ໂດຍຕອບສະໜອງຕາມຄຳເຊີນຂອງ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງ ປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ທ່ານ ປີເຕີ ຊີຢາໂຕ (Péter SZIJJÁRTÓ), ລັດຖະມົນຕີກະຊວງການຕ່າງປະເທດ ແລະ ການຄ້າ ຮົງກາຣີ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ, ໃນວັນທີ 13-14 ມິຖຸນາ 2024 ເພື່ອສືບຕໍ່ຮັດແໜ້ນ ແລະ ເສີມ ຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນ ເຊື້ອອັນດີງາມມາແຕ່ດົນນານ, ບົນພື້ນຖານການເປັນຄູ່ຮ່ວມ ມືຍຸດທະສາດ ລະຫວ່າງ ສປປ ລາວ ແລະ ຮົງກາຣີ ໃຫ້ແຕກດອກອອກຜົນຍິ່ງຂຶ້ນ.
ໃນວັນທີ 14 ມິຖຸນາ 2024, ທີ່ ກະຊວງການຕ່າງປະເທດ ໄດ້ມີກອງປະຊຸມພົບປະສອງຝ່າຍຢ່າງເປັນທາງການ, ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ສປປ ລາວ ຄັ້ງນີ້ ຂອງ ທ່ານລັດຖະມົນຕີ ປີເຕີ ຊີຢາໂຕ, ເຊິ່ງເປັນຂີດໝາຍສຳຄັນໃນການຮັດ ແໜ້ນສາຍພົວພັນມິດຕະພາບ ແລະ ການຮ່ວມມືອັນດີ, ກໍ່ຄື ການຮ່ວມມືຂອງສອງກະຊວງການຕ່າງປະເທດ ລາວ-ຮົງກາຣີ ເພື່ອສືບຕໍ່ຈັດຕັ້ງປະຕິບັດບັນດາຂໍ້ຕົກລົງຂອງການນຳສອງປະເທດ ໃຫ້ມີປະສິດທິພາບ, ປະສິດທິຜົນ ແລະ ເປັນຮູບປະທຳຍິ່ງຂຶ້ນ. ພ້ອມກັນນັ້ນ, ສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບອັນສະຫນິດແຫນ້ນ ລະຫວ່າງ ລາວ-ຮົງກາຣີ ຄົບ ຮອບ 62 ປີ (12 ກັນຍາ 1962) ທີ່ສືບຕໍ່ໄດ້ຮັບການເສີມ ຂະຫຍາຍຂຶ້ນຢ່າງຕໍ່ເນື່ອງ ບົນພື້ນຖານການເປັນຄູ່ຮ່ວມມືຍຸດທະສາດ, ຄວາມເຂົ້າອົກເຂົ້າໃຈ, ຄວາມໄວ້ເນື້ອເຊື່ອໃຈ ແລະ ຊ່ວຍເຫຼືອເຊິ່ງກັນ ແລະ ກັນ, ເຊິ່ງສະແດງອອກໃນການພົບປະ, ການແລກປ່ຽນການຢ້ຽມຢາມລະຫວ່າງການນຳຂັ້ນສູງຂອງສອງປະເທດ ແລະ ໃຫ້ການສະໜັບສະໜູນຊ່ວຍເຫຼືອເຊິ່ງກັນ ແລະກັນ ຢ່າງເປັນປົກກະຕິ; ອັນທີ່ພົ້ນເດັ່ນ, ຝ່າຍລາວ ໄດ້ເປີດສະຖານເອກອັກຄະລັດຖະທູດຂອງຕົນ ປະຈໍາ ຮົງກາຣີ ຄືນໃຫມ່ ໃນປີ 2022, ເຊິ່ງຖືເປັນນິມິດໝາຍອັນສໍາຄັນໃຫ້ແກ່ການຮ່ວມມືກັນແລະກັນ. ໃນໂອກາດຢ້ຽມຢາມ ສປປ ລາວ ຂອງລັດຖະມົນຕີກະຊວງການຕ່າງປະເທດ ແລະ ຮົງກາຣີ ຄັ້ງນີ້, ຈະໄດ້ມີການເປີດສະຖານເອກອັກຄະລັດຖະທູດ ຮົງກາຣີ ປະຈໍາ ສປປ ລາວ ຄືນໃໝ່ ຢ່າງເປັນທາງການທີ່ນະຄອນຫຼວງວຽງຈັນ ເຊິ່ງສອງຝ່າຍກໍ່ຈະໄດ້ເຂົ້າຮ່ວມພິທີດັ່ງກ່າວ, ທັງຫມົດນີ້ ໄດ້ສະແດງໃຫ້ເຫັນເຖິງ ຄວາມມຸ້ງຫວັງຂອງ ສອງລັດຖະບານ ລາວ-ຮົງກາຣີ ເພື່ອສືບຕໍ່ຮັດແຫນ້ນ ແລະ ເສີມຂະຫຍາຍການພົວພັນສອງຝ່າຍ ໃຫ້ກ້າວຂຶ້ນສູ່ລະດັບໃຫມ່ໃນອະນາຄົດ.
