ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ລາວ ແລະ ຊູແອດ ລົງນາມບົດບັນທຶກຄວາມເຂົ້າໃຈ ວ່າດ້ວຍ ການປຶກສາຫາລືສອງຝ່າຍ

ໃນວັນທີ 04 ມິຖຸນາ 2019, ທີ່ ກະຊວງການຕ່າງປະເທດ ແຫ່ງ ຣາຊະອານາຈັກ ຊູແອດ ໄດ້ມີການເຊັນບົດບັນທຶກຄວາມເຂົ້າໃຈ ລະຫວ່າງ ກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ກະຊວງການຕ່າງປະເທດ ແຫ່ງ ຣາຊະອານາຈັກ ຊູແອດ ວ່າດ້ວຍການປຶກສາຫາລືສອງຝ່າຍ, ຮ່ວມລົງນາມບົດບັນທຶກຄັ້ງນີ້ ຝ່າຍລາວແມ່ນ ທ່ານ ບຸນແພງ ຊາຍກັນຍາ, ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ຣາຊະອານາຈັກ ຊູແອດ ແລະ ຝ່າຍຊູແອດແມ່ນ ທ່ານ ນາງ ແອນນິກກາ ໂຊເດີ (Annika Sӧder), ຮອງລັດຖະມົນຕີກະຊວງການຕ່າງປະເທດ ແຫ່ງ ຣາຊະອານາຈັກ ຊູແອດ.

ການເຊັນບົດບັນທຶກຄວາມເຂົ້າໃຈດັ່ງກ່າວ ໄດ້ເປັນພື້ນຖານສຳຄັນໃຫ້ແກ່ການເສີມຂະຫຍາຍ ແລະ ຮັດແໜ້ນການພົວພັນຮ່ວມມື ລະຫວ່າງສອງກະຊວງການຕ່າງປະເທດ ກໍຄື ລະຫວ່າງ ສປປ ລາວ ແລະ ຣາຊະອານາຈັກຊູແອດ ໃຫ້ນັບມື້ນັບເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ.

ໃນໂອກາດນີ້, ທ່ານເອກອັກຄະລັດຖະທູດ ບຸນແພງ ຊາຍກັນຍາ ໄດ້ກ່າວສະແດງຄວາມຂອບໃຈ ແລະ ຊົມເຊີຍຕໍ່ ທ່ານ ນາງ ແອນນິກກາ ໂຊເດີ ກໍຄືຝ່າຍຊູແອດ ທີ່ໄດ້ໃຫ້ຄວາມສຳຄັນຕໍ່ການຮ່ວມມືສອງຝ່າຍ ພ້ອມທັງໃຫ້ກຽດລົງນາມໃນຄັ້ງນີ້ອີກດ້ວຍ. ໃນໂອກາດດຽວກັນນີ້, ທ່ານ ນາງ ແອນນິກກາ ໂຊເດີ ກໍ່ໄດ້ສະແດງຄວາມຂອບໃຈ ແລະ ຊົມເຊີຍໃນການປະຕິບັດໜ້າທີ່ຢ່າງຫ້າວຫັນ ຂອງ ທ່ານເອກອັກຄະລັດຖະທູດ ບຸນແພງ ຊາຍກັນຍາ ແລະ ທັງສອງຍັງໄດ້ສົນທະນາແລກປ່ຽນຄຳເຫັນ ກ່ຽວກັບ ສະພາບການເຄື່ອນໄຫວວຽກງານການທູດທີ່ມີສ່ວນກ່ຽວພັນກັບການພົວພັນສອງຝ່າຍ.

