີ ຈາງຈີນ ຫົວໜ້າອົງການໄອຍະການທະຫານ ກອງທັບປົດປ່ອຍປະຊາຊົນຈີນ.
ຄະນະຜູ້ແທນທັງສອງຝ່າຍໄດ້ປຶກສາຫາລືແລກປ່ຽນຄໍາຄິດຄໍາເຫັນ ໃນບັນຫາທີ່ສໍາຄັນ, ຕ່າງຝ່າຍມີຄວາມສົນໃຈນໍາກັນ ເຊັ່ນ: ສິດ ແລະ ໜ້າທີ່, ພາລະບົດບາດກ່ຽວກັບອົງການໄອຍະການທະຫານ, ຂັ້ນຕອນການດໍາເນີນຄະດີອາຍາ, ການກໍ່ສ້າງບຸກຄະລາກອນ ແລະ ໄດ້ຕົກລົງກັນຮ່າງບົດບັນທຶກຊ່ວຍຈໍາ ເພື່ອເປັນບ່ອນອີງໃນການພົວພັນຮ່ວມມື ລະຫວ່າງອົງການໄອຍະການທະຫານຂັ້ນສູງ ກອງທັບປະຊາຊົນລາວ ແລະ ອົງການໄອຍະການທະຫານ ກອງທັບປົດປ່ອຍປະຊາຊົນຈີນ ໃຫ້ນັບມື້ກ້າວສູ່ລວງເລິກ.
ໃນການເຮັດວຽກຢູ່ ສປ ຈີນ ໃນຄັ້ງນີ້ ນອກຈາກການພົບປະຮ່ວມກັບອົງການໄອຍະການ ທະຫານກອງທັບປົດປ່ອຍປະຊາຊົນຈີນ ຢ່າງເປັນທາງການແລ້ວ ຄະນະຜູ້ແທນລາວ ຍັງໄດ້ເຂົ້າຢ້ຽມຢາມຂໍ່ານັບຮອງຫົວໜ້າ ອົງການໄອຍະການປະຊາຊົນສູງສຸດ ແຫ່ງ ສປ ຈີນ, ທ່ຽວຊົມສະຖານທີ່ປະຫວັດສາດ, ອະນຸສອນສະຖານອາດີດຜູ້ນໍາ ສປ ຈີນ ແລະ ສະຖານທີ່ວັດທະນະທໍາທີ່ມີຊື່ສຽງຂອງ ສປ ຈີນ ຈໍານວນໜຶ່ງ.
ຂ່າວ: ຫນັງສືພິມກອງທັບ