ສຳລັບທິດທາງໃນຕໍ່ຫນ້າ, ສອງຝ່າຍ ຈະສືບຕໍ່ໃຫ້ມີການພົບ ປະແລກປ່ຽນຂອງການນຳຂັ້ນສູງສອງປະເທດ ຢ່າງເປັນປົກກະຕິ, ຊຸກຍູ້ການໄປມາຫາສູ່ກັນລະຫວ່າງປະຊາຊົນດ້ວຍກັນ ເພື່ອສົ່ງ ເສີມຂະແໜງການທ່ອງທ່ຽວ ລາວ-ຮົງກາຣີ, ສືບຕໍ່ແລກປ່ຽນບົດຮຽນ ແລະ ການຈັດຝຶກອົບຮົມ ລະຫວ່າງ ນັກການທູດໜຸ່ມ ນ້ອຍນຳກັນ, ຊຸກຍູ້ໃຫ້ ຄະນະປະສານງານຮ່ວມ ລາວ-ຮົງກາຣີ ສືບຕໍ່ຕິດຕາມຊຸກຍູ້ການຈັດຕັ້ງປະຕິບັດໂຄງການເງິນກູ້ຢືມແບບມີເງື່ອນໄຂບໍ່ມີດອກເບ້ຍ ໄລຍະ 3 ຄື: 1.) ໂຄງການພັດທະນາໂຄງລ່າງພື້ນຖານກະສິກໍາ, 2.) ໂຄງການຄຸ້ມຄອງພົນລະເມືອງທັນສະໄຫມ ແລະ 3.) ໂຄງການບໍາບັດນໍ້າເປື້ອນແບບລວມສູນນະຄອນ ຫຼວງວຽງຈັນ ເພື່ອໃຫ້ປະສົບຜົນສໍາເລັດ ຕາມແຜນທີ່ກໍານົດໄວ້.
ນອກຈາກນັ້ນ, ຈະເພີ່ມທະວີການຮ່ວມມືກັນໃນຂະແໜງການອື່ນໆທີ່ສອງຝ່າຍມີທ່າແຮງ ເຊັ່ນ: ການຮ່ວມມືດ້ານຊັບພະຍາ ກອນທຳມະຊາດ ແລະ ສິ່ງແວດລ້ອມ, ການສຶກສາ ແລະ ອື່ນໆ. ໃນນັ້ນ, ຝ່າຍ ຮົງກາຣີ ສະແດງຄວາມຍິນດີຈະສືບຕໍ່ຊ່ວຍເຫຼືອໃນການພັດທະນາຊັບພະຍາກອນມະນຸດ ໃຫ້ແກ່ ຝ່າຍລາວ, ເຊິ່ງປະຈຸບັນແມ່ນໄດ້ສະຫນອງທຶນການສຶກສາແກ່ ສປປ ລາວ ຈຳນວນ 150 ທຶນຕໍ່ປີ. ພ້ອມດຽວກັນນີ້, ສອງຝ່າຍ ຈະສືບຕໍ່ໃຫ້ການສະຫນັບສະຫນູນຊ່ວຍເຫຼືອເຊິ່ງກັນ ແລະ ກັນ ໃນຂອບການຮ່ວມມືຫຼາຍຝ່າຍ ເປັນຕົ້ນ ການຮ່ວມມືໃນຂອບ ສປຊ, ອາຊຽນ-ຮົງກາຣີ ແລະ ອາຊຽນ-ອີຢູ. ນອກນັ້ນ, ສອງຝ່າຍໄດ້ປຶກສາຫາລື ແລະ ແລກປ່ຽນຄໍາຄິດຄໍາເຫັນກ່ຽວກັບສະພາບ ການໃນພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.
ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ຕາງໜ້າໃຫ້ລັດ ຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈຕໍ່ການສະໜັບສະໜູນຊ່ວຍເຫຼືອຂອງ ລັດຖະບານ ແລະ ປະຊາ ຊົນ ຮົງກາຣີ ໃນໄລຍະຜ່ານມາ, ເຊິ່ງໄດ້ປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ໃນແຕ່ລະໄລຍະ. ໃນຂະນະດຽວກັນ, ຝ່າຍ ຮົງກາຣີ ກໍ່ໄດ້ສະແດງຄວາມຍິນ ດີຈະສືບຕໍ່ຊຸກຍູ້ໃຫ້ພາກສ່ວນກ່ຽວຂ້ອງຂອງຕົນປະສານສົມທົບກັບຝ່າຍລາວ ເພື່ອຮ່ວມກັນຈັດຕັ້ງຜັນຂະຫຍາຍບັນດາຂໍ້ຕົກລົງສອງຝ່າຍ ໃຫ້ໄດ້ຮັບການຈັດຕັ້ງປະຕິບັດຢ່າງມີໝາກຜົນສູງ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງປະເທດ ລາວ-ຮົງກາຣີ ແລະ ຮົງກາຣີ-ລາວ.
ໃນການມາຢ້ຽມຢາມຄັ້ງນີ້, ສອງຝ່າຍ ກໍ່ໄດ້ຮ່ວມກັນລົງນາມໃນ ສັນຍາຂອບການຮ່ວມມືທາງດ້ານການເງິນ ລະຫວ່າງ ລັດຖະ ບານ ແຫ່ງ ສປປ ລາວ ແລະ ລັດຖະບານ ແຫ່ງ ຮົງກາຣີ ສະບັບໃໝ່ ເພື່ອສືບຕໍ່ນໍາໃຊ້ເຂົ້າໃນການຈັດຕັ້ງປະຕິບັດວຽກກໍ່ສ້າງລະ ບົບບໍາບັດນໍ້າເປື້້ອນຂອງ ນະຄອນຫຼວງວຽງຈັນ. ພ້ອມນີ້, ສອງຝ່າຍ ກໍ່ໄດ້ຮ່ວມກັນຖະແຫຼງຂ່າວຕໍ່ບັນດາສື່ມວນຊົນ ລາວ ແລະ ຮົງກາຣີ ກ່ຽວກັບ ການພົວພັນຮ່ວມມືສອງຝ່າຍ, ການເປັນປະ ທານອາຊຽນຂອງ ສປປ ລາວ ແລະ ການເປັນປະທານໝູນວຽນ ອີຢູ ຂອງ ຮົງກາຣີ.
ທີ່ມາ: ກົມການຂ່າວ, ກະຊວງການຕ່າງປະເທດ