ກ່ອນໜ້ານີ້ ຄືໃນວັນທີ 21 ພຶດສະພາ 2019, ທີ່ ຫໍພິພິຕະພັນ Ethnography (Ethnografiska Museet), ນະຄອນຫຼວງສະຕ໋ອກໂຮມ, ຣາຊະອານາຈັກ ຊູແອດ, ໄດ້ມີພິທີມອບເຄື່ອງນຸ່ງພື້ນເມືອງລາວປະດັບດ້ວຍລາຍປັກດິ່ງຫຼວງພະບາງ ຈໍານວນ 3 ຊຸດ, ໃນນັ້ນມີຊຸດຍິງ 2 ຊຸດ ແລະ ຊຸດຊາຍ 1 ຊຸດ ໃຫ້ແກ່ຫໍພິພິຕະພັນດັ່ງກ່າວ.ເຂົ້າຮ່ວມໃນພິທີມອບເຄື່ອງຄັ້ງນີ້, ຝ່າຍລາວມີ ທ່ານ ບຸນແພງ ຊາຍກັນຍາ, ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ຣາຊະອານາຈັກ ຊູແອດ ພ້ອມດ້ວຍພັນລະຍາ ແລະ ພະນັກງານສະຖານທູດ, ຝ່າຍຊູແອດມີ ທ່ານ ນາງ ແອນ ຟໍລິນ (Ann Follin), ອະທິບໍດີຫໍພິພິຕະພັນແຫ່ງຊາດ ດ້ານວັດທະນະທໍາສາກົນ (National Museums of World Culture), ມີບັນດາທູຕານຸທູດ ພ້ອມດ້ວຍພັນລະຍາ, ພະນັກງານທີ່ກ່ຽວຂ້ອງ ແລະ ແຂກຖືກເຊີນ ເຂົ້າຮ່ວມຫລາຍກວ່າ 50 ທ່ານ.

ໃນໂອກາດນີ້, ທ່ານ ນາງແອນ ຟໍລິນ ໄດ້ກ່າວຕ້ອນຮັບ ແລະ ເປີດງານ ໂດຍເນັ້ນເຖິງຄວາມໝາຍຄວາມສໍາຄັນຂອງການປົກປັກຮັກສາວັດທະນະທໍາຂອງນາໆຊາດໃນໂລກ ລວມທັງວັດທະນະທໍາລາວ ໂດຍໄດ້ກ່າວເຖິງຕົວຢ່າງຂອງບາງວັດຖຸທີ່ໄດ້ສະສົມຈາກລາວ. ພ້ອມດຽວກັນນີ້, ທ່ານເອກອັກຄະລັດຖະທູດ ບຸນແພງ ຊາຍກັນຍາ ກໍໄດ້ຍົກໃຫ້ເຫັນເຖິງຄວາມສໍາຄັນຂອງມູນເຊື້ອຕໍ່າຫູກທໍໄໝ ແລະ ຜະລິດເຄື່ອງນຸ່ງຫົ່ມ ຂອງລາວ, ໂດຍໄດ້ກ່າວເຖິງ ມູນເຊື້ອການປັກດິ້ງຂອງປະຊາຊົນລາວ ທີ່ໄດ້ຜະລິດຊຸດເຄື່ອງນຸ່ງປັກດິ້ງ ທີ່ໄດ້ນໍາໄປມອບໃຫ້ຫໍພິພິຕະພັນໃນຄັ້ງນີ້. ພ້ອມນີ້, ທ່ານ ນາງຟາເບຍ ມາກູຣິຕາ ມິດແມນ (Fabia Margurita Midman), ທີ່ປຶກສາປະຈໍາຫ້ອງການຄູ່ຮ່ວມຂອງອົງການສະຫະປະຊາຊາດ ດ້ານຊີວະນາໆພັນ, ຊຶ່ງເປັນຜູ້ແນະນໍາໃນການນໍາເອົາເຄື່ອງວັດຖຸໄປມອບໃນຄັ້ງນີ້ ມີຄໍາເຫັນ ໂດຍໄດ້ເນັ້ນເຖິງຄວາມສໍາຄັນຂອງການທູດທາງດ້ານວັດທະນະທໍາ ທີ່ເປັນແນວທາງໜຶ່ງໃນການຮັດແໜ້ນສາຍພົວພັນລະຫວ່າງສອງປະເທດ.

ການມອບເຄື່ອງໃນຄັ້ງນີ້ເປັນການສົ່ງເສີມ ແລະ ປົກປັກຮັກສາມູນເຊື້ອວັດທະນະທໍາ, ຮີດຄອງປະເພນີອັນດີງາມ ຂອງຊາດລາວເຮົາ ທີ່ມີມາແຕ່ບູຮານນະການ ຢູ່ໃນ ຊູແອດ ແລະ ສາກົນ. ນອກນັ້ນ, ຍັງເປັນການປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນຮ່ວມມື ລະຫວ່າງ ສອງປະເທດ ລາວ ແລະ ຊູແອດ ໃຫ້ນັບມື້ນັບເຕີບໃຫຍ່ຂະຫຍາຍຕົວຂຶ້ນເລື້ອຍໆ.